صغيرتي بقلم مايا خالد 1

صغيرتي بقلم مايا خالد حصري الفصل الأول كانت واقفة تايهة، ماسكة شنطتها بعصبية. ده كان أول يوم ليها في الجامعة بعد أسابيع قليلة من زواجها القسري، أول مرة تخرج من القصر لوحدها بعدما وافق قاسم بصعوبة على استكمال دراستها، بس كان واضح من البداية إن موافقته ليها حدود. بتدور بعينها على مدرج المحاضرة الأولى، ملامحها الناعمة توحي بالضعف، بس في عيونها الواسعة ومضة عناد خفية بتقاوم الخوف اللي جواتها. قرب منها شاب بابتسامة ودودة وسألها بلطف: – ازيك يا أنسة.. شكلنا في نفس السنة، هو فين مدرج قسم إعلام لو تعرفي؟ بصتله ليان برهبة وقالت بصوت هادي: – أنا كمان لسة بدور عليه.. ابتسم الشاب وقعد جنبها على إحدى الاستراحات برا ساحة الكلية وقال بصوت مرح: – طيب تعالي نستنى شوية لحد ما نشوف حد يدلنا على المكان، أنا اسمي كريم.. وانتي؟ ليان لسة هترد، وفجأة.. رن تليفونها اللي كان في إيدها مقلوب على الشاشة. بصت على الاسم ووشها خطف ألوانه، الدم جرى في عروقها وقلبها دَقّ بعنف لحد ما كأن ضلوعه هتتكسر. بلعت ريقها بصعوبة وفتحت الخط وهي بتترعش: – قاسم؟ جه صوته من الناحية التانية، ضحك ضحكة قصيرة مليانة جنون ورعب هزت كيانها، وفجأة اختفت الضحكة تمامًا، وتحول صوته لبرود مخيف وهو بيقول ببطء: – ليان.. أنتي اتعديتي حدودك! سكتت أنفاس ليان ورعب الدنيا تملكها، والحرارة حسيتها نزلت في جسمها كله، وكمل قاسم بصوت واطي وقاسي زي المنشار: – فكرة إني أسيبك تنزلي الجامعة لوحدك كانت غلطة.. وغلطة كبيرة كمان. وشايفة الزفت اللي قاعد جنبك ده وبيبتسم في وشك وهو مش عارف إن روحه بقت في إيدي؟ دقيقة واحدة.. لو لقيته لسة قاعد جنبك أو بيكلمك بعد ما أقفل، اعتبري إن عقاب الليلة دي هيكون طويل أوي.. ومش هرحم دموعك.. فاهمة؟ وقبل ما تلحق تنطق بحرف أو تبلع ريقها، قفل السكة في وشها. رفعت عيونها المرعوبة وبصت حواليها بجنون.. وسط زحمة الطلبة، لمعت عيون سوداء حادة بتبص عليها من عربية سودة فخمة واقفة بعيد قدام بوابة الكلية.. عربية قاسم. فضلت ليان قاعدة مكانها ثواني من الصدمة والرعب، عيونها متثبتة على العربية السوداء الفخمة اللي واقفة بعيد.. حست كأن العربية دي قفص محبوسة فيه مهما بعدت. ريقها نشف ودقات قلبها بقت بتضرب في ودانها زي الطبول. بصت لكريم اللي كان قاعد جنبها ومستني ردها بابتسامة بريئة وهو مش فاهم حاجة خالص، وقال باستغراب: – مالك؟ وشك مخطوف كأنك شوفتي عفريت! بلعت ريقها بصعوبة بالغة، وحست إن الهواء هرب من صدرها، وقالت بصوت متهدج وهي بتقوم بسرعة وبترجع شنطتها لوراء: – م.. مفيش.. أنا افتكرت حاجة مهمة لازم أعملها.. عن إذنك! وقبل ما يستوعب اللي بتقوله، اتحركت بخطوات سريعة تكاد تكون جري، وسابت المكان كله وراها. كانت ماشية وعيونها بتلف حواليها بخوف، حاسة إن كل شجرة وكل طالب في الكلية هو عين تابعة لقاسم. وصلت لبوابة الكلية الرئيسية، ولقت العربية السوداء اتحركت ببطء ووقفت بالضبط قدامها، والباب الخلفي اتفتح كأنه بيدعوها لدخول الجحيم بمحض إرادتها. اتجمعت الدموع في عيونها من القهر والعجز، بس غرورها وعنادها جواها رفضوا تنزل دمعة قدامه. قربت بخطوات بطيئة وتجليد كامل لأعصابها المرتعشة، وركبت العربية وقفل الباب وراها بإحكام. الجو جوة العربية كان هادي، مكيف، وريحة عطره الحادة الخاصة بيه هجمت على أنفاسها فخلتها تكتم نفسها غصب عنها. كانت قاعدة على أطراف الكرسي، بتبص قدامها ومش قادرة تدير راسها ناحيته. مد إيده ببطء شديد، وبأطراف صوابعه رفع دقنها لفوق عشان يجبرها تبص في عيونه السوداء المرعبة. عيونه كانت بتلمع بنظرة تملك وجنون تخلي الحجر ينطق، وبصوت هادي وجاف تمامًا قرب من ودانها وقال: – أنتي شكلك نسيتي درسي الأول، ولا تحبي أعيدلك الشرح بطريقتي الخاصة الليلة في القصر؟ عقدت ليان حواجبها بغضب دفين، وجمعت آخر ذرات شجاعتها المتبقية عشان ترد بصوت مهزوز بس فيه شوية عناد واضحة: – أنا.. أنا مكنتش بعمل حاجة غلط! الولد كان بيسألني على المدرج زي أي طالب تائه.. هو أنت فاكر إن الناس كلها بتلعب؟ حرام عليك، سيبني في حالي شوية! قاسم ملامحه اتحولت في ثانية واحدة من الهدوء المرعب لجمود تام ضيق عيونه السوداء عليها، وقرب بوشه منها لحد ما بقت حاسة بأنفاسه الحارة المختلطة بريحة عطره القوية، وقال بصوت واطي وخشن نزل على قلبها زي الصاعقة: – صوتك ما يعلاش يا ليان.. دي أول حاجة. وتاني حاجة، مافيش مخلوق على وش الأرض دي من ولاد آدم له حق يكلمك، أو حتى يبص في وشك غيري أنا. فهمتي ولا أكتبهالك بطريقتي؟ بلعت ريقها بصعوبة وحست إنها بتمشي على حافة سكين، لفت وشها الناحية التانية بعناد وقالت بصوت أشبه بالهمس بس مصمم: – أنت إنسان أناني ومريض.. جوزتني غصب عني وكسرت أبويا عشان تبسط رغبتك في التملك، بس مش معنى كدة هتحبسني جوة دماغك! هز قاسم راسه بابتسامة جانبية باردة ومستفزة، وبص قدامه وهو بيدي إشارة للسواق عشان العربية تتحرك وتنطلق بسرعة متوجة لطريقهم للقصر، وقال بصوت كفيل يجمد الدم في عروقها: – مظبوط.. أنا أناني، ومريض، ومالكك بالكامل. وبما إنك مصرة تختبري صبري من أول يوم.. فالليلة مش هيعدي على خير يا صغيرتي. سكتت ليان وقبضت على إيديها بقوة لحد ما ضوافرها دخلت في جلدها، عينيها اتملت بالدموع بس حبستها بغرور، وهي عارفة إن الجاي أكيد أسوأ. دخلت ليان القصر وهي رافعة رأسها بعناد، تحاول أن تخفي ارتجافها خلف قناع من القوة. كانت تعرف هذا المكان جيدًا... ليس لأنها عاشت فيه، بل لأن ذاكرتها احتفظت بأول مرة رأت فيها صاحبه. مرت الدقائق ثقيلة عليها، وكأنها تنتظر حكمًا لا تعرف نهايته. جلست على طرف السرير في الجناح الواسع، تضم يديها إلى بعضهما، وتحاول بكل ما تملك أن تسيطر على ارتجافها. وما إن انفتح الباب حتى دخل قاسم. كان هادئًا على نحوٍ يثير القلق. خلع ساعته ووضعها فوق الطاولة، ثم اتجه إليها بخطوات بطيئة، وقال بصوت منخفض: – صغيرتي... رفعت رأسها إليه بسرعة، وهتفت بحدة: – ماتقولش صغيرتي... أنا كبيرة بما فيه الكفاية. اشتدت ملامحه في لحظة، وبرزت عروق عنقه من شدة الغضب. اقترب منها حتى أصبحت محاصرة بينه وبين الحائط، وقال بصوت خافت لكنه حاد: – ليان... صوتك مايعلاش عليا... وطريقتك مع كريم... وتحديك لكل كلمة بقولها... كل ده ليه حساب. رغم الدموع التي امتلأت بها عيناها، ابتسمت بسخرية، وقالت بصوت مرتبك من شدة قربه وأنفاسه الساخنة التي لامست وجهها: – يعني أنت كنت مستني أي غلطة عشان تحبسني هنا؟ ثبت نظره داخل عينيها، ثم قال بهدوءٍ أخطر من الصراخ: – أنا مش بحاول أكسرك يا ليان... أنا بحاول أخليكِ تفهمي إن فيه حدود. هزت رأسها بعنف. – حدودك أنت؟! أنت فاكرني إيه؟... حاجة اشتريتها؟ ساد صمت قصير... وتوقفت عيناه عند وجهها، وكأن كلماتها أصابته في مكانٍ لم يتوقعه. لكنه أخفى ذلك سريعًا، وعاد الجمود يكسو ملامحه. – من النهارده... مفيش جامعة. اتسعت عيناها بصدمة. – إيه؟ – لحد ما تتعلمي حدودك. ثم أكمل بنبرة ثابتة: – ولسه أول يوم ليكي هناك ماكملش كام ساعة... وقدرتي تعملي كل اللي حذرتك منه. شهقت وهي تهز رأسها برفض. – لا... الجامعة لأ يا قاسم... أرجوك. نظر إليها دون أن يلين. – لما تهدي... وتبطلي تحاربي كل حاجة حواليكي... هترجعي. صرخت بانفعال: – دي حياتي! أجابها بهدوءٍ مؤلم: – وأنا المسؤول عنها. استدار وغادر الجناح، ثم أُغلق الباب خلفه بهدوء... لكن ذلك الصوت كان أقسى عليها من أي صراخ. ظلت تنظر إلى الباب لثوانٍ طويلة، قبل أن تنهار جالسة على الأرض. مسحت دموعها بعنف وهمست: – أنا مش سلعة... ومش هكون ملك لحد. مر اليوم عليها وكأنه عامٌ كامل. لم تغادر الجناح. جلست أمام النافذة الزجاجية الواسعة، تحدق في الحديقة الممتدة أسفل القصر، بينما راحت الذكريات تنتزعها رغماً عنها... إلى ذلك اليوم... اليوم الذي انتهت فيه حياتها القديمة. --- كانت تنزل درجات السلم في منزلها بهدوء بعدما سمعت أصوات رجال في الأسفل. توقفت قبل أن يراها أحد، واختبأت خلف العمود المطل على الصالة. وهناك... رأته لأول مرة. كان قاسم يقف بكامل هيبته، يرتدي بذلة سوداء، بينما وقف والدها أمامه شاحب الوجه، وكأنه يحمل هموم الدنيا فوق كتفيه. لم تسمع بداية الحديث... لكنها رأت قاسم يفتح حقيبة سوداء ويضعها فوق الطاولة. فتحها بهدوء... فلمعت رزم الأموال داخلها. تسمرت في مكانها. مد والدها يده إلى الحقيبة، بينما قال قاسم بصوت بارد لا يحمل أي انفعال: – الاتفاق انتهى... ومن اللحظة دي ليان مسؤوليتي. أغلق الحقيبة، ودفعها باتجاه والدها. نظر الأب إلى الأموال لثوانٍ، ثم أمسكها... دون أن يتردد. في تلك اللحظة... شعرت ليان أن قلبها توقف عن النبض. لم تصرخ... ولم تبكِ... اكتفت بالنظر إلى المشهد، وكأنها ترى والدها يبيعها بيديه. تراجعت خطوة إلى الخلف وهي تضع يدها فوق فمها حتى لا يسمع أحد شهقتها. ومنذ ذلك اليوم... اختفى والدها. وفي صباح اليوم التالي، أخبرها الجميع أنه سافر إلى الخارج. رحل... وأخذ معه المال... وتركها وحدها تواجه المصير الذي رسمه لها. عادت ليان من ذكرياتها على صوت شهقة خرجت منها دون إرادة. انسابت دموعها على وجنتيها وهي تهمس بمرارة: – حتى أنت يا بابا... بعتني... ومشيت. ثم نظرت نحو الباب المغلق، واشتعل الغضب في عينيها. – يمكن دفعت تمني... لكن عمرك ما هتقدر تخليني أكون ملكك... يا قاسم. مساءً طرقت إحدى الخادمات الباب بخفة دخلت وهي تحمل صينية الطعام: – اتفضلي يا هانم... لازم تاكلي حاجة. لم تلتفت إليها ليان، وبصوت مبحوح من البكاء قالت: – خديها. – يا هانم... لو عرف الباشا إن حضرتك ماكلتيش... التفتت إليها ليان بعينين حمراوين يملؤهما التحدي: – قولي للباشا... إنه ياكله هو، مش عايزة. ارتبكت الخادمة، ثم حملت الصينية وخرجت مسرعة بخطوات مرتبكة. في الطابق السفلي... كان قاسم يجلس في مكتبه الفخم، يراجع بعض الملفات المهمة على مكتبه الخشبي. طرق محمود باب المكتب بخفة. – ادخل. اقترب الرجل في حذر، وبصوت متردد قال: – الباشا... الهانم رفضت الفطار... والغدا... ولسه الخادمة راجعة بصينية العشا كمان. لم يرفع قاسم رأسه من الأوراق، وقال ببرود شديد لا يعكس ما يدور بداخله: – سيبوها. أخفض محمود رأسه بسرعة وغادر فورًا. عاد الصمت الثقيل إلى المكتب. ظل قاسم يقلب أوراقه لدقائق طويلة، لكنه وجد نفسه يقرأ السطر نفسه للمرة الخامسة دون وعي. أغلق الملف بعصبية لم يعتدها من نفسه. وقف ببطء واتجه نحو النافذة الواسعة، لتستقر عيناه مباشرة على شرفة الجناح الشرقي. جناح ليان. همس لنفسه بصوت منخفض وخشن: – عنادك هيكسرك يا ليان... مش أنا. في الوقت نفسه.. كانت ليان تمسح دموعها بعنف شديد، كأنها تحارب ضعفها، ثم وقفت فجأة على أقدام مرتعشة. – لا... أنا لو فضلت قاعدة هنا هموت بالحيا. بدأت تنظر حولها بعينين متوترتين تبحث عن مخرج. باب الغرفة مقفول بإحكام من الخارج، لكن الأمل لمع في عينيها حين وقعت نظرتها على شيء آخر. اتجهت إليها بسرعة، فتحت الباب الزجاجي وخرجت إلى الهواء الطل وقفت على حافة السور وهي تنظر لأسفل بارتفاع مرعب المسافة كانت كبيرة ومخيفة، لكن بجوار الشرفة مباشرة كانت توجد شجرة ضخمة، تمتد بعض فروعها السميكة قريبة جدًا من سور البلكونة. ابتلعت ريقها بصعوبة بالغة، وقلبها يكاد ينفجر من الخوف. – ممكن... ممكن أقدر أنزل منها. وضعت قدمها فوق سور الشرفة، ورفعت الأخرى، مغمضة عينيها من شدة الرعب. وفي اللحظة التي مدت فيها يدها وأمسكت بأحد الفروع القوية... جاءها صوته من خلفها، هادئاً، مسترخياً، لكنه حمل بروداً جعل الدم يتجمد في عروقها ويوقف أنفاسها تماماً: – كملي يا ليان... أنا مستني أشوف هتقعي وتتكسري قبل ما أوصلك... ولا هالحقك أنا الأول؟ كانت أصابع ليان متشبثة بالغصن بقوة، وجسدها كله يرتجف من الخوف والبرد. تجمدت في مكانها فور أن سمعت صوته القريب خلفها، ليأتي صوته الهادئ كالصاعقة: – كملي... أنا مستني أشوف هتقعي قبل ما أوصلك... ولا هتلحقي تنزلي لوحدك. استدارت إليه في ومضة، وعيناها مشتعلتان بالغضب والرفض القاطع: – مش هفضل سجينة عندك! رد ببرود مخيف وهو يشير بيده نحو باب الشرفة الداخلي: – أنا مش همنعك... انتي اللي اخترتي الشرفة. يبقى كملي عقاب اختيارك لحد ما تهدي. ثم غلق الباب دون أن يمنحها فرصة أخرى للرد، ودخل إلى الغرفة الواسعة. وقفت هي مكانها تراقبه في حيرة وقهر. هل انتهى الأمر هكذا بكل سهولة؟ ولكن.. ما إن خطا داخل الغرفة حتى أمسك بمقبض الباب الزجاجي، وأغلقه بهدوء تام. ثم أدخل المفتاح في القفل.. وأداره. صدر صوت "الطقة" المعدنية واضحاً وحاداً في سكون المكان، ليعلن عن إغلاق محكم. اندفعت ليان نحو الباب كالطير المحبوس، وضعت كفيها المرتعفتين على الزجاج وصرخت بصوت يملؤه الوجع: – قاسم! افتح الباب! رفع عينيه إليها ببطء من خلف الزجاج الداكن، وكأن بينهما عالمين لا يلتقيان: – أنت اللي اخترتي الشرفة يا ليان. – يعني هتسيبني هنا في البرد ده؟! – طالما لسانك لسه بيعاند وراسه جبارة.. يبقى اهدي شوية وفكري. ضربت الزجاج بكفيها المرتعفتين بعنف: – قاسم! أنا بتكلم معاك! إياك تعمل كده! ظل ينظر إليها للحظات طويلة دون أن يرمش، ثم استدار بكل برود واتجه نحو الأريكة الوثيرَة وسط الغرفة جلس بكل هدوء، وفتح أحد الملفات أمامه، وبدأ يقرأ بتركيز، وكأنها غير موجودة بالمرة! مرت الدقائق بطيئة وثقيلة كأنها دهور. كانت نسمات الليل تميل للبرود ويتحول إلى لسعات لا ترحم. ليان كانت تضرب على الزجاج مرة، وتصرخ باسمه مرة، ثم تسكت لتعود إلى البكاء بصمت. وبعد ساعة كاملة من المحاولات اليائسة.. خارت قواها. جلست على أرضية الشرفة الباردة، ودمعتين حارقتين سالتا على وجنتيها، وضمت ركبتيها إلى صدرها لتحمي نفسها من الهواء. كانت ترتجف بشدة.. ليس فقط من برودة الطقس، بل من قهر العجز المطلق الذي يلتف حول عنقها. بينما كان هو، جالسًا في دفء الغرفة، يسمع كل شهقة بكاء وكل صوت يخرج منها.. ولا يتحرك ساكناً. كان ينتظر شيئاً واحداً فقط.. أن ينكسر هذا العناد الصلب بنفسه دون تدخل منه. مر أكثر من ساعة أخرى في صمت مطبق. توقف صوت طرقها على الزجاج، وانقطع صراخها وبكاؤها تماماً. رفع قاسم رأسه عن الملف الذي أمامه، ورمى الأوراق جانباً. وقف بخطوات هادئة ومدروسة، واتجه مباشرة نحو باب الشرفة. أدار المفتاح ببطء شديد حتى فتح الباب، وخرج إليها بهواء الليل البارد. كانت جالسة على الأرض المنكمشة، تضم ركبلتيها إلى صدرها، وقد غلبها النوم تماماً من شدة الإرهاق والبكاء. آثار الدموع كانت لا تزال مرسومة بوضوح على وجنتيها المحمرتين، وخصلات شعرها المبعثرة تتحرك برقة مع نسمات الليل. وقف يتأملها طويلًا في صمت، ونظرة في عينيه تجمع بين اللوم العميق وشيء أشبه بالحنان الخفي. تنهد بصمت ثقيل. انحنى ببطء شديد، وحملها بين ذراعيه بحذر مبالغ فيه، كأنه يخشى أن تنكسر زجاجته الرقيقة بين يديه. لم تستيقظ من نومها العميق بسبب الإرهاق. بل تمتمت بكلمات غير مفهومة بصوت ناعس وهي نائمة "بكرهك" قبل أن تدفن وجهها دون وعي في صدره الدافئ، هاربة من برودة الجو الخارجي. توقفت خطواته للحظة طويلة عند مدخل الغرفة. نظر إليها وهي في حضنه في صمت مطبق.. ثم أكمل طريقه بخطوات بطيئة إلى السرير الكبير. وضعها فوق الفراش برفق شديد، وسحب الغطاء الصوفي حتى كتفيها بعناية. ظل واقفاً بجوار السرير لدقائق. رفع يده ببطء وتردد واضح.. ثم مرر أصابعه الدافئة بين خصلات شعرها المبعثرة برفق، وكأنه يلامس أغلى وأثمن شيء امتلكه طوال حياته. ابتسم ابتسامة باهتة وحزينة، لا يعلم سرها غير هذا الليل الصامت. استدار مغادرًا الغرفة بخطوات صامتة. لكن قبل أن يغلق الباب خلفه تماماً.. التفت إليها نظرة أخيرة. كانت نائمة بسلام لأول مرة منذ أن وطأت قدماها هذا القصر. ابتسم ابتسامة خفيفة مليئة بالشجن، ثم أغلق الباب خلفه بهدوء تام، وظل واقفًا لثوانٍ طويلة في الممر المظلم، وعيناه معلقتان بمقبض الباب، كأنه يقاوم رغبة عارمة تدفعه للعودة إليها والاطمئنان مجددًا. أغمض عينيه بقوة، ثم استدار واتجه بخطوات ثابتة نحو مكتبه العزل في آخر الممر يتبع