منال علي 2

اللي كان واقع على الأرض تحت رجلين نور خلّى الدم يتجمد في عروقي.. شريطين دوا أعصاب ونوم من الأنواع الثقيلة والمهدئات الشديدة مرميين ومتفرغين بالكامل، وحقنة مكسورة متغرقة في بقع دم، وجنبهم طوق دهب كان بتاعي وضايع من شهور، وفردة جزمة راجل غريب مفيش زيها في البيت! #حكايات_منــال_عـلـي قعدت على ركبي في الأرض وأنا حاسة برعشة شلت حركتي، مسكت وش نور بين إيديا المرتجفة: "نور.. حبيبتي.. إيه ده؟ ردي عليا يا قلبي، مين اللي عمل فيكي كده؟" نور فضلت تشدني من عبايتي ودموعها نازلة شلالات، وشاورتلي على بطنها تاني وعلى باب الحمام المقفول بالمفتاح من برة بترباس، وقالت بصوت مكسور مبحوح يقطع القلب: "شيرين شربتني المية المرة وضربتني برجليها هنا.. عشان قولت هقول لأحمد.. والراجل.. الراجل صاحبها جوة في الحمام بيخبي الحاجة!" الكلمة نزلت على دماغي زي مية النار.. راجل غريب في شقة ابني وهو في شغله في الوردية الليلية بالمصنع؟! وشيرين بتخدر بنتي البريئة وتضربها عشان تخرسها؟! فهمت وقتها ليه نور كانت دايماً دايخة ومهدودة وليه كانت بتهرب لدنيا الخيال.. الحرباية كانت بتسمم عقلها وجسمها بالمهدئات عشان تشغلها خدامة طول النهار، وبالليل تضمن إنها تغيب عن الوعي ومتحسش بأي مصيبة بتحصل في الشقة!#حكايات_منــال_عـلـي وقفت على حيلي والغضب عماني، ولسه رايحة ناحية باب الحمام عشان أشوف مين المستخبي جوة، فجأة سمعت صوت مفتاح بيدور في كالون باب الشقة برة! اتكتمت أنفاسي.. النور اتفتح في الصالة، وسمعت صوت ضحكة شيرين المايصة ومعاها صوت تاني.. بس الصدمة إن الصوت التاني كان صوت ابني "طارق"! رجع من شغله بدري من غير ميعاد، وكانت شيرين بتضحك وتقوله بدلع: "يا حبيبي والله نور كويسة.. نزلت عند مامتك من بدري بعد ما روقت، تلاقيها نايمة تحت، تعالى بس ارتاح شوية". في نفس اللحظة اللي طارق كان بيقرب فيها من الطرقة، سمعت حركة خربشة قوية ورا باب الحمام المقفول.. كأن الشخص اللي جوة أدرك إن صاحب البيت رجع وهيتحبس! الباب بتاع الحمام اتهز بعنف، والترباس بدأ يتحرك من جوة ببطء! أنا بقيت محاصرة في الأوضة الضلمة بين نور اللي بتنزف وبتفقد الوعي بين إيديا من أثر المهددات والضرب، وبين ابني اللي داخل ومش فاهم حاجة وشيرين بتضلله، وبين الكارثة اللي محبوسة ورا باب الحمام ومستعدة تقتل عشان تهرب!#حكايات_منــال_عـلـي أخدت نور في حضني وجريت بيها ورا دولاب الخزين القديم في زاوية الأوضة.. وفي ثانية واحدة، باب الحمام اتفتح بعنف، وخرج منه شاب طويل وشه متغطي بكاب، وفي إيده سكينة مطبخ كبيرة وشنطة سودا منفوخة.. وكان متجه بخطوات سريعة ناحية باب الصالة عشان يهرب قبل ما طارق يلمحه! صرخت بأعلى صوتي: "الحق يا طاارق! أختك بتموووت!" الصوت شق سكون الشقة.. الشاب اتفاجئ بوجودي واتلفتلي وعينه كلها غدر، ورفع السكينة وجري عليا وأنا حاضنة نور بجسمي عشان أفديها.. وفي نفس اللحظة، طارق وشيرين ظهروا في وش الأوضة.. شيرين شهقت شهقة رعب، وطارق اتصدم والدم هرب من وشه لما شاف الشاب بالسكينة فوق راسي!