عاش حياته عشان يجيب حق مراته منقول

اللي قدامك في الصورة ده، شخص عاش حياته كلها؛ علشان يرجَّع حق زوجته، وعمل أغرب حاجة ممكن تتعمل على مدار ٢٦ سنة كاملة. الق\ضية بدأت سنة (١٩٩٩) لكن بسبب إصراره اتحل اللغز سنة (٢٠٢٦) واتقدم المجرم للمحاكمة، والقصة قلبت اليابان كلها. الحكاية بتدور في اليابان سنة (١٩٩٩) في حي اسمه (نيشي) كان بيعيش فيه أسرة صغيرة وبسيطة مكونة من تلت أفراد. الزوج اسمه (ساروتو تاكابا) وعمره كان ٤٣ سنة، وشغّال موظف في شركة عقارات، وزوحته (ناميكو) عمرها ٣٢ سنة، وكان عندهم طفل صغير عمره سنتين أسرة كانت حياتها عادية وهادية ومفيش فيها أي مشاكل، لحد ما نيجي ليوم ١٣ نوفمبر (١٩٩٩) وفي اليوم ده بيصحي ساروتو الساعة ٧ الصبح علشان يروح شغله زي كل يوم بشكل طبيعي سأل زوجته لو محتاجة منه أي حاجة قبل ما يمشي، ردت عليه وقالتله لأ وخلى بالك من نفسك، وهي شوية كده وهتروح عيادة الأطفال؛ علشان تكشف على الولد لأنه تعبان شوية. قالها ماشي وهو هيحاول يجي بدري علشان لو محتاجين حاجة. قال الكلام ده وحضن ابنه وباسه، وسابها ونزل راح الشركة. انتهي يوم العمل بتاع ساروتو وخرج من الشركة وحاول يوصل للبيت بسرعة؛ علشان يطمن على ابنه. وعلى الساعة ٣ العصر كان وصل قدام شقته، لكنه قبل ما يحط المفتاح في الباب لاحظ حاجة غريبة.. الباب كان موارب شوية وسمع صوت ابنه عمال يبكي جامد، وصوت التليفزيون شغال. ساروتو استغرب جدًا من الموقف، وبدأ يزق الباب بهدوء، ومجرد ما فتح شاف قدامه منظر خلاه يبرق بعينيه، وفضل واقف متنح من الصدمة لثواني قبل ما ينهار من العياط والصريخ. في اللحظة دي، بيتجمع كل الجيران على صوته ويدخلوا الشقة، علشان يشوفوا قدامهم منظر صادم: زوجته ناميكو مرمية على الارض قدام التلفزيون مط.عونة، وجنبها ابنها عمال يعيط وجنبهم علبة عصير، وخليكم فاكرين الملحوظة دي. بسرعة بلَّغوا الشرطة، اللي وصلت في ثواني ومعاها رجال المعمل الجنائي، والطب الشرعي. اتقلبت الدنيا رأسًا على عقب، وبدأت الشرطة تشوف شغلها وبدأوا التحقيق والتحريات، والمفاجأة كانت إن الشقة مكنش فيها أي آثار اقتحام، ولا حتي فيه أي حاجة اتسرقت منها، يعني اللي عمل كده في الست دي كان شخص جاي ينتـ..قم منها. والأغرب من ده كله، إن أصلًا ناميكو كان معروف عنها إنها هادية جدًا، وست محبوبة. يعني لا ليها أعداء، ولا في حد بيكرهها، فإيه المبرر إن حد يعمل فيها كده؟ بدأت الشرطة تشوف شغلها، وفريق الأدلة الجنائية يشوف شغله، واستمر التحقيق في الق\ضيّة لفترة طويلة بدون الوصول لأي نتيجة. وهنا قرر فريق الأدلة الجنائية تنظيف الشقة وتسليمها لصاحبها لأن ساروتو كان مستأجر. لكن ساروتو اتصرف تصرف غريب، قال إن مفيش حد ينضف الشقة ولا يجي جنبها، وإنه هيقفلها ويشوف شقة تانية، وهيدفع الإيجار لصاحب العمارة كل شهر، لكن محدش هيسكن فيها أبدًا غيره، ولا حتي هتتفتح. وهتفهم هو ليه عمل كده في التفاصيل اللي جاية.. وفضل التحقيق شغال في الق\ضيّة لمدة سنين بدون أي نتيجة، وكل اللي الشرطة وصلت ليه هو إن الجاني واحدة ست فصيلة دمها (B) لأن كان موجود منها بقعة في مسرح الجري\مة، وإن شعرها أسود مموج. والق\ضيّة في الفترة دي، كانت قض\يّة رأي عام في اليابان. ساروتو كان كل سنة في ذكرى الحادث يطبع منشورات فيها تفاصيل اللي حصل، ويروح يقف في محطات القطار والشوارع ويوزع الآلاف منها على الناس. وكان غرضه من ده، إن الق\ضية متتقفلش والناس تفضل فكراها، وحق مراته ميضيعش. كل سنة بيكرر نفس الموضوع في ذكرى الحادث، لحد ما نوصل سنة (٢٠١٠) في الفترة دي القانون الياباني كان بيَنُص: إن قضايا القتل بتسقط بالتقادم بعد ١٥ سنة. وده معناه إن بعد سنة (٢٠١٤) قض\ية ناميكو هتسقط عن الجاني. في الوقت ده يقرر ساروتو إنه يأسس جميعة ويسميها (جميعة القضايا التي لم تُحل) وقدر يجمع أسر الضحايا اللي ليهم قضايا مشابهة وسقطت بالتقادم، وعملوا حملة كبيرة وطلبوا إسقاط القانون ده؛ لأنه غير عادل. وبالفعل حقق الضغط ده انتصار تاريخي، ويصوّت البرلمان الياباني رسميًا على: إلغاء قانون التقادم في قضايا القتل العمد، ورسميًا تفضل قض\ية زوجته مفتوحة مدى الحياة لحد ما يتقبض على الفاعل. وفضلت تمر السنين بدون أي تقدم في الق\ضية، لحد ما نوصل لسنة (٢٠٢٥) وهنا لازم تعرف ساروتو ليه صمم إنه يسيب الشقة مقفولة، ومخلّاش حد يقربلها ولا ينضفها طول السنين دي؟ ساروتو كان متأكد إن هيجي يوم والعلم هيتطور فيه، وهيقدر من خلال الأدلة اللي موجودة في مسرح الجري\مة إنه يوصل للّي قتل مراته؛ وعلشان كده فضلت الشقة مقفولة لمدة ٢٥ سنة كاملة! كان كل شهر يدفع الإيجار لصاحب العمارة، ووصل إجمالي اللي دفعه تقريبًا ١٤٥ ألف دولار! ومع تطور تقنيات الـ (DNA) الشرطة عملت لمئات الناس اللي ليهم علاقة بالأسرة -سواء قرايب أو جيران- التحليل، لكن ولا واحد فيهم كان مطابق للأدلة -بقعة الدم، وخصلة الشعر- وفي سنة (٢٠٢٥) كثفت الشرطة البحث والتحقيق في الق\ضيّة، وكانوا بيطلبوا من ساروتو يقولهم لو في حد هو شاكك فيه غير الناس اللي عملوا التحليل، وفي وسط الكلام قالهم إن فعلًا في موقف حصل قبل الجري\مة بـ ٥ شهور تقريبًا، لكن هو ميعتقدش إن ممكن يكون ليه علاقة باللي حصل لمراته، بس هيقوله يمكن يفيدهم. قالهم: إن كان معاه بنت في الثانوية اسمها (كوميكو) وكانت معجبة بيه جدًا، وكانت كل عيد حب تقدمله ورد وشوكولاته، لحد ما دخلوا الجامعة سوا، وفضلت برضو تطارده، لكنه كان دايمًا بيقولها إنه معندهوش أي مشاعر ناحيتها. بس هي كانت مصممة تقرب منه، لدرجة إنها كانت بتروحله وتفضل تبكي، وتقوله إن هي مش هتقدر تحب غيره، لكن برضو هو كان بيرفضها، لحد ما اتخرجوا من الجامعة، وانقطع أي تواصل بينهم. لحد قبل الحادثة بخمس شهور، في يوم قابلها في حفلة من الحفلات واتكلموا مع بعض، وقالتله: إنها اتجوزت بس مش مبسوطة في حياتها؛ لأنها بتعاني صعوبة في تربية الأولاد، ده غير شغلها، وحياتها صعبة جدًا. وسَأَلته عن حياته، فقالها إنه بيحاول يكوّن أسره وحياته مستقرة وطبيعية، وطلب منها تستحمل وشجعها، واداها شوية نصايح، وبعد انتهاء الحفلة كل واحد راح لحاله. الشرطة لمّا سمعت منه الحكاية دي، سألته هو ليه محكهاش من بدري؟ قالهم: إنه ماكنش مُعتقد إنها هتفيدهم في حاجة؛ لأن البحث والتحقيق كانوا مركزين مع الناس القريبين منهم. في الوقت ده الشرطة جابوا الست دي، وطلبوا منها عينة علشان تتحلل، ويقارنوها بالأدلة اللي موجودة في مسرح الجري\مة، وبالفعل عملت التحليل وطلعت النتيجة مفاجأة وقلبت اليابان كلها. تحليل الحمض النووي طلع مطابق للدم، وكل الأدلة اللي كانت موجودة في مسرح الجري\مة بقالها ٢٦ سنة، أثبتت إن كوميكو هى اللي قتلت زوجة ساروتو! فورًا، الشرطة قبضت عليها في بداية سنة (٢٠٢٦) واتوجهت ليها تهمة القتل العمد، وبدأوا التحقيق معاها. قالت في التحقيقات: إن يوم الجري\مة راحت الشقة وهي متنكرة في لبس بائعة مشروبات، وخبطت على الباب وطلبت من ناميكو إن هي تجرب المشروبات اللي معاها. وبالفعل فتحت ليها ناميكو، ومجرد مادخلت الشقة طلعت سـ..ـ..كينة كانت مجهزاها وطعنتها بيها، وبعدها هربت من غير ما حد يحس بيها، وده بيوضح سبب وجود علبة العصير اللي كانت جنب ناميكو. الأغرب بقي هو الدافع اللى ورا الجري\مة اللي قالته للشرطة، قالت إن هي عملت كده بسبب كلام ساروتو معاها في الحفلة، لما قالته إنها بتعاني في حياتها. ولمّا قالها إن هو سعيد، حبت تعاقبه بإنها تحرمه من زوجته؛ علشان يجرب تعب تربية الأبناء! وفي النهاية، تم القبض على المجرم بسبب إصرار ساروتو لمدة ٢٦ سنة؛ علشان يجيب حق مراته، لدرجة إن المحقق اللي بلَّغه الخبر، بكى وهو بيقوله. وحاليًا الست دي في عمر الـ ٧٠ والقض\يّة شغالة، لكن لسه مصدرش فيها حكم لحد النهاردة. ✍️/ محمد المغربي