خط احمر بقلم اماني السيد 1

جوزى اتجوز واحده تانيه وانا كنت راضيه وموافقه وماعنديش مشكله خالص بالعكس بجوازه المسؤلية والطلبات خفت عليه شويه وبطلنا نعمل خناقات مع بعض لان قبل جوازه كنا دايما فى مشاكل وكل شويه اغضب عند اهلى المهم رضيت بالأمر الواقع قولت اهم حاجة انى أفضل على زمته عشان خاطر البنتين وإن محدش يجيب سيرتى وانا كده كده بشتغل وليه حياتى بعيد عنه قصص وروايات أمانى سيد مرت الايام وكان بيجلنا كل أسبوع يوم او يومين بصراحه بينى وبين نفسى كنت بستغرب مراته التانيه دى عامله ازاى وازاى مستحملاه ده اليوم اللى بيجيلى فيه بيبقى قالب وشه حتى الفلوس كان بيدينى مصروف يا دوب بيكفى اسبوع وانا اللى شايله مسئوليه الاولاد والاكل والشرب لحد ما فيوم كنا معزومين عند والدته وشوفت الصدمه هناك فضلت مطمنة لهدوء حياتي الجديدة.. لحد ما فيوم جاتلنا عزومة عند والدته. روحت أنا والبنتين، وأول ما دخلت لقيت البيت مليان بقرايبه، وزحمة وضحك وكلام. قعدت في وسطهم انا وبناتى ، وبحافظ على ابتسامتي الهادية المعتادة عشان شكل البنات قدام عيلتهم، لحد ما الباب اتفتح.. ودخل هو وهي. هنا كانت الصدمة اللي وقفت الدم في عروقي! شفت راجل تاني خالص غير اللي بيجيلي؛ دخل وهو بيعامل مراته الجديدة أحسن معاملة، عينه عليها بلهفة واهتمام، بيكلمها بحنية وبيدللها قدام الكل. قعدت وسطنا بكل ثقة والضحكة مش بتفارق وشها، وشوية وبدأت تتباهى بيه وبكرمه وصوتها مسمع الصالة كلها وهي بتقول: "ده بجد مش مخليني نفسي في حاجة خالص، ومبيرفضليش طلب.. وازاي بيصرف ويجيب!".. ومسكت رقبتها بكل فخر وهي بتورينا كوليه دهب بيلمع وقالت: "شوفوا.. ده لسه مشتريهولي من أسبوع واحد بس لما شافني معجبة بيه". في اللحظة دي، حسيت كأن الحيطة اتهدت فوق دماغي. وافتكرت شكل المصروف اللي بيبهدلني بيه كل أسبوع وهو بيقولي "الدينا غالية ومعيش"، واكتشفت إن البخل والوش الخشب مكانش بسبب ظروف الحياة.. ده كان بخل مشاعر وماديات عليا أنا وبناتي بس، والخير كله رايح هنا نزلت الكلمات عليا زي المية الساقعة وأنا قاعدة مكاني مش قادرة أتحرك، وعيني مش قادرة تنزل من على الكوليه الذهب اللي في رقبتها. الصدمة كانت لسه ملجماني، لكن اللي جاي كان أصعب بكتير. وسط كلامها وتباهيها، لفت وشها ناحيته بدلال وقالت بنبرة رقيقة مسمعة الكل: — "حبيبي، الجو حر قوي هنا.. ممكن تجيب لي كوباية عصير ساقعة من المطبخ؟" لقيت رد فعله خطف روحي.. ابتسم في وشها بحنان وقام فوراً وهو بيقول لها: "من عيوني يا حبيبتي، ثواني ويكون عندك." في اللحظة دي، عيني راحت على بناتي اللي كانوا قاعدين جمبي.. البنتين اتسمروا مكانهم، عيونهم كانت واسعة من الذهول ومش مصدقين اللي شايفينه! أبوهم اللي عمرهم ما شافوه بيشيل كوباية من مكانها في البيت، أبوهم اللي لو طلب مية بيزعق ويقلب البيت لحد ما حد يروح يجري يجيب له، قايم بنفسه وبكل رضا ولطف عشان يخدم مراته الجديدة! شفت الكسرة والخزلان في عيون بناتي، وكأنهم بيسألوا نفسهم: هو ليه مش بيعاملنا كده؟ هو ليه مش بابا بتاعنا إحنا كمان؟ رجع من المطبخ وفي إيده كوباية العصير، قدمها ليها وهو بيطمن إنها ساندة مرتاحة. أخدت منه الكوباية، شربت بوق، وبمنتهى البرود لفت عينيها في الصالة وقالت وهي بتبص للبنات: — "تسلم إيدك يا حبيبي.. صحيح، أنا كنت عايزة كمان شوية مية ساقعة، وكمان منديل امشح ايدى من العصير.. خليهم بقى يقوموا يخدموني ويجيبوا الحاجات دي، مش كفاية أنت اللي قمت بنفسك الأول؟" التفت ناحية بناته، وبنبرة جافة وأمر، خالية تماماً من الحنية اللي كانت في صوته من ثواني، بص لهم وقال: — "قوموا يا بنات.. اسمعوا كلام طنط وشوفوا هي عايزة إيه واعملوه فوراً." بمجرد ما بناتي بدأوا يتحركوا عشان ينفذوا أمره، الدم غلي في عروقي وماقدرتش أسكت أكتر من كده. قمت بسرعة، حطيت إيدي على أكتافهم ومنعتهم يقوموا، وقعدتهم مكاني تاني، ووقفت أنا قدامهم. بصيت له في عينه مباشرة، نظرة كانت مليانة غضب مكتوم وقوة، وصوتي كان هادي بس رن في أرجاء الصالة وخلى الكل يسكت: "اقعدوا مكانكم يا بنات.. مفيش حد فيكم هيتحرك." لفيت وشي ناحيته، وبكل ثبات وبرود وكملت: "بص يا عابد، إنك تبقى خدام لمراتك وتعمل اللي هي عايزاه وتلبي طلباتها ده اختيارك وده قرار يرجعلك إنت، دي حياتك وإنت حر فيها. إنما بناتي؟ بناتي خط أحمر، ولا هما خدم ليها ولا هما خدامين عندك عشان تامرهم يخدموها. ولو فكرت بس تبصلهم بصة تضايقهم أو تحاول تضغط عليهم بكلمة زي دي تاني، وقتها أنا مش هيهمني لا كبيرة ولا صغيرة، ومش هيهمني حد في الدنيا دي." خيّم صمت رهيب على المكان، الكل كان باصص لي ومذهول، وحماتي وقرايبه كانوا في حالة صدمة من رد فعلي القوي اللي مكنش حد فيهم متوقعه، حتى هو بلم وعنيه وسعوا من المفاجأة، وكأن لأول مرة بيشوف "الست اللي كانت بتسكت وتعدي" قدامه بشكل تاني خالص. اتسعت عينه من الصدمة، وملامحه اتغيرت ١٨٠ درجة بعد ما كان قاعد متباهي وفخور، حس إن برستيجه اتهز قدام أهله ومراته الجديدة. وقف بغضب، وحاول يعلي صوته عشان يداري على كسرته ورعشته اللي كانت باينة، وزعق فيا وهو بيشاور بصباعه: — "أنتِ اتجننتي؟! أنتِ بتكلميني أنا كده قدام الناس؟! دول بناتي أنا.. بناتي وأؤمرهم زي ما أنا عايز، واللي هقوله هيمشي عليهم وغصب عن أي حد!" في اللحظة دي، الهدوء اللي جوايا اتحول لقوة مرعبة، ومبقاش في قلبي ذره خوف لا منه ولا من نظرات العيلة اللي حوالينا. قربت منه خطوة، وبصيت له في عينه بكل ثبات، وبنبرة صوت واضحة، حادة، ومسمعة الصالة كلها، قولت له: — "بناتك؟! بناتك دول لو أنت بتصرف عليهم، أو تعرف عنهم حاجة! لو تعرف هما في سنة كام، ولا بياكلوا إيه، ولا بيلبسوا منين! المصروف اللي بترميه لنا كل أسبوع وبتبهدلنا بيه، يدوب بيكفي عيش وحاف، وأنا اللي شايلة شقاهم ومصاريفهم من طقطق لسلام عليكم ! فمتقوليش بناتي وتعملي فيها أب هنا." حاول يقاطعني ووشه بيجيب ألوان، فرفعت إيدي في وشه وكملت بكل قسوة وعيني بتلمع بالتحدي: — "بقولك إيه.. لو ممسكتش نفسك ولميت الدور ده فوراً، قسماً بجاه الله ما هيهمني حد، وهفضحك وأجرسك قدام الكل هنا، وأطلع القديم والجديد.. فاهم يا عابد؟!" الكلمة نزلت عليه زي الصاعقة، والكل في الصالة كتم نفسه. مراته الجديدة لمت نفسها وبرقت، وحماتي وقرايبه بقوا يبصوا لبعض ومش عارفين يداروا ووشهم فين من الفضيحة والكلام اللي طلع، وهو وقف مكانه متسمر، عاجز عن الرد، ولأول مرة يشوفني بالمنظر ده. حماتي لما شافت الوضع هيتطربق فوق دماغ الكل، وعارفة مصايب ابنها وبخله وقِلة أصله معايا ومع بناته، خافت من الفضيحة قدام قرايبها ومراته الجديدة. قامت بسرعة من مكانها وجات عليا، وهي بتحاول تطبطب على كتفي وتلطف الجو، وقالت بصوت مسموع عشان تلم الليلة: — "صلوا على النبي يا جماعة.. مفيش حاجة مستاهلة، حصل خير يا منة يا بنتي، حقك عليا أنا، معلش الشيطان دخل بينكم. قوموا يا بنات اقعدوا جمب أمكم، ومحدش هيقوم من مكانه." أنا في اللحظة دي سكت.. سكت مش خوف، ولا تراجع، لكن سكت لأني قولت اللي أنا عايزاه ورجعت هيبتي وهيبة بناتي قدام الكل، وعرفتهم حجمهم الحقيقي. قعدت مكاني بكل برود وثقة، وأخدت بناتي في حضني، والهدوء رجع لملامحي من تاني.. بس كان هدوء ما قبل العاصفة. بصيت له وهو واقف بعيد، وشه جايب ألوان، وعينه مش قادرة تيجي في عيني من الكسرة والخزي، ومراته الجديدة قاعدة جمبه زي القطة البلّانة بعد ما كانت جاية تتمنظر وتتباهى بالكوليه الدهب. بيني وبين نفسي، أخدت القرار. قولت خلاص، لحد هنا وكفاية.. اللعب اللي فات ده كوم، واللي جاي كوم تاني خالص. الأيام الجاية أنا مش هسيب حق بناتي، ولا هرضى بالفتات اللي بيرميه كل أسبوع وهو عايش بالطول والعرض. وحياة كل لحظة كسرة شفتها في عيون بناتي وهو قايم يخدم الست دي، وحياة كل قرش شيلته من شقايا وتلعثم لسانه وهو بيقول "العيشة غالية".. لأخليه يلف حوالين نفسه، وأدفّعه تمن الكسرة والبخل ده غالي قوي، ومن غير ما أوسخ إيدي