سرقت زوجي

احمد بص لفوق بقلة حيلة وبعدين ابتسم وقالها وهو بيبعدها عنه :
طيب يلا يا حبيبتي خلينا ناكل احسن انا جعان اوي

ابتسمت فيروز ومسكت احمد من ايديه وسحبته وراها ناحية السفرة وهي بتقول بحب :
تعرف ،، انا طبختلك كل الاكل اللي انت بتحبه ،،

قعد احمد عالسفرة وفيروز قدامه ومسكت ايديه وهي بتكمل كلامها وبتقول بحب :
انا نفسي يا احمد ترجع علاقتنا زي الاول ،، صدقني انا بحبك اوي ومليش غيرك في الدنيا وحاسة وانت بعيد عني ومتغير عليا اني غريبة ووحيدة

فيروز صعبت علي احمد وحس انه فعلا بدأ يبعد عنها وانها متستاهلش منه كدة وكان احساس الذنب بيتسرسب لقلبه ،، اتنهد بحيرة و باس ايد فيروز وهو بيقولها بهدوء :
ان شاء الله يا حبيبتي كل حاجة هترجع زي الاول ،، اوعدك

فرحت فيروز اوي بكلام احمد وقامت وحض*نته وهي بتقوله بفرحة :
وانا اوعدك يا حبيبي اني هحاول اتغير وكل حاجة كانت بتضايقك مني مش هعملها ،، حتي ليلي ،، انا اقتنعت اخيرا بكلامك واتأكدت انك كان عندك حق لما كنت بتقولي اني مدخلاها في حياتنا اوي وقررت ابعدها واخلي علاقتي بيها بعيد عنك وعن البيت ،

اتوتر احمد اول ما فيروز جابت سيرة ليلي وحاول يغير الموضوع وقالها بحب :
يلا بقي تعالي نتعشي سوا بقالنا كتير مكلناش مع بعض كدة

قعدت فيروز قصاد احمد وهي بتبصله بفرحة وحب لانها نجحت في انها تفتح صفحة جديدة معاه وانها هترجعه ليها تاني زي الاول

………………………..بقلم اسراء ابراهيم

تاني يوم كانت فيروز عند عفاف وحكتلها عاللي حصل وان احمد وهي اتصالحم وقررو يفتحو صفحة جديدة سوا وانها هتبعد ليلي عن حياتهم وان كدة كدة ليلي اصلا بقالها فترة مختفية ومبقتش تتصل ولا تيجي زي الاول وعفاف فرحت اوي لكدة وطلبت من فيروز انها تحاجي علي بيتها وجوزها وتهتم باحمد ذيادة شوية عن الاول ،، خرجت فيروز من عند عفاف وقررت تروح لاحمد مكتبه زي ما كانت بتعمل الاول قبل ما تخلف مليكة ،، فقررت تفاجأه وتروحله مكتبه ،، دخلت فيروز المكتب وهي بتدور بعنيها علي السكرتيرة بس ملقتهاش فاستغربت ودخلت مكتب احمد علطول بس اتفاجأت بيه فاضي كشرت بقلق وبعدين خرجت تاني وفي نفس الوقت كانت السكرتيرة جت من الكافتريا فسألتها فيروز بقلق :
هو احمد خرج بقاله قد ايه ،،معقولة في محكمة دلوقتي ؟