سيف ومريم ج١
حكاية سيف ومريم
حصرى على بيدج روايات منال عباس
الاول
أنا عمري ما كنت أتخيل إن أختي اللي كنت بحكيلها كل أسراري هتبقى هي السبب في إن حياتي كلها تتقلب في يوم وليلة
اسمي مريم وكنت مخطوبة لواحد اسمه كريم
كريم كان بالنسبالي كل حاجة حلوة في الدنيا وكان دايما بيطمني ويفهمني ويحسسني إني أغلى واحدة عنده
وأكتر حاجة كانت مفرحاني إن عيلته كانت محترمة ومعروفة والكل كان بيتمنى يقرب منهم
لكن كان عند كريم أخ أكبر اسمه سيف
وسيف كان عكس كريم تماما
راجل هادي بشكل يخوف ومبيتكلمش كتير ونظرته لوحدها كانت كفيلة تخلي أي حد يسكت
وكان معروف في البلد كلها إنه بيكره الستات ومبيثقش في أي واحدة
حتى الناس كانت بتقول إن مفيش ست قدرت تقرب منه أو تخليه يغير رأيه في الجواز
وأنا عمري ما اهتميت بكلام الناس عنه
لأن ببساطة هو أخو خطيبي ومش بيني وبينه أي حاجة
لحد اليوم اللي أختي فيه بدأت تتغير
أختي اسمها داليا وكانت أصغر مني بسنة
من وإحنا صغيرين وهي بتحب تقارن نفسها بيا
لو اشتريت هدوم تشتري شبهها
لو حد مدحني تسكت وتغير الموضوع
ولو حد قال إني أحسن منها في حاجة كانت بتضحك وتقول
مريم محظوظة بس
وأنا كنت بعتبر ده غيرة أخوات عادية
مكنتش أعرف إن الغيرة دي كانت بتكبر جواها لحد ما تحولت لحقد
في يوم كنت قاعدة معاها في أوضتي وبحكيلها عن كريم
وقلتلها وأنا بضحك
كريم قالي النهاردة إنه نفسه نحدد ميعاد الفرح
بصتلي داليا وسكتت شوية
وبعدين قالتلي
مبروك يا مريم
لكن صوتها مكنش فيه أي فرحة
أنا ملاحظتش
وكملت كلامي بحماس
تخيلي بقى إني هبقى مرات كريم
ابتسمت ابتسامة غريبة وقالت
آه
مرات كريم
ومن يومها بدأت أحس إن في حاجة غلط
داليا بقت تتردد على بيت كريم وأهله بحجج غريبة
مرة تقول ماما طلبت منها حاجة
ومرة تقول إنها كانت معدية من هناك
ومرة تدخل تتكلم مع كريم لوحدهم بحجة إنها محتاجة تسأله عن حاجة
وأنا كنت بثق في أختي
لدرجة إني مكنتش بتخيل للحظة إنها ممكن تعمل حاجة تضايقني
لحد ما في ليلة واحدة كل حاجة انهارت
رجعت البيت لقيت أمي قاعدة ووشها متغير
أول ما شافتني قالت
مريم تعالي اقعدي هنا
قلبي وقع
وقلتلها
في إيه يا ماما
بصتلي وهي بتتنهد وقالت
كريم فسخ الخطوبة
حسيت إن الدنيا وقفت
قلت لها
إيه
ليه
فين كريم
ماما مردتش
وفي اللحظة دي دخلت داليا
وكان شكلها غريب جدا
