عابث في الظلام الفصل الثاني بقلم شروق مصطفى

الفصل الثاني عابث في الظلام شروق مصطفى رجعت نور بيتها وهي مش حاسة بالأرض تحت رجليها، الكلام اللي في الورقة كان بيلف في دماغها زي الإعصار.. "بنتك لسة عايشة".. الكلمة دي كانت كفيلة تخلي قلبها اللي مات من ست شهور يدق من تاني بعنف، بس دقات المرة دي كانت مخلوطة برعب رهيب. دخلت شقتها، وقفت ورا الباب وهي بتنهج، وبصت للورقة المطبقة في إيدها، وبعدين بصت للوشم المحفور على جلدها.. كل حاجة حواليها بقت لغز مرعب ومفيش أي إجابة. تاني يوم، نزلت نور الكافيه وهي يدوبك شيلها رجليها. كانت بتتحرك وسط الطرابيزات زي الوشاح، عينيها بتدور في كل وشوش الزباين، بتدور على صاحب الصوت اللي همس لها في الشارع، أو أي حد باصص لها بنظرة غريبة. وفي نص اليوم، دخل زبون وقعد في ركن ضلمة في آخر الكافيه. الراجل ده كان لابس كاب مغطي نص وشه، بس هيبته وحجم جسمه كان ليهم هالة مرعبة. نور أول ما شافته، قلبها انقبض، ورجليها اتسمرت في مكانها. لمت شتات نفسها وراحت تسأله عن طلبه وهي بتترعش: "أفندم.. تحب تشرب إيه؟" الراجل مرفعش وشه، بس فجأة، وبسرعة البرق، امتدت إيده القوية ومسكت معصم إيدها.. نفس الإيد اللي عليها الوشم! ضغط عليها بعنف لدرجة إن نور حست إن عضمها هيتكسر في إيده. شهقت برعب ولسة هتصرخ، لقته مال عليها وهمس بنفس الصوت الحاد والفحيح اللي سمعته في الشارع: "أنا مش قولتلك متخرجيش من البيت؟ برضه نزلتي وجيتي الشغل؟ أنتِ مبتسمعيش الكلام ليه؟!" نور دموعها نزلت من الوجع والرعب، وبصوت مخنوق قالت له: "سيب إيدي.. أنت مين؟ وعايز مني إيه؟ سيبني!" سحب إيده فجأة وكأنه مقربش منها، ونور رجعت لورا وهي بتفرك إيدها وبتعيط، طلعت تجري على المطبخ وهي منهارة. لما رجعت الصالة بعد ربع ساعة عشان تشوفه، لقت الطرابيزة فاضية.. الراجل اختفى كأنه مكنش موجود اصلاً! تاني يوم الصبح، نور راحت الشغل وهي على آخره. أول ما دخلت، لقت صاحب الكافيه مستنيها وملامحه متغيرة وقاسية جداً. بص لها من فوق لتحت وقال ببرود: "مدام نور.. اتفضلي حسابك برة، وإحنا مش محتاجين ليكي معانا من أول النهاردة." نور اتصدمت، فتحت عينيها بذهول وقالت: "ليه يا فندم؟ أنا عملت إيه؟ أنا باجي في مواعيدي وشغلي مظبوط!" صاحب الشغل اتلغبط وبص في الأرض وكأنه مجبر على الكلام ده، وقال بحدة: "هو كدة وخلاص.. الشغل مصلحة، وإحنا مش عايزين مشاكل، اتفضلي اتكلي على الله." نور عرفت إن اليد الخفية اللي بتطاردها هي السبب.. في حد عايز يحبسها في البيت بالعافية، حد بيقطع عيشها وبيحاصرها من كل اتجاه عشان تنفذ كلام الورقة وتقعد مستنية الرسايل! طلعت نور من الكافيه وهي بتعيط بحرقة، قعدت على الرصيف مش عارفة تروح فين. كلمت منى أخت جوزها في التليفون وهي منهارة وحكت لها إنها اتطردت من الشغل (من غير ما تحكي موضوع الوشم والرعب عشان متخوفهاش). منى زعلت جداً وحاولت تهدّيها وقالت لها: "يا حبيبتي متزعليش، فداكي ألف شغلانة.. اسمعيني، أنا لسة حالا مكلماني صاحبتي عن وظيفة مربية (بيبي سيتر) في فيلا كبيرة في مكان هادي، طالبين واحدة تقيم إقامة كاملة بمرتب خيالي، وصاحب الفيلا طالب حد يقعد معاه ويديله أدوية وبس.. روحي يا نور، اعتبريها فترة نقاهة تخرجي فيها من الشقة وضغطها، وفي نفس الوقت تشتغلي." نور فكرت.. الإقامة الكاملة في فيلا تانية بعيد عن شقتها ممكن تكون هي المهرب من الراجل اللي بيدخل شقتها بالليل! وافقت بسرعة وأخدت العنوان من منى. في نفس اليوم بالليل، جهزت نور شنطة هدومها الصغيرة وتحركت رايحة العنوان. الدنيا كانت ضلمة والمطر بدأ ينزل خفيف. نور من كتر توترها وخوفها وتفكيرها في بنتها والرسائل، تاهت في شوارع المربع السكني الراقي ده.. وبدل ما تدخل الفيلا اللي منى قايلالها عليها، دخلت فيلا تانية خالص في نفس الشارع، فيلا متشابهة في الاسم بس الأجواء حواليها كانت غامضة ومقبضة. تقدمت نور بخطوات مرعوبة، لقت الباب الخارجي مفتوح، دخلت الجنينة ومنها لباب الفيلا الكبير.. أول حاجة لفتت انتباهها إن الباب مكنش باب عادي، ده كان باب مصفح ضخم جداً، كأن اللي عايش جوة الفيلا دي مستني هجوم أو بيحمي نفسه من جيش! دقت الجرس، فتحت لها الشغالة ودخلتها الصالون. المكان كان واسع، ضخم، بس هادي هدوء المقابر، الأثاث كله ألوانه غامقة والستائر مقفولة تماماً. بعد دقايق، سمعت صوت حركة عجل على الأرض.. لفت بنور ولقت راجل في أواخر التلاتينات، ملامحه حادة وجميلة بس قاسية جداً، قاعد على كرسي متحرك.. وعينيه كانت مطفية، باصة في الفراغ.. الراجل ده كان ياسين. ياسين وقف الكرسي على بعد مسافة منها، وقال بصوت رخيم وصارم: "أنتي مين؟ ومين اللي سمحلك تدخلي هنا؟" نور اتلجلجت وقالت: "أنا.. أنا نور، جاية عشان وظيفة المربية والإقامة الكاملة.. الأستاذة منى كلمت حضرتك بخصوصي. هو فين البيبي! ياسين عقد حواجبه، وظهرت على وشه علامات الغضب، وقال بحدة: "منى مين؟ أنا مفيش حد كلمني.. وأنا شروطي واضحة ومعلنة للمكتب، أنا طالب ست كبيرة، تعدت سن الأربعين، تقيم معايا إقامة كاملة وتديني الأدوية في مواعيدها ومسمعش صوتها.. أنتِ من صوتك وحركتك باين إنك شابة ومكملتيش تلاتين سنة! اتفضلي امشي.. أنتي غلطانة في العنوان. نور نظرت متفاجأة مش دا اللي جايه عشانه هي جايه بيبي سيتر لطفل مش راجل قعيد، وقالت وهي بتلم شنطتها بسرعة: "أنا متأسفة جداً يا فندم، فعلاً شكل العنوان غلط.. أنا المفروض رايحة فيلا الأستاذ صخر -نطقت الاسم التاني اللي كانت رايحاله أصلاً أول ما نور نطقت اسم "صخر".. حصلت حاجة غريبة جداً في الأوضة! ملامح ياسين الأعمى اتحولت من جمود لـ رعب خالص.. إيده اللي ماسكة عجل الكرسي اتشنجت، وعينيه المطفية برقت كأنه شايفها! ياسين عارف الاسم ده كويس جداً.. عارف إن "صخر" ده شخص مجهول وخطير، شيطان على هيئة بشر، وعارف إن أي مربية أو ست بتدخل فيلا عمران دي.. مش بتمشي منها عايشة، ومبتظهرش تاني للدنيا! ياسين في ثانية أخد قرار.. صوت في أمن الفيلا من برة وقال بزعير هز الحيطان: "اقفلوا الأبواب!! الباب المصفح يتقفل بالجنزير فوراً!" نور اتفزعت والشنطة وقعت من إيدها وسألت برعب: "في إيه؟ أنت بتقفل الباب ليه؟ أنا عايزة أمشي!" ياسين لف بالكرسي ناحيتها، وبصوت صلب زي الحديد قال لها: "مش هتخرجي من هنا.. رجلك مش هتعتب برا الفيلا دي خلاص.. من اللحظة دي، أنتي معانا، وهتقعدي هنا وتديني الدوا في مواعيده.. وأمرك بقى واقع! نور بدأت تصرخ وتخبط على الباب المصفح اللي اتقفل بصوت حديدي مرعب، لقت نفسها محبوسة في حصن راجل أعمى مشلول، وهي مش فاهمة هو بيعمل كدة ليه.. وماتعرفش إن الحركة دي كانت أول خطوة لإنقاذ حياتها من الهلاك! يتبع رأيكم أكمل مستنية تعليقاتكم ضروري بقلم شروق مصطفى