البنت الايرانية اللي في الصورة دي قصتها صادمة

اللي في الصورة دي هي بنت إيرانية اسمها (آمنة بهرامي) اللي بسبب قصتها والنهاية الغريبة بتاعتها، اتحولت قضيتها لقضية عالمية واتصدرت عناوين أكبر صحف العالم. سنة (١٩٧٨) وفي العاصمة الإيرانية (طهران) اتولدت امنة بهرامي لأسرة عادية من الطبقة المتوسطة. حياة آمنة كانت عادية، بنت طموحة ومتفوقة دراسيًا، وكان حلمها تكون مهندسة. وبالفعل التحقت بجماعة (أزاد الإسلامية) قسم هندسة الإلكترونيات. خلال فترة دراستها في الجامعة كانت بتشتغل؛ عشان تغطي مصاريف الدراسة، وكمان تساعد أهلها. تركيز وطاقة آمنة في الفترة دي، كانوا موجهين للدراسة ولتحقيق ذاتها، ومكانتش بتفكر لا في جواز ولا في ارتباط، ولا أي حاجة ممكن تشتتها عن هدفها. لحد ما نيجي لسنة (٢٠٠٢) ويقابلها في نفس الجامعة بتاعتها شاب اسمه (مجيد) الشاب ده وقتها كان أصغر منها بسنتين. مجيد لما شاف آمنة أُعجب بيها وصارحها بده، وطلب منها بشكل مباشر الإرتباط والزواج، لكنها ردت عليه بكل أدب وقالته إنها مش موافقة ومش بتفكر في الموضوع ده دلوقتي. بس مجيد مسكتش، فضل يطاردها ويتودد ليها، ويكرر طلبه بإنه عايز يرتبط بيها، لكن آمنة ردها كان واضح، وهو الرفض. لكنه برضو مستسلمش. والموضوع موقفش لحد هنا؛ لأن مجيد بدأ يطاردها في كل حتة تروحها، ويتصل عليها في البيت عشرات المرات يوميًا، لدرجة إنه كان شوية يقولها لو متجوزتهوش هينتـ...،،حر، وشوية تاني يتوعد ليها بالأذى! الموضوع اتحول عنده لهوس مرضي، وفي الوقت ده لجأت آمنة لأمها وحكتلها كل حاجة. والدتها اتواصلت مع أهل الشاب ده، وطلبت منهم إن ابنهم يبعد عن آمنة. لكن هو رد بشكل مباشر وقال: لو آمنة مكانتش ليه، مش هتكون لأي راجل تاني. واستمر الحال ده والمطاردات دي لحد ما وصلنا لسنة (٢٠٠٤) وتحديدًا يوم ١ اكتوبر، في اليوم ده خلصت آمنة شغلها ونزلت تركب الأتوبيس؛ عشان تروّح بيتها. وأثناء ما هي ماشية في طريقها، سمعت خطوات جاية وراها بسرعة، وقفت مكانها وبصت وراها، واتفاجئت بمجيد واقف قدامها وفي إيديه إزازة، وفجأة صرخ فيها، وفضى الإزازة في وشها. عمل كده وهرب من المكان، لكن آمنة فضلت تجري في الشارع وتصرخ بأعلي صوتها، فاتجمع حواليها الناس وبدأوا يغسلوا وشها، وبسرعة نقلوها للمستشفى، واتضح هناك، إنه رمى على وشها ماية نار! والأضرار اللي حصلت لـ آمنة في وشها كانت كارثية، تآكلت الجفون والشفايف وأنسجة الأنف تمامًا، وكمان فقدت النظر كليًّا بعد تآكل الجفون، لدرجة إن فيه عين تم استئصالها؛ لعدم انتشار العدوى. طبعًا في الوقت ده الموضوع انتشر، وبقى قضيّة رأي عام في إيران، وبسبب الضغط الإعلامي الكبير، الرئيس الإيراني (محمد خاتمي) قرر يسفّر آمنة؛ عشان تتعالج في إسبانيا، بتمويل حكومي. وفي إسبانيا عملت أكتر من ٢٠ عملية معقدة! استخدموا في العلميات دي: رقع جلدية من بطنها وأماكن تانية في جسمها؛ عشان يعيدوا بناء ملامح وشها، لكن في النهاية كانت فقدت بصرها تمامًا، والنتائج بتاعت العمليات كانت محدودة. في الوقت ده كان اتقبض على مجيد، واتقدم للمحاكمة. وقتها القانون الإيراني كان بيقول: إن الأحكام في القضايا دي، هو السجن مع دفع الديّه، أو تعويض مالي للمجني عليه. لكن في نفس الوقت، كان في بند في القانون بيسمح للضحية بطلب القصاص. وبالفعل، آمنة وقفت قدام القاضي، ورفضت الديّة، أو أي تسوية مالية، وطلبت القصاص، العين بالعين. وقالت: "أريد أن يعيش مجيد ما أعيشه أنا يوميّا، أريد أن يُعمى كما عُميت، ليس بدافع الكراهية فقط؛ بل ليعلم كل شخص يفكر في سكب الحمض على وجه امرأة أن عقابه سيكون نفس المصير، ولأضع حدًا لظاهرة هجمات الأسيد في بلادنا" ونيجي سنة (٢٠٠٨) وتصدر المحاكم الإيرانية حكم تاريخي، وهو إفقاد مجيد بصره بنفس الحمض اللي استخدمه، تحت إشراف الطب الشرعي، وكمان بـ إيد الضحية لو هي عايزة ده. طبعًا الحكم ده خلى القضية تبقى قضية رأي عام عالمي، بعض منظمات حقوق الإنسان اعتبرت إن العقوبة دي غير آدمية، وناس تانية شافت إنه حكم رادع لأي حد يفكر يعمل اللي مجيد عمله. ونوصل لشهر يوليو سنة (٢٠١١) وتحديدًا يوم ٣١ أكتوبر، وهو ده كان ميعاد تنفيذ الحكم. في غرفة مجهزة تابعة للهلال الأحمر في طهران، كان محيد مُقيد على السرير، ودخلت آمنة ومعاها الطبيب الشرعي. آمنة قربت من مجيد وكان في إيديها الحمض اللي هتنفذ بيه القصاص، وهو كان عمّال يبكي ويتوسل ليها عشان تسامحه، وفي اللحظة دي سألها المحقق، ناوية تعمل إيه؟ سكتت آمنة لثواني، وهي قدام مجيد وهو بيترعش، وبعدين ترد الرد اللي خلى كل الحضور في حالة ذهول، قالت: "لقد سامحته، أتنازل عن حقي في القصاص" في اللحظة دي، انفـ..،جر مجيد بالبكاء وسجد على الارض وهو بيبكي وسط ذهول كل الحضور. الموضوع اتصدر كل صحف العالم في الفترة دي، وصرحت آمنة وقالت إن هي خاضت المعركة القضائية دي؛ عشان تثبت إن القانون يقدر ينتزع حق المرأة، وعشان كمان تضع سابقة قضائية تخلي أي معتدي يعرف إن فيه عقاب رادع بينتظره، وإنها لمّا وقفت قدامه وهو بيبكي زي الطفل، حسّت إن فقد بصره مش هيرجعلها بصرها، لكنها هتنزل لنفس مرتبة الجاني، وإن هي اتحرقت مرة، لكنها مش عايزة تتحرق من جواها تاني. وثقت آمنة قصتها في كتاب اترجم لأكتر من لغة، وحقق مبيعات عالمية ضخمة، وكمان اتناقشت قصتها في أفلام وثائقية عالمية. هسيبلكم فيديو في أول تعليق اتذاع على التليفزيون الإيراني وقتها لما كانت آمنة هتنفذ القصاص وتنازلت. ✍️/ محمد المغربي