سيف وليلىى
ـ دي مراتي، لكن إنتي أمي… إزاي فاكرة إن ممكن أي حد ياخد مكانك في قلبي؟ بس الحقيقة إنك مصرة تاخدي ليلي كعدو ليكي ليه؟ على الأقل اعتبريها زي غادة… ولا ده صعب عليكي؟ ولا هي عشان بقت مرات ابنك يبقى لازم نتحكم ونزعق ونهين فيها عشان ساعتها حضرتك متحسيش إنها واخداني منك؟
= بس أنا أمك، ولازم أي حاجة أقولها تنفذها من غير تفكير ولا اعتراض.
هز رأسه بقلة حيلة، وهو متأكد إنه مهما يتكلم معاها مفيش فايدة… قرب من ليلي، مسك إيديها، وخرجوا من الشقة وطلعوا تاني شقتهم.
ـــــــــــــــــــــــــــــــــــــــــــ♡…
أول ما قفل الباب وراهم، سيف ساب المفاتيح تقع من إيده كأنها تقيلة عليه… وبدون أي كلمة، اتجه ناحية الكنبة وقعد، وببطء سند راسه على رجلين ليلى…
= سيف… مالك؟
بصتله بقلق وهي بتحط إيدها على شعره تمسده بهدوء
— أنا تعبت يا ليلى… تعبت بجد…
صوته كان مكسور، ودموعه بدأت تنزل من غير ما يحاول يخبيها
= يا حبيبي… بصلي
حاولت ترفع وشه ليها لكنه رفض، فمسكت إيده بإيدها الاتنين
— أنا مش فاهم… ليه ماما كده؟ ليه كل مرة تحسسني إني مقصر… أو إني وحش… حتى وأنا بحاول أرضيها؟
ليه دايمًا بتكسر فرحتي؟ حتى وإنتِ معايا…
= سيف…
نزلت تبوس راسه بحنية
إنت مش مقصر… ولا وحش… إنت بس طيب زيادة، وبتحاول تراضي ناس مش عايزة ترضى.
— بس دي أمي… المفروض تبقى أول واحدة تقف في ضهري… مش أول واحدة تكسره
= وأنا؟
قالتها بصوت هادي، لكن فيه عتاب بسيط
أنا مش في ضهرك؟
سكت لحظة… ودموعه زادت
— إنتِ كل حاجة حلوة في حياتي… بس أنا مش عايز أكون السبب إنك تتأذي منها…
= بصلي بقى
رفعت وشه بإيدها برفق لحد ما عيونه جت في عيونها
أنا اخترتك… واخترت أعيش معاك بكل ظروفك… الحلوة قبل الوحشة
ومامتك مهما عملت… عمرها ما هتقدر تاخد منك حاجة إنت مش سامح بيها
— بس وجعها بيوصل… غصب عني
= عارفه…
مسحت دموعه بإيدها
بس مش كل وجع لازم نفضل شايلينه… في وجع بنسيبه… عشان نعرف نكمل
— وأنا أعمل إيه؟
= خليك زي ما إنت… بس حط حدود
حبها… بس متخليش حبك لنفسك يضيع
وحطني أنا كمان في حسابك… مش دايمًا نتحمل عشان نسكت… ساعات بنسكت عشان نهدى… وبعدين نتكلم
بص لها شوية… وهدو صوته
— أنا محظوظ بيكي… رغم كل حاجة
= لا… إحنا اللي محظوظين ببعض
ابتسمت له ابتسامة دافية
وأي حاجة تهدك… أنا هنا أسندك… مش تشيل لوحدك
(غمض عينه وهو لسه على رجلها، وكأنه لقى راحته أخيرًا)
— متسبنيش يا ليلى…
= عمري ما هسيبك… طول ما إحنا بنقوي بعض… مش بنكسر بعض.
♡
