بلوك

-إرزعيه بلوك علىٰ الفيس والواتس والانستا واقفلي الفون وأكيد لو بيحبك هيكلمك
•بتريقة: وياترى هيرن عليّا من التكييف ولا من التلاجة؟!
-نينينينييي، من الساعة أكيد
•يا بايخة، قومي من وشي يا بت، أنا غلطانة إني حكيتلك على حاجة
-ضحكت: ما انتو عايزين تضّربوا بصراحة، أمركم عجيب جدًا

لفّت وشها بعيد فـ ضحكت..

-متتقمصيش يا بيضة، خلاص حقك عليا
•ملكيش دعوة بيا بقى
-كشرت: خلاص أنا غلطانة، مش هقولك تصالحيه إزاي
•بتريقة: لا وانتي عايزانا نتصالح أوي
-أومـــال، انجزي بس روحي هاتيلي عصير قصب من عند عمو دا، وتعالي وأنا هقولك طريقة تصالحيه بيها جامد أوي
•مصلحجية حقير’ة
-بابتسامة: من بعض ما عندكم يا بيبي، يلا

زقيتها، وفِعلًا راحت تجيبلي عصير قصب، وأنا فضلت مستنياها برا، أنا سمية، عندي 24 سنة، خريجة فنون جميلة، بابا وماما متوفيين وأنا عايشة مع خالتي، ودي رنا، بنت خالتي اللي قارفاني في حياتي هي وجوزها اللي مطلّع عينها.. بالمناسبة، هما كاتبين الكتاب بس، عقبال ما يتكتب كتابي على أخوه!..

……

•اتفضلي يا ستي، ابهريني بقى
-عيّطيله
•نعم!!
-عيطيـله
•ابتسمت بغباء: أيوا إزاي يعني؟
-زي الناس، يا حبيبتي الراجل بيبقى مُقتنع إنك انتي اللي غلطانة لحد ما تعيطي، ساعتها هو تلقائيا هيبدأ يعتذر حتى لو معملش حاجة
•بس..
-أنا قلتلك على اللي فيها، اسكتي بقى وخليني أشرب القصب بتاعي
•تفتكري هنتصالح؟!
-لا، هتفركشوا

بصتلي بقرف ودغزتني، فـ تجاهلتها وكملت العصير بتاعي، أنا مش ناقصة مُحن مرتبطين أنا..

…….

-متعرفيش يونس عامل إيه؟!، بياكل كويس؟!، صحته كويسة؟! بيـ..
•قاطعتني: ايـــــه؟! هو كان من بقية أهلي!!
-ضيقت عنيا: هو مش أخو جوزك يا بت انتي؟!
•خلاص روحي كلميه انتي
-و’اطية من يومك، غوري من وشي

نفخت وفضلت مكاني، هي عارفة زي ما أنا عارفة إني مش هقدر أكلمه، أكلمه إزاي وأنا فاتحاله دماغه من شهرين!!.

•بغيظ: منتي لو بتفهمي مكنتيش ضربتيه!، بالمج يا سمية!! بالمج يا مُفترية؟!
-يعني انتي عايزاه ييجي يقولي بحبك وعايز أرتبط بيكي وأتعرف عليكي وأسيبه!!، دا كان هيمسك إيدي
•دغزتني بغيظ: ما كنتي تسيبيه يمسكها
-بقرف: ما كنت آخده بالحضن بالمرة!
•وليه لأ!!، هو مش دا حبيب القلب!
-اتنهدت: حبيب القلب وكل حاجة، بس مش بالشكل دا، يونس غريب عني، واللي ينطبق على أي راجل ماشي في الشارع ينطبق عليه، يعني ولا ليه إنه يتكلم معايا، ولا إني يفكر يلمسني حتى، ببساطة.. طول ما هو مش جوزي أنا لا يُمكن أكلمه، وبعدين هو مش طالع مؤدب ومحترم لأخوه ليه!!
•ملكيش دعوة بأخوه يا بت.. وبعدين أثّرتي فيا بجد، استمري
-متتريقيش
•ضحكت: مش بتريق، بس بحبك وانتي عاقلة وبتفكري بهدوء كدا
-أومال يا بنتي، دا احنا جامدين جدًا.. يلا قومي هاتيلي طبق مكرونة بشاميل من اللي جوا دي، انجزي عشان جعااانة
•يا شيخة ربنا يكون في عون اللي هياخدك
-ربنا يكون في عون أخو جوزك القمر بقى