ثريا
النيابة أكدت إن ثريا صرفت مبلغ كبير جداً بعد وفاة عم طاهر في السر. ده في حد ذاته مكنش الج/ريمة الكبرى، المصيبة ظهرت لما فتشوا في سجلات الصيدلية وتتبعوا الرسائل مع شخص كان بيوفر لها أدوية ومواد كيميائية برة العلاج المكتوب في مستشفى الجلاء.
تقرير الطب الشرعي والخبراء أكد إن عم طاهر اتسقى على مدار أسابيع مواد وأدوية بجرعات تسببت في فشل عضلة القلب ووفاته.
جاني هبوط وجالي غثيان أول ما عرفت.
كريم جوزي مكانش يعرف أي حاجة لسة.
ودي كانت أصعب وأمر لحظة في القصة كلها.
تاني يوم، النيابة استدعت كريم وهشام. أستاذة أمل كانت حاضرة، وأنا كمان كنت معاهم.
لما وكيل النيابة حط قدامهم صور البولايص، الفواتير، وتقرير الطب الشرعي وإقرار نيرة.. الأثنين اتسمروا في أراضيهم ومحدش قدر ينطق بكلمة.
— الكلام ده أكيد فيه غلط — هشام قالها وصوته بيرعش — أمي ثريا مستحيل تعمل كده!
وكيل النيابة حط ورقة ثانية قدامه:
— مرتك أدلت بأقوالها، وقالت إنها زقتها من على السلم لما واجهتها بالورق ده.
هشام قام وقف:
— نيرة لسة في غيبوبة!
بصيت له وقلت بصوت واطي:
— لأ يا هشام.. نيرة فاقت من أيام.
وقف مذهول:
— إيه؟!
— خبينا عشان كانت خايفة على حياتها حتى وهي في المستشفى.
كريم بصلي وهو مش مصدق:
— أنتِ كنتِ عارفة يا مريم؟
هزيت رأسي:
— هي اللي اترجتني أسكت لحد ما النيابة تاخد أقوالها.
بعدها بساعات، ثريا جابوها للتحقيق.
أنكرت كل حاجة. قالت إن نيرة طول عمرها بتكرهها وبتروج إشاعات، وأن الوقعة كانت حادثة، وأن البولايص دي كانت مجرد “تأمين لمستقبل الولاد”.
لما سألوها عن الأدوية الغريبة اللي كانت بتشتريها لعم طاهر، قالت إن فيه تلخبط. ولما واجهوها بالرسائل مع اللي بيوفر لها العلاج، قالت “مش فاكرة”.
ولما عرفت إن نيرة فاقت وبصحتها.. دموعها وقفت فجأة.
وشها اتغير 180 درجة، والماسك اتقلع.
— الست دي طول عمرها بتكرهني وعاوزة تخرب البيت — قالتها ببرود يرعب.
هشام كان واقف في الممر وسامعها.. دخل عليها والدموع في عينه:
— متجبيش سيرة مرتي على لسانك!
ثريا حاولت تقرب منه:
— هشام.. يا ابني…
— متقوليليش يا ابني! — صوته اتكسر — أنا دافعت عنك طوال عمري! لما حد كان يقول كلمة عنك كنت أقف في وشه وأقول دي أمي اللي ربتني! لما أبايا مات شلتك على راسي عشان خدمتيه.. وتطلعي في الآخر بتموتيه بالبطيء؟!
