القايمة

سكت وما اتكلمش، وأنا ماكنتش متخيلة إن اجادل في حاجة زي دي فكرت أنه عارفها من الأول، حسيت بعدم الأمان لما لقيته مش فاهم حاجة بسيطة زي دي في الدين حق من حقوقي، حسيت إن مش هيحافظ عليا أو على حقوقي اصلا، كأنه مش عايز يدفع مش عايز يتكلف، مش عايز يعمر البيت

أخدت قرار لما لقيت الرفض على ملامحه وقولت
_ خلاص أعتبر الموضوع منتهي

_ أي خلاص شيلتي موضوع القايمة من دماغك؟!
_ لا شيلت فكرة الجواز منك من دماغي، الموضوع منتهي، أبقى تعالى خد حاجتك، سلام

روحت البيت وكنت أخده القرار واستريحت جدًا، لقيت ماما بتسالني بحماس
_ أي يا مريم خلصتي ورق كتب الكتاب مع خطيبك
_ أنا سيبته يا ماما
_سبتيه وجبتي لي مخلصتيش الورق معاه!
_ لا يا ماما أنا سبته خالص، فشكلت الخطوبة وهيبقى يجي في أي وقت ياخد حاجته

صوت بصدمة كأن قولت ليها أصعب حاجة في الدنيا
_ يالهوي لي في أي، حصل أي، دا شيطان ودخل بينكم، روحي صلي ركعتين بس و أنا هشغل الرقية الشرعية، دي عين ماصلتش على النبي

_ ماما، أنا خلاص مش هرجع تاني تصوري حصل أي وقالي أي!

حكيت لماما كل حاجة، وكانت مذهولة، إحنا عمرنا ما فكرنا فيه كدا، إحنا اصلا في العموم مش بنكتب قايمة، بس أنا فتحت الموضوع أشوف رد فعله، واتصدمت ماكنش شاريني ومش محافظ على حقوقي، دا حتى مافكرش يجبر بخاطري بكلمة، شخص كنت هسلمه مفاتيح حياتي كلها، بعيدًا عن فرش وجهاز، أنا كنت هعيش معاه .. أنا في الأول كنت بقول عادي، مش كل شخص عارف الشرع، مش كل شخص حافظ قرآن، عادي هيعرف، عادي هيتعلم، بس لا أنا مش مضطرة أعلم شخص مش عايز يتعلم حدود ربنا أي وحقوقي اي وحقوقه أي

بالليل لقيت الموبايل بيرن برقم غريب ولما رديت لقيت صوت مامته بتصوت في ودني
_ بقا بتعملي ليما لكنا بلوكات، يا مادية يا بتاعت الفلوس، عايزة تمضي ابني على قائمة عشان تشحطتيه في المحاكم

_ أي إللي بتقوله دا يا طنط، أنتِ بتكلميني كدا لي اصلا
_ عشانك عينك فارغة وطمعانة في ابني

_ ابنك مين إللي أطمع فيه، على أي أصلا، دي غلطتي أن تنازلت من الأول، وفضلت اساعده، وشيلنا حاجات في الشقة مش من حقنا نشيلها

_ دا كتر خير ابني إنه اصلا هيتجوزك ويسترك

_ يستر مين! بقولك أي، أنا واحدة محترمة مش عايزة اتخانق معاكي و أقولك كلام مايصحش بتقال، وعموما مش عايزة من إبنك حاجة ولا يتجوزني ولا يسترني، أنا مش عايزاه أصلًا