زواج 4
الظابط …
احمد يا باشا
عمار …
تماما سمعك يا احمد اتكلم
احمد …
احم هو يعني بصراحة يا باشا من نص ساعه كدة جت الست اللي عملت المحضر وطلبت تتنازل ولما الأمين محمد غلس عليها عشان يعرف حصل ايه قالتله أن ابنها كويس وفي البيت و اتفاهم مع اهل البنت اللي معاه في الفيديو ودي وان الله حليم ستار ودي سمعه وليه وكدة وان طالما هي هتتنازل يبقي قانونيا محدش مضرور وان اهل البنت هيسكتو عشان يسترو عليها وفضلت تعيط للأمين كتير جدا صعبت عليه والمحضر مكنش اتاخد فيه أي خطوات رسميه لسه طلعه وقطعه وبعد ما الست مشيت جة وقالي وقلتله تمام بصراحة يعني مشكله واتحلت ودي وخلصنا منها لكن معرفش أن حضرتك طرف في الموضوع من قريب أو من بعيد حتي
عمار …
ممممم تمام يا باشا انا دلوقتي جاي بشكل رسمي عايز اقدم بلاغ في جوز اختي لمار اللي هو معتز أنه ضـ,ـربها ضـ,ـرب مبرح ادي أنها خسرت الجنين اللي كان في بطنها وهي في شهرها السابع وأنها حاليا في العنايه المركزه وحالتها غير مستقرة يعني شروع في قـ,ـتل هتمشيها معايا رسمي ولا بتقولي ودي وبالحب بردو ؟
احمد اتوتر بس لحق نفسه واتكلم بثبات …
علي ما حضرتك تشرب قهوتك كل حاجة هتكون خلصت يا باشا
عمار ابتسم وسكت
❈-❈-❈
نرجع ل راويه بعد ما قفلت مع عمار قفلت التلفون خالص و خبته كويس وبدأت تفكر تقدر تهرب من هنا ازاي خافت الوقت يسـ,ـرقها قامت تحضر الاكل ل رامي بدل ما يضـ,ـربها كالعادة وهي بتعمل الاكل افتكرت الادويه بتاعت ماماتها واللي كان منهم دوا بينيمها جدا مدة طويلة جريت علي اوضه خديجة و طلعت الدوا واخدت منه حبيتين وطحنتم كويس اوي وحطتهم في طماطم قبل ما تضيفها علي المكرونة واتنهدت بارتياح أنها خلصت قبل ما رامي يوصل وبيان عليها الارتباك
عدي حوالي ساعه و رامي رجع من برة لاقاها قاعدة علي الكنبه جمب الشباك وساكتة تماما
رامي …
قومي اتحركي حضريلي اكل بسرعه لازم انزل تاني
راويه …
حاضر ثواني والأكل يكون جاهز
راح علي أوضتة وفتحها بالمفتاح وسابه في الباب ودخل غير هدومة وخرج كانت حطت الاكل علي السفرة قعد وبدء ياكل
رامي …
خير ساكتة يعني ومش قلباها مناحه زي كل يوم ؟ ايه القطة كلت لسانك ولا ايه ؟
راويه …
ما انا لو عيطت تاني هتضـ,ـربني تاني وانا جسمي وجعني يا رامي مش قادرة استحمل ضـ,ـرب والله
