سيف وليلىى
ـ الحق يا سيف، أمك بتموت!
ـ برضه نزلتي من غيرها؟ مش قولتلك خليها تنزل عشان تجهز الأكل؟
= يوووه وأنا مالي، ابنك هو اللي قالي انزلي جهزيه إنتي.
ـ ده إيه ده؟ اشمعنا بقى إن شاء الله؟ والشملولة مراته منزلتش هي ليه؟
= أصلهم خارجين.
ـ هو اللي قالك كده يا بت؟
= لا، بس كانوا بيجهزوا، أكيد يعني خارجين مش محتاجة ذكاء.
ـ امم… وبعدين مع بنت فاطمة؟ هو كل شوية خروجات؟ ما كان لسه مخرجها الأسبوع اللي فات! لااا، البت دي مش هتعمر معانا، أنا عارفة من الأول.
= ده حتى مفكرش ياخدنا معاه، وهو عارف إننا مش بنخرج خالص.
ـ قوة قلبه علينا! بنت فاطمة بقت عايزاه ليها لوحدها.
= طيب وهنعمل إيه؟ أنا نفسي أخرج، زهقت وأنا قاعدة بين أربع حيطان.
مردتش عليها كوثر، وكان باين عليها إنها بتخطط لحاجة في دماغها.
= سكتي ليه يا أمي؟ يعني معقول هتسيبي البت دي تخرج وتنبسط وإحنا نفضل قاعدين كده؟
ـ وإنتي تعرفي عن أمك كده برضه؟
= بجد؟ طيب ناوية تعملي إيه؟
ـ ركزي معايا في كل كلمة هقولها، مش عايزة غبائك يدمر الدنيا وبنت فاطمة تنتصر علينا.
ـــــــــــــــــــــــــــــــــــــــــــ♡…
ـ طب أعمل إيه في جمال أمك ده؟ أشيلك يعني في شوال وأمشي بيه؟
= ههههه… طب قولي إيه رأيك بقى؟
ـ قمر طبعًا، هو أنا ممكن أقول غير كده؟ عشان كده هيتغير حالًا.
= إيه! حرام عليك بقى يا سيف، أنا كده خلصت كل الفساتين اللي عندي.
ـ بسيطة، أطلب لك فستان تاني يجيلك لغاية عندك.
= بجد؟ ضحكتني! إنت عارف عايزنا نتأخر أكتر من كده؟
ـ أعمل إيه؟ إنتي اللي كل يوم بتحلوي أكتر.
= يا سيف بقى! ده أنا مصدقت إنك خدت إجازة عشان تخرجني، وبعدين ده أنا مش حاطة ولا نقطة ميكب.
ـ وإنتي تقدري تحطي أصلًا؟ ده أنا كنت دفنتك مكانك.
= لا طبعًا، هو أنا أقدر! بس يلا بقى والنبي، الساعة بقت 10.
ـ يلا يا آخِر صبري.
ـــــــــــــــــــــــــــــــــــــــــــ♡…
غادة كانت مواربة باب الشقة وباصة من فتحة صغيرة، أول ما شافت ليلي وسيف نازلين قفلت الباب براحة وبعدت عنه بسرعة وقالت بصوت يشبه الهمس لكوثر اللي كانت واقفة في المطبخ مستنية إشارة منها:
ـ نازلين… نازلين.
أول ما قالت كده، كوثر نامت بسرعة على الأرض كأنها مغمى عليها.
أول ما سيف وليلي قربوا من الشقة، فتحت الباب مرة واحدة وهي راسمة الخوف المزيف على وشها:
ـ الحق يا سيف، أمك بتموت!
