عملت تحليل dna واكتشفت انهم مش ولادها
تخيّل تروح تعمل تحليل (DNA) عشان تثبت نسب أولادك، فالتحليل يقول إن هما مش أولادك، فتتحول الق.ضيّة لواحدة من أكبر الألغاز الطبية والقانونية.
الست اللي في الصورة دي قضيتها خلت العلماء والمحاكم تُعيد النظر في موضوع إن الـ DNA عمره ما بيغلط، لدرجة إن قصتها بقت تدرس في مناهج الطب الشرعي!
سنة (٢٠٠٢) في واحد من مكاتب الرعاية الاجتماعية الموجود في ولاية واشنطن الأمريكية، دخلت واحدة اسمها (ليديا فيرتاشيلد) عمرها كان ٢٦ سنة.
دخلت ليديا المكتب، وطلبت من الموظف يقولها على الإجراءات المطلوبة؛ عشان تقدر تحصل على المعونة الحكومية؛ وده لأن عندها طفلين، وعلى وشك ولادة التالت، وكمان هي منفصلة عن زوجها وظروفها المادية صعبة جدًا، وهي في أمسّ الحاجة للمعونة دي.
الموظف أخد بياناتها، وقالها على الإجراءات المطلوبة، واللي كان أهمهم، هو عمل تحليل حمض نووي DNA.
وكمان طلب منها تجيب مسحة من الفم والدم ليها، ولأولادها الاتنين ولزوجها، وده إجراء روتيني بيتعمل لإثبات النسب، وكمان عشان يلزموا جوزها يدفعلها نفقة.
بالفعل قدمت ليديا كل الأوراق المطلوبة، ومعاها مسحة الفم والدم بتاعتها وبتاعت أولادها.
وبعد كام أسبوع، تتفاجيء ليديا باستدعاء عاجل من النيابة!
راحت وهي فاكرة إنهم باعتين ليها؛ عشان تكمل باقي إجراءات المعونة.
لكنها تتفاجيء بالصدمة، محققين مستنينها، وكلامهم معاها كان حاد جدًا، وبيسألوها: انتي مين وجبتي الأطفال دول منين؟
وده لأن نتيجة تحليل الحمض النووي بتقول إن فعلًا الأب هو أبوهم البيولوجي، لكن تحليل الحمض النووي بتاع ليديا كانت صفر في الميه، يعني هي ولا أمهم ولا ليها علاقة بيهم!
ليديا سمعت الكلام ده وكانت في حالة صدمة وذهول؛ وده لأن الموضوع اتحول من طلب معونة لق.ضية جنائية كبيرة جدًا.
واتوجهلها اتهامات تودي ورا الشمس، منها تزوير وثائق رسمية، واحتيال على أموال الدولة عن طريق إنها جابت أطفال مش ولادها عشان تاخد معونة مش من حقها، وكمان اشتباه إنها خطفاهم أو بتتاجر في البشر!
في الوقت ده، بيطلب المدّعي العام في دعوى قضائية انتزاع الأطفال الاتنين منها، وإيداعهم في دار رعاية.
ليديا كانت بتبكي للمحققين، وجابت شهادات الميلاد بتاعت ولادها وصور من الحمل، وفواتير المستشفى اللي ولدت فيها، لدرجة إنها جابت الدكتور اللي ولدها يشهد معاها في النيابة، لكن كل ده كان بلا قيمة قصاد نتيجة تحليل الحمض النووي اللي قال بشكل قاطع: إن هي مش أم الأولاد دول، وإن الأوراق عادي ممكن يتم التلاعب فيها، لكن التحليل عمره ما بيغلط.
