القايمة

مقدرتش أسكت وقولت بصوت عالي
_ حسبي الله ونعم الوكيل فيكم يا عالم يا ظلمة، مش مسمحاكي لا أنتِ ولا إبنك، ربنا كشفكم قبل ما اتدبس مع عالم فيكم و في اشكالك

بابا زعق فيا
_مريم اسكتي ماترديش ماتبقيش زيهم
_ زينا واشكالنا، مالنا بقا إن شاء الله!

بابا شاور ليها على الباب
_ من فضلك مش اخدتي حاجتك، اتفصلي، أنا بقولها بكل إحترام

بعد ما مشيت بابا بص ليا وقال بهدوء
_ أنا ماعملتش كدا عشان مهر ولا فلوس، أنا مش فارق معايا أي حاجة من دي ولو كنت بفكر فيها كنت أتفقت عليها، لكن الموضوع انتهى عشان دا مش شخص فكر يحطك في المرتبة الأولى من حياته، ماعرفش قيمتك أي، يمكن تساهلي معاه خلاه يفتكر إنك مش غالية وقيمتك عالية، لا أنتِ قيمتك عالية أوي، و إللي هيتجوزك لازم يكون عارف كدا

_ بس أنا قولتلك يا بابا من الأول أتفق على مهر أو قايمة، بدل البهدلة دي

_ حقك عليا، ودي مش بهدلة على قد ما هو درس، الإنسان مش بيتعرف غير بالمواقف، وماكناش هنعرفه غير بعد إللي حصل

_ بس … أنا حبيته، و جرحني أوي تخليه عني، عمري ما توقعت منه كدا

_ ولا أنا توقعت كدا

_ يابنتي الموضوع عمره ماكان فلوس على قد ما إللي قدامك داخل وفي دماغه لو خلعت مش هخسر، مش هنقص، وهعرف أخد منها كل حاجة، ودا حقك إللي اصلا ربنا كتبه ليكي و بيجادلوا فيه

_ أنا عارفة يا بابا إن القايمة مش في الشرع
_ بس المهر في الشرع، و إنه يجهز بيته في الشرع، وأنك تكوني مسؤولة منه مسؤوليه كاملة سواء في المصاريف أو حماية، دي القوامة إللي ربنا قال عليها، و الشخص إللي مايحطش حقك قدام عينه يبقى يفتح الله عليه في سكه بعيد عننا

_ بس أنا كدا هبقى فسخت خطوبتي
_ وأي يعني مئة خطوبة تبوظ ولا عيل يجي بينكم يتبهدل يابنتي

عدى يومين ولقيت رقم عمال يرن عليا كتير، ولما رديت لقيته هو
_ مريم أنتِ كبرتي الموضوع، أي إللي حصل لكل دا
_ أي إللي حصل لكل دا، أنت بجح بجد ولا بتستعبط

_ أهدي بس خلينا نتفاهم
_ مش عايزة اتفاهم معاك ولا أكلمك ولا أعرفك تاني، بعد إللي عملته أنت وأمك، والله والله لو شوفتك في طريقي تاني لهفرجك عليك أمه لا اله الا الله

_ طب ولي كدا يعني، أنتِ كل تفكيرك في الماديات
_ أنا إللي تفكيري في الماديات يا جاهل يا جعان، عارف لو أتصلت بيا تاني هعمل أي، والله هبلغ عنك