بلوك

بصتلي بقرف وسابتني وطلعت، وأنا ضحكت وبصيت للسقف، فكرة إني عشان بحب واحد أسمحله يتخطّى كل الحدود اللي أنا رسماها لِـ نفسي دي مش بتنزلي من زور!..

…….

•الحقي الحقي
-في ايه؟!

كنت لسة صاحية من النوم، قعدت ومسحت وشي، بصتلها و..

-عايزة ايه؟!
•يونس برا
-اتنهدت: طيب

كنت هرجع أنام تاني بس صرخت بخضة لما شدتني من على السرير..

•بقولك يونس براا، قومي البسي
-قمت وزقيتها: ألبس ليه يا حيو’انة انتي، أنا مالي!
•سكتت: إيدا، هو أنا مقولتلكيش!!!
-ضيقت عنيا: مقلتيش ايه؟!
•اتراجعت: يونس.. جاي يتقدملك

ثانية، والتانية، وقمت أتنطط مش مستوعبة اللي هي بتقوله، هي بتهزر!!!

-بتهزري صح؟!
•لا والله، أنا بس نسيت أقولك

حدفتها بالمخدة بغيظ وزقيتها برا، وبدأت أجهّز نفسي، و.. النهاردة فرحي يا جدعان.. فرح إيه دلوقتي بس!..

……

*تاخدي ورد؟!
-مش عايزة

كنت بحاول أبان ثابتة، جامدة، مش هتأثر بحركاته القمر ولا ببدلته الكحلي اللي خطفت قلبي دي لأ!..

حط الورد قصادي على الترابيزة واتعدل، اتحمحم و..

*بصي يا ست الناس، أظن انتي عارفة كل حاجة عني، انا يونس، وعندي 29 سنة، مدرس انجليزي وخطبت مرة قبل كدا ومحصلش نصيب، ليا شقة لوحدي و.. بس كدا
-خدت نفس طويل: مواظب على الصلاة؟!
*الحمد لله، بصلي كل فرض في وقته
-حافظ حاجة من القرآن؟!
*اتحمحم: بصراحة، حافظ الرُبع بس
-ابتسمت: تعرف حاجة عن ضوابط الخطوبة؟!
*ابتسامته وسعت: طبعًا، وأكيد هنلتزم بيها كلها عشان ربنا يباركلنا في حياتنا سوا، لو حصل نصيب يعني

ابتسامة غبية اترسمت على وشي، ومرة واحدة ضحكت جامد، سكت و..

-حساك اتغيرت، مش انت يونس اللي فتحت دماغه من شهرين عشان كان هيمسك ايدي لا
*ضحك ولعب في شعره بتوتر: ما هو الظاهر ان الضربة دي هي اللي فوقتني، أنا مش عارف أنا كنت بفكر في ايه ساعتها، بس صدقيني ضربتك فوقتني لحاجات كتير أوي، (ضحك) لا والغُرزتين اللي خدتهم فوقوني أكتر.. (ابتسامته وسعت) خلوني افتكرت حديث النبي عليه افضل الصلاة والسلام (“لأن يطعن في رأس أحدكم بمخيط من حديد خير له من أن يمس امرأة لا تحل له” رواه الطبراني والبيهقي)

معرفتش أرد، وابتسامة كبيرة اترسمت على وشي، هو أنا ينفع أقوله إني بحبه بقى!!..

-احم، ردي هيوصلك مع خالتو