زواج 4
ايمان …
طيب يا مكة بعد العشا جهزي صينيه صغيرة كدة ليهم و ابتسام تدخلها لهم وقت ما يقلقو ياكلو ها حلو الحل دا يا ستي كلي بقا الله يكرمك
هزت ابتسام راسها بموافقة وبدأت تاكل
محسن …
والبيه اللي بيسافر فجأة خلص شغله ولا ناوي يسافر تاني ويسيبنا ف الظروف دي
عدي ابتسم …
لا يا حبيبي خلاص خلصت شغلي و خدت إجازة ومعاكم لحد ما تزهقو مني وان شاء الله الظروف دي هتعدي وتخلص
ابتسام ….
يارب يا عدي يارب
مكة …
بت يا راويه السلطة ناقصه ملح ليه ؟
راويه بصت لها واتحرجت ترد
محسن …
يا بنتي انتي كدة مش بتفكيها انتي كدة بتخضيها
هايدي …
والله يا عمي انا لسه قايلة كدة جوة
مكة …
انا لا بخضها ولا بفكها السلطة ناقصه ملح فعلا مالكم ف ايه
راويه …
معلش معرفش انك بتحبي الاكل مالح
مكة …
الله ما بتردي اهو اومال ايه السكوت اللي كان في الاول دا
راويه …
ما انا جيت ارد عمي وهايدي اتكلمو اقاطعهم يعني ميصحش
مكة …
طيب انا اعمل ايه بالمعلش دلوقتي
انس بضحك …
انتي عايزة ايه يا حبيبي ؟
مكة ببراءة …
عايزة ملح للسلطة انا بحبها مش عارفه اكلها كدة
انس بحب …
بس كدة عيوني هجبلك الملاحة كلها تغرقي السلطة بيها
محسن بسخريه ….
لا والله طب واحنا ناكل ازاي يا عم النحنوح لما انت هتغرق للسنيورة بتاعتك السلطة ملح ولا مش مهم احنا
انس بصوت واطي …
بالظبط كدة
محسن برفعه حاجب …
سمعني بتقول ايه
انس بتراجع …
بقول ل مكة تاكل اي حاجة تانيه ولما نروح هبقي اعملها سلطة مملحة تحفة
الكل ضحك ومحسن اتنهد بارتياح أن اخيرا الأمور بدأت تتظبط وبدأ يدخل الامل من جديد في حياتهم
هايدي تلفونها رن برقم بصت فيه و قفلت الصوت
عدي ….
ما تردي تشوفي مين ؟
هايدي …
مش وقتة
التلفون رن تاني والمرة دي هايدي قفلتة خالص ودا خلي عدي يشك أن في حاجة هو ميعرفهاش
عدي …
هايدي قولي في ايه ؟
هايدي بهدوء …
ممكن لما ننزل شقتنا نتكلم وهقولك كل حاجة
عدي …
اوك يا هايدي هستني لما ننزل
العشا خلص و مكة حضرت صينيه صغيرة وادتها ل ابتسام تدخلها هي ل زهرة وعمار و كل واحد راح علي بيته ما عدا ايمان اللي أصرت أنها تبات مع ابتسام لانها عارفه أن أول ما الكل يسيبها هتفضل تعيط ومش هتنام وعشان تاخد بالها من راويه ال مهما كان لسه ضيفه و بتتعامل بحرج واكيد ابتسام مش في وضع يسمح ليها ترحب بضيوف ف هي لازم تكون مكانها
