ست أختفت في ظروف غامضة منقول

الست اللي في الصورة دي اختفت في ظروف غامضة ورجعت ظهرت بعد ١١ سنة؛ علشان تتكشف واحدة من أغرب قضايا الاختفاء اللي قلبت الرأي العام الأمريكي واللي نهايتها هتكون صدمة ليك.. بتدور الأحداث سنة (٢٠٠٢) في (أمريكا-ولاية بنسلفانيا) في منطقة هادية اسمها (ليتيتز) بيعيش فيها أسرة صغيرة مكونة من أربع أفراد. الزوج اسمه (لي هايست) وكان عمره في الوقت ده ٤٢ سنة، وزوجته (بريندا) وكان عمرها ٣٤ سنة، وكان عندهم طفلين بنت عمرها ٨ سنين، وولد عمره ١٢ سنة. حياة الأسرة كانت ماشية بشكل طبيعي وبدون أي مشاكل، لحد ما جات فترة وبدأت تحصلهم مشاكل مادية، واتراكمت ديون على الأسرة. وقتها حصل توترات كتيرة بين هايست وبريندا، ومشاكل أدت في النهاية إنهم ينفصلوا، وتم الانفصال بطريقة وديَّة. هايست قال لـ ليندا: إنه معندوش مشكلة، وهسيبها تعيش حياتها بالطريقة اللي تحبها، بس أهم حاجة تخلي بالها من ولادهم. وبالفعل تمت إجراءات الطلاق بدون أي مشاكل، وبعد كام يوم من الانفصال، تحديدًا يوم ٨ فبراير سنة (٢٠٠٢) خدت بريندا أولادها الاتنين ووصلتهم للمدرسة، وقالتلهم يخلوا بالهم من نفسهم، وإنها هتروح السوبر ماركت تجيب شوية حاجات، وهترَوّح تجهز الغدا، و أخر اليوم هترُوح تاخدهم، وفي نفس اليوم ده بريندا كان عندها ميعاد في جهة حكومية؛ علشان تخلص باقي إجراءات الطلاق. وينتهي اليوم الدراسي والأطفال مستنين أمهم تيجي تاخدهم، لكنهم خرجوا ملاقوهاش مستنياهم، ودي كانت أول مرة تحصل! فضلوا مستنين فترة طويلة لكنها بردو مظهرتش، وفي الآخر إدارة المدرسة اتصلت بالأب وبلغته: إن زوجته ماجتش تاخد الأولاد زي كل يوم ودي أول مرة تحصل. بسرعة الأب جه أخد الأطفال وهو معتقد إن ممكن بريندا تكون العريية عطلت بيها، أو حصل معاها أي مشكلة كانت هي سبب في تأخيرها. حاول يتصل بيها بس هي مكانتش بترد وتليفونها كان مقفول. والغريب لمّا وصل البيت، ودخل هو والأطفال شافوا منظر يُوحي إن في حاجة غريبة على غير العادة، الغسيل مرمي متغسلش، والغدا اللي المفروض كانت تحضره للأطفال محطوط في المطبخ من غير ما يستوي، كأن الحياة وقفت فجأة. في اللحظة دي حس إن في حاجة مش طييعية؛ فقرر ينزل يسأل عنها في المستشفيات اللي في المدينة جايز تكون عملت حادثة. وبالفعل فضل يلف على المستشفيات لكنه موصلش لحاجة. حاول يتصل بأصدقائها وقرايبها يمكن تكون عند حد فيهم، لكنهم أكدوا إن محدش شافها أو سمع عنها حاجة انهاردة. ومع دخول الليل كانت لسه مظهرتش؛ فاتحول الموضوع لذُعر للأب والأولاد، وهنا قرر يبلغ قسم الشرطة. وبالفعل قدم بلاغ اختفاء، وبدأت الشرطة تدوّر على بريندا في كل مكان ممكن تكون راحت فيه، يعدي تلت أيام بدون أي نتيجة، لحد ما نوصل لليوم الرابع وتحصل حاجة تحوّل مسار الق\ضية لاتجاه تاني.. الشرطة في اليوم ده لقوا عربية بريندا مركونة في واحدة من الحدايق العامة، وبعد تفتيشها لقوا فيها كل متعلقاتها الشخصية: البطاقة والمفاتيح، والفلوس، وكل حاجة تخصها. المشهد ده يدل قطعًا إن بريندا اتخطفت؛ لأن مفيش حد هيختفي بإرادته هيسيب كل متعلقاته. ومن هنا، الشرطة بدأت تتعامل مع الموضوع على إنه ق\ضية اختطاف، مش بس كده، ده كان فيه شكوك قوية إن السيناريو ده ممكن يكون انتهى بالـقـ..تـل. طبعًا لمّا الخبر انتشر في الصحف، بدأت الشرطة تعمل حملة بحث واسعة، استخدموا فيها كلاب مدربة على تتبع أثر الجثث والموتي، وطائرات بحث حراري تمسح الغابات والمسطحات المائية، وكمان خرج مئات المتطوعين؛ لمساعدة الشرطة والبحث عن بريندا في الغابات، وطبعوا آلاف المنشورات والصور ليها، واستمر البحث المكثف لمدة أسابيع بدون أي نتيجة. في الوقت ده اتجهت شكوك المحققين، إن الجاني شخص حافظ المنطقة كويس، وأخفي الج\ثة بإتقان شديد. ومع تزايد الشكوك دي بدأت تطلع إشاعات إن زوجها هو اللي قتلها؛ علشان ياخد فلوس التأمين. خصوصًا إن في اليوم اللي اختفت فيه، كان في مشاكل بينهم وانفصلوا، وبالتالي المشتبه الأول والوحيد كان هو هايست، ويتم القبض عليه رسميًا، وتبدأ الشرطة في التحقيق معاه. زادت الشكوك أكتر في الزوج لما خَضَع لاختبارات كشف الكذب الأولية وفشل فيها، فخضع بعدها لجلسات تحقيق مكثفة وقوية جدًا لفترة طويلة لكن ماكنش فيه أي دليل يدينُه. في خلال الفترة دي، جيرانه وأصدقائه قطعوا علاقتهم بيه؛ لأن الكل كان مقتنع إن هو اللي ورا اختفاء بريندا، لدرجة إنه كمان انفصل من شغله، لكن زي ما قولنا في النهاية ماكنش فيه أي دليل قوي يدينُه. وتعدي سنة ورا سنة، ومفيش أي تقدم في الق\ضية لحد ما نوصل لسنة (٢٠١٠) يعني بعد ٨ سنين من اختفاء بريندا، وطبقًا للقانون، تعلن المحكمة وفاة بريندا رسميًا وتصرف مبلغ التأمين لزوجها. في الوقت ده كان خلاص أولادها اتأقلموا على اللي حصل، وعاشوا حياتهم بشكل طبيعي، وهايست الأب كان اتزوج من ست تانية، وحياتهم كانت طبيعية لحد ما نيجي لسنة (٢٠١٣) وتحصل حاجة تقلب الرأي العام. في يوم من الأيام، وفي واحد من أقسام الشرطة، يتفاجأ أحد الضباط بواحدة داخلة عليه واضح إن هي من المشردين، هدومها متقطعة، ووشها مليان تجاعيد، وكان واضح إن حالتها الصحية سيئة جدًا. بدأ الضابط يسألها عن تفاصيل البلاغ اللي هي جاية تقدمه، لكنه يتفاجأ إن هي انفجرت من البكاء، وبدأت تحكي كلام غريب. وتطلع الست دي هي بريندا المختفية من ١١ سنة! قالتله وهي بتبكي: "أنا بريندا، وأعتقد أنني مُدرجة كشخص ميت ومفقود". الضابط استغرب من كلامها؛ لأنه لمّا عمل تحريات عنها لقى إن الاسم مُدرج في المحكمة ضمن قائمة الأموات والمفقودين فعلًا من ١١ سنة! وبسرعة، اتواصل مع المسؤولين اللي كانوا ماسكين الق\ضية، أخدوا بصماتها وكانت الصدمة، إنهم اتأكدوا فعلًا إنها بريندا. بريندا اللي الكل كان معتقد إن هي ج\ثة مدفونة من ١١ سنة، في مكان محدش يعرفه. لكن شكلها كان غريب ومتغير تمامًا. بدأ المحققين يستجوبوها؛ علشان يعرفوا هي كانت فين؟ فحكتلهم تفاصيل كانت صادمة للرأي العام. قالت بريندا: إن في اليوم اللي وصّلت فيه أطفالها للمدرسة، قعدت في واحدة من الحدائق وهي عمالة تبكي بانهيار من الضغوط النفسية اللي كانت فيها؛ بسبب الطلاق وخوفها من المجهول. وأثناء ماهي عمالة تبكي لقت تلت أشخاص قربوا منها: ست ومعاها اتنين رجالة، كلهم من المشردين، وبدأوا يتكلموا معاها ويعرفوا مالها، وهي بدأت تحكي ليهم على اللي بتمر بيه، وفي نهاية الكلام عرضوا عليها تنضم ليهم وإن همّا هيمشوا من الولاية دي خالص وهيروحوا ولاية تانية. والغريب إن هي مأخدتش وقت في التفكير، ووافقت فورًا وقامت مشيت معاهم، وقررت تسيب حياتها بالكامل، وتتخلى عن كل حاجة. راحت معاهم، وهناك عاشت في مجتمع المشردين، كانت بتنام في الشوارع والغابات، وتاكل من الزبالة، وأدمنت المخدرات، وكانت أحيانًا تشتغل في غسيل الأطباق أو أي حاجة تجيب منها فلوس ليومها، واستمرت على الحال ده لمدة ١١ سنة كاملة! لحد ما وصلت لمرحة إن المرض بقي في جسمها كله، وحالتها الصحية اتدهورت، ومبقتش حتي تقدر تشتغل أي حاجة، وده الوقت اللي قررت فيه تسلم نفسها. الشرطة عملت مؤتمر صحفي عرضت فيه كل التفاصيل دي. طبعًا الموضوع كان غريب وصدمة للرأي العام، لكن الأغرب هو كان رد فعل أولادها اللي كانوا في مرحلة العشرينات. الأولاد والزوج لمَّا عرفوا الكلام ده، رفضوا مقابلتها نهائيًا، لدرجة إن بنتها قالت: (إنها لا تشعر بأي مشاعر تجاه امرأة اتخلت عنها وهي عمرها ٨ سنين، وسابت أبوها يعيش جحيم وسط تحقيقات واتهامات بالقـ..تل، ونظرة المجتمع ليه كُونه شخص مش كويس لمدة ١١ سنة) لدرجة إن في برنامج شهير استضاف بريندا؛ علشان تتكلم عن الموضوع وفضلت تبكي وتطلب من عائلتها تسامحها. لكن ظهر الزوج و أولاده الاتنين في فقرة منفصلة و رفضوا تمامًا إنهم يقابلوا بريندا وجهًا لوجه في الاستوديو، أو يسامحوها على اللي هي عملته، ولحد اللحظة دي انقطعت علاقتهم بيها تمامًا، واعتبروها ماتت في سنة (٢٠٠٢). ✍️/ محمد المغربي