طعم في يدا اليفه الثالث

"اللهم استرنا فوق الأرض وتحت الأرض ويوم العرض عليك" كانت تتابع الطريق بعينين تلمعان بالدموع، تحاول أن تحبس انهيارها خلف جفنيها، بينما كان قلبها يضج بالوجع من فعل أخيها، وطعنه لها أما الآخر، فظل يراقبها من مرآة السيارة، يلتقط ارتجافة شفتيها ونظراتها الهاربة، حتى حمحم محاولًا كسر ذلك الصمت الثقيل. _ إنتِ رايحة فين؟ لم تجبه في البداية، وكأنها لم تسمعه، فعدّل وضعية المرآة قليلًا، ثم قال بنبرة أكثر هدوءًا: _ عايز أعرف بس علشان أعرف الطريق. جاء ردها مقتضبًا، باردًا كبرودة المسافة التي تحاول أن تصنعها بينهما: _ نزلني الموقف وبس، وشكرًا لحضرتك. _ أوصلك للمكان اللي عايزة تروحيه. التفتت إليه بلحظة، ثم أشاحت بوجهها سريعًا. _ شكرًا... طريقنا مش واحد. _ بس... التفتت إليه سريعًا، وقد نفد صبرها: _ لو سمحت وقف العربية، وصلنا الموقف خلاص. _ اسمعيني بس... لكنها لم تمنحه فرصة. فجأة فتحت باب السيارة وهي لا تزال تتحرك، فارتفع صوته بفزع، وضغط على المكابح سريعًا حتى توقفت السيارة. _ يا خديجة! استني! لكنها لم تلتفت حتى. هبطت من السيارة بخطوات متعجلة، ومسحت دموعها بطرف أصابعها، ثم أسرعت نحو السيارة التي ستقلّها إلى وجهتها، وكأنها تهرب من كل شيء.. استقلت السيارة، وما إن أُغلق الباب خلفها حتى أطلقت زفرة طويلة، كأنها تستعيد الهواء الذي سُلب من رئتيها طوال الدقائق الماضية. أخرجت هاتفها، واتصلت بوالدتها. وما إن سمعت صوتها حتى انهارت. _ شوفتي يا ماما خالد عمل إيه؟ نهضت فاتن سريعًا من مكانها، وقد انتفض قلبها على صوت بكاء ابنتها، وجلست تستمع إليها وهي تقص عليها ما حدث، وكل كلمة كانت تزيد النار اشتعالًا في صدرها. _ يعني اللي المفروض خطيبي طلب مني يوصلني وأنا رفضت، يقوم يركبني مع واحد معرفوش؟ غير إن سمعته زبالة زيه! أغمضت فاتن عينيها لحظة، وكأنها تحاول أن تستوعب ما فعله ابنها. _ اهدي يا حبيبتي... امسحي دموعك. إنتِ فين دلوقتي؟ _ راكبة العربية، مستنية لما تخلص. _ طيب يا حبيبتي متزعليش نفسك. أكيد هو مايقصدش يضايقك... يلا استعدي لشغلك، وأنا هتصرف مع خالد. _ حاضر يا ماما. أغلقت فاتن الهاتف، وظلت للحظات تنظر أمامها بصمت، ثم وضعت كفها فوق صدرها، وكأن الغضب أثقل قلبها. _ ليه يا ابني كده؟... ليه؟ بعد فترة دلفت جيهان إلى الغرفة دون استئذان. رفعت فاتن عينيها إليها بضيق: _ إنتِ إزاي تدخلي كده من غير ما تخبطي؟ قهقهت جيهان بسخرية،وهي تستدير لتخرج: _ وأنا هخبط ليه؟ نايمة مع جوزك، ما أنا عارفة إنك لوحدك... قال أخبط! المهم ام عبد الرحمــــــــن برة، معرفش بتحلم بينا ولا ايه قالتها، خرجت دون أن تنتظر ردًا. ظلت فاتن ترمقها بنظرات غاضبة، ثم زفرت بضيق، وأسندت يدها إلى طرف الفراش قبل أن تتجه إلى خزانتها، وتسحب عباءتها. في الخارج، جلست جيهان في مواجهة حسناء على الأريكة، تهز ساقها بلا مبالاة، وعلى شفتيها ابتسامة ناعمة تخفي خلفها شيئًا لم تطمئن إليه حسناء. فقالت : _ ماقولتيش يا خالتي، إيه خير على الصبح كده؟ إنتِ حلمتي بينا ولا إيه؟ ابتسمت حسناء مجاملة: _ أبدًا يا بنتي، حماتك كلمتني وعايزة نشرب الشاي مع بعض. رفعت جيهان حاجبها: _ قولتيلي حماتي؟ آه آه... عرفت. ثم اقتربت منها قليلًا، وخفضت صوتها: _ والله يا خالتي أنا مش عارفة أقولك إيه، بس ماتزعليش مني... كل شيء قسمة ونصيب. عقدت حسناء حاجبيها، وقد بدأ القلق يتسلل إليها. _ تقصدي إيه يا بنتي؟ اقتربت جيهان وجلست إلى جوارها، ثم قالت بنبرة تبدو حنونة، لكنها كانت تحمل بين طياتها سمًّا بطيئًا: _ بصي، ربنا عالم أنا بعزك إزاي، إنتِ والباشمهندس عبد الرحمن... بس سمعت إن حماتي بتقول لخالد: "إنت هتوافق كده من غير ما نملي شروطنا عليهم؟ لازم نطلب ونطلب. بنتنا أجمل بنت في الحتة، وهو حِياله ميكانيكي، وكمان مالوش لا شقة ولا غيره، ده عايل بيته كمان." اتسعت عينا حسناء قليلًا، لكنها ظلت صامتة. فأكملت جيهان الى أن قالت حسناء _ ليه يا بنتي؟ هو عبد الرحمن وحش؟ ده أي بنت في الدنيا تتمناه. ثم ضحكت بخفة: _ آه والله يا خالتي، أنا مستخسراه يتجوز من الحتة دي أصلًا. ما تشوفي له بنت من بنات الأكابر، يستاهل واحدة منهم... ده كفاية عيونه العسلي، هدوبهم كلهم! لم تعرف حسناء لماذا شعرت بالنفور منها. لم تكن تعرفها من قبل، ولم يحدث بينهما ما يبرر ذلك الشعور، لكن كلماتها بدت لها كااسم في العسل وقبل أن ترد، وصلت فاتن، وألقت السلام. _ يا دي النور! نورتي يا أم عبد الرحمن. نهضت حسناء مرحبة بها بابتسامة صادقة: _ البيت منور بأهله. عاملة إيه يا أم خالد؟ _ الحمد لله يا حبيبتي. ثم التفتت فاتن إلى جيهان: _ ضيفتي خالتك أم عبد الرحمن يا جيهان. _ لا يا حبيبتي، مش عايزة حاجة. اقعدي بس، من زمان ماقعدناش مع بعض. جلست فاتن إلى جوارها: _ مشاغل والله يا فاتن. إنتِ عارفة عمر ثانوية عامة، وعبد الرحمن بيطلع من الصبح ما بيرجعش غير بالليل. ابتسمت فاتن: _ ربنا يبارك لك فيهم يا رب. ثم التفتت إلى جيهان: _ قومي اعملينا شاي يا بنتي. ابتسمت جيهان ونهضت: _ عيوني يا ماما. دلفت إلى الداخل، بينما ظلت فاتن تراقبها حتى اختفت عن أنظارها. ثم التفتت إلى حسناء وقالت بنبرة صادقة: _ اعذريني إني بعت لك، ما بقدرش أمشي... يخرب بيت السكر وسنينه، وكمان الضغط، يكفيكي شره. ربتت حسناء على يدها: _ ولا يهمك يا حبيبتي، إحنا أخوات. ومتأكدة إنك لو تقدري مش هتتأخري. ابتسمت فاتن: _ ربنا يكرم أصلك. ثم ساد صمت قصير، قبل أن تقول فاتن بجدية: _ بصي يا ست أم عبد الرحمن... اللي أوله شرط آخره نور. أومأت حسناء: _ أيوة، أكيد. تنفست فاتن بعمق، ثم قالت: _ دلوقتي عبد الرحمن قعد مع خديجة امبارح، وقال لها إنه عايز يتجوزها في الشقة هنا. وأنا معنديش مانع... عبد الرحمن قبل أي حاجة ابني، وربنا يعلم بعزه زيه زي خالد ابني. ابتسمت حسناء بحب: _ ربنا يبارك لك فيه يا فاتن. _ اللهم آمين. ثم تابعت، وقد أصبحت نبرتها أكثر جدية: _ دلوقتي عمر ما شاء الله شاب، وإنتِ عارفة قد إيه هو محترم، وعارفة تربيتهم كويس... بس الأصول أصول يا حسناء. أومأت حسناء: _ أيوة طبعًا. _ ماتزعليش مني، أنا مش موافقة إن خديجة تتجوز معاكم في نفس الشقة.. لو مش عايز يوضب الدور اللي تحت، ياخدلها شقة ايجار قريبة من هنا، حتى لو في نفس الشارع، معنديش مانع. إنما في نفس الشقة... ماتزعليش مني. والله مش تشكيك في حد، بس الناس ما بترحمش، وأنا عايزة بنتي تدخل بيتها مرفوعة الراس، محدش يقدر يقول كلمة عليها. ابتسمت حسناء، وقد شعرت بالراحة تجاه صراحتها: _ لا طبعًا، حقكم. وعبد الرحمن لما قالي كده، أنا رفضت أصلًا..بس الدور الأرضي مش هينفع خالص،انا اصلا اتفقت مع عبد العاطي يأجره،وهو قال هيحوله محلات،مينفعش يافاتن، ارضي وعبده مش هيرضى، هو شاري شقة في مكان اسمه إيه ياختي؟ والله ما عارفة جيل الأيام دي بيقولوا عليه إيه! ضحكت فاتن: _ هاي كلاس. ضحكت حسناء: _ أيوة هو ده! وإن شاء الله أوعدك إن بنتك تدخل لوحدها. إحنا عندنا أغلى من خديجة. أمسكت فاتن يدها: _ ربنا يكرم أصلك... وده اللي منتظراه منكم. ثم ابتسمت بحنان: _ وأنا إن كان عليّا أوصلها لك لحد باب البيت، ماهو عبد الرحمن ابننا وغالي علينا برضه. اتسعت ابتسامة حسناء، وامتلأت عيناها بلمعة فرح لم تستطع إخفاءها: _ يعني أفهم من كلامك يا فاتن إنكم موافقين؟ ضحكت فاتن: _ طبعًا! هو أنا هلاقي راجل لخديجة في ربع ابننا؟ ربنا يتمم فرحتنا على خير. رفعت حسناء كفيها إلى السماء، وخرج الدعاء من قلبها قبل شفتيها: _ يا رب... يا رب يا فاتن. هيفرح أوي، إنتِ ماتعرفيش هو بيحبها قد إيه. ابتسمت فاتن، وقالت _ ربنا يسعدهم يا رب... ويكتب لهم الخير، عند خديجة عند خديجة كانت تنتظر موعد دخولها، ارتفع رنين هاتفها، اخرجت الهاتف واجابت _ايوة ياعبد الرحمن _لما تخلصي هتلاقيني قدام المؤسسة _تمام... قالتها واغلقت الهاتف تنظر الى شاشته بتنهيدة _انت اللي مصبرني على اللي بيحصل معايا نظرت امامها بشرود، حتى صدح اسمها بالمكان دلفت للداخل، لبعض الدقائق، ثم خرجت وهي تحمل ابتسامة الغد، رفعت الهاتف وتوقفت بمكانا هادئ _ماما... قبلوني، شافوا السي في، ومنتظرين الشهادة، بس هشتغل بعقد مؤقت لحد نتيجتي، انا فرحانة اوي _حبيبتي يابنتي الف مبروك، وعلشان فرحتك تكمل، ام حبيب القلب كانت هنا، ويعتبر اتفقنا على كل حاجة _بجد ياماما _بجد يانور عين ماما، ربنا يسعدكم يابنتي يارب _ماما انا بحبك اوي _اكتر من حبيب القلب ياديجة _اكتر من الدنيا كلها ياماما _يابت... صمتت تبتسم ثم قالت _حبك حاجة وعبد الرحمـــــــــن حاجة تانية ياماما _والله ياست خديجة، اتجرأنا اهو، وبقينا نقول كلام في الحب _طب خلاص بقى، لازم اقفل _خلي بالك من نفسك _ماما... _ايوة حبيبتي... صمتت للحظات ثم همست _النهاردة انا مبسوطة، ممكن اطلب طلب _قولي حبيبتي _عبد الرحمــــــــن جه تحت، مشفتوش بس هو كلمني صمتت فاتن امام سعادة ابنتها، الى أنا همست برجاء _ماما _اسمعيني حبيبتي، انا مش بشك فيكي ولا فيه، بس مينفعش _خمس دقايق بس ياماما _من غير مايقرب ولا يمسك حتى ايدك ياخديجة _شكرا ياماما... قالتها. اغلقت الهاتف، اتجهت إلى الخارج، وقلبها يخفق بسعادةٍ عارمة، كأنها طفلة صغيرة حصلت لتوّها على جائزة كانت تحلم بها. وما إن تجاوزت الباب الرئيسي حتى وقعت عيناها عليه. كان واقفًا إلى جوار دراجته البخارية، يتكئ بذراعه عليها، وعيناه معلقتان بالباب وكأنه ينتظر ظهورها منذ دهر. وما إن لمحها حتى استقام قليلًا، وظلت عيناه تتفحصانها في صمت، من رأسها إلى قدميها فستانٌ بلون الأوف وايت، تتناثر عليه فراشات صغيرة من اللون ذاته، وحجابٌ أزرق زاد ملامحها رقةً وهدوءًا. بدت له كحورية هبطت من عالم آخر... ولِمَ لا؟ وهي حورية قلبه التي سرقت منه نبضه، ثم تركته عاجزًا عن استعادته. وصلت إليه بابتسامة مشرقة، وقالت بدلالٍ لم تستطع إخفاءه: _قول مبروك بقى يا سيدي. ظل صامتًا للحظات، وعيناه معلقتان بها، حتى مد يده فجأة نحو الخوذة، والتقطها ثم مدها إليها. _البسي دي. نظرت إلى الخوذة باستغراب، ثم رفعت عينيها إليه. _ألبس دي ليه؟ مش فاهمة. اقترب منها خطوة، ثم وضع الخوذة فوق رأسها بنفسه، وانحنى قليلًا حتى همس بجوار أذنها: _البسي علشان هوصلك. رفعت رأسها إليه سريعًا، وقد انعقد حاجباها بدهشة. _أركب فين يا عبد الرحمن؟ لم يجبها. صعد إلى الدراجة، ثم التفت إليها بنظرة جانبية، وأشار بعينيه إلى المقعد خلفه. _مش هنتظر كتير... ولا المكنة مش عجباكي؟ والعربيات المرسيدس هي الحلوة؟ توقفت أنفاسها. قبضةٌ باردة اعتصرت قلبها فور أن فهمت ما يرمي إليه. _إنت تقصد إيه؟ رفع حاجبه، وصوته يحمل غيرةً حاول عبثًا أن يخفيها: _اركبي يا خديجة. _بس... قاطعها بحدة: _ما هو هتركبي يعني هتركبي، حتى لو بالغصب. اتسعت عيناها بذهول، وكأنها لم تتوقع أن تسمع منه تلك الكلمات. _عبد الرحمــــــــن! إنت بتقول إيه؟ إزاي بس أركب معاك وإحنا... التفت إليها بعينين يشتعلان غيرةً وعتابًا. _وإحنا إيه؟ صمتت.. اقترب منها أكثر: _وكان هو إيه علشان تركبي مع غريب عربيته، وفي نفس الوقت أنا أطلب منك أوصلك وترفضي؟ هزت رأسها بسرعة، وتقدمت نحوه خطوة، تتوسله بعينيها قبل كلماتها: _الموضوع مش كده... إنت متعرفش إيه اللي حصل. ابتسم ابتسامة موجوعة _اللي أعرفه إن حبيبتي رفضت إني أوصلها، وركبت مع راجل غريب... واحد معروف بسمعته السيئة. _أنا اتغصبت، واتخيرت يا عبد الرحمن. جاء رده سريعًا، كأنه كان ينتظرها: _حلو...ثم نظر إليها بثبات. _وأنا كمان بغصب عليكي وبخيرك. تجمدت أمامه. _واختاري. شهقت، والغضب امتزج بالألم في عينيها. _بس إنت مش كده! هبط عن الدراجة في لحظة، واتجه إليها بخطوات سريعة، ثم أمسك بذراعيها _عندك أقدر أقلب شيطان، سمعتي؟ ارتجفت عيناها نحوه. _ومن وقت ما قلتلك إني بحبك... يبقى كل حاجة انتهت. اقترب منها، وصوته خرج عميقًا، ممتلئًا بغيرة رجلٍ فقد قدرته على التظاهر بالهدوء: _بقيتي ملكي. ظلت تحدق به، والذهول يشل كلماتها. _عبد الرحمــــــــن... الناس بتبص علينا. التفت حوله لحظة، ثم عاد إليها دون اكتراث: _ميهمنيش الناس والزفت. أشار إلى الدراجة. _هتركبي ولا أمشي؟ أغمضت عينيها للحظة، تحاول أن تجمع شتات قلبها. صعد عبد الرحمن إلى الدراجة، وأدار محركها، لكنّه توقف قبل أن ينطلق. بينما هي كانت واقفة مكانها، مترددة بين الخوف والضيق والغيرة التي لم تعترف بها حتى لنفسها، شعرت بقلبها يدفعها نحوه. اقتربت بجسد مرتجف، ثم صعدت خلفه. في اللحظة التي استشعر فيها وجودها خلفه، ارتجف قلبه بسعادة حاول جاهدًا إخفاءها. التفت بنصف رأسه إليها. _امسكي فيا... هتوقعي. همست بصوتٍ مرتعش: _عبد الرحمن... استدار إليها بنصف جسده، فتعلقت عيناه بعينيها، اللتين تجمعت فيهما الدموع. تغيرت ملامحه للحظة. هدأت غيرته، لكن وجعه ظل حاضرًا. _يلا يا خديجتي... ثم قال بصوت أكثر هدوءًا: _ممكن اللي بعمله ده يكون عقاب ليكي، بس صدقيني... أنا بتعاقب أضعافه. ابتلعت غصتها. _وعقابك ده علشان إيه؟ ثبت عينيه عليها. _علشان متديش فرصة لأي حد، أيًّا كان، إنه يقرب من مملكتي. انحنى قليلًا، يتأمل عينيها اللتين هربتا إلى الأرض. ثم قال بصوتٍ امتزج فيه العشق بالغيرة: _إنتِ مملكتي الخاصة يا خديجة... واللي يقرب منها، مش هاضمن رد فعلي. رفعت عينيها إليه، فوجدته قريبًا إلى الحد الذي أربك نبضها. فقالت بصوتٍ خافت يحمل عتابًا موجعًا: _هتمشي؟ ولا هتفضل تبرر الغلط؟ ثم أضافت، وكأنها تذكره بما يؤلمها أكثر: _افتكر إنّي خُنت ثقة أمي. استدار عنها حتى لا يرى الحزن في عينيها، وحتى لا يضعف أمام نبرة صوتها. ثم مد يده إلى الخلف، وأمسك بكفيها، وسحبهما برفق وأحاطا بخصره. _امسكي جامد. تجمدت للحظة.. وانتفض جسدها بالكامل من فعلته _عبد الرحمــــــــن لو سمحت مينفعش كدا؟ ردَّ دون أن يلتفت إليها، بينما قبضت يداه على مقود الدراجة بثبات: _امسكي كويس، مش هاكلك... علشان متقعيش. ولازم تتعودي على كده. أغمضت عينيها، وما إن تحرك فجأة حتى اندفع جسدها إلى الخلف، ثم للأمام فارتطمت به دون إرادة منها، واضطرت أن تُريح جبهتها على ظهره، بينما تشبثت أصابعها بقميصه في ارتباك ظل يقود بصمت، والهواء يصفع وجهه، بينما الغيرة تعصف برأسه بعنف. يعلم أنه أخطأ.. بل يعلم أن ما فعله جرحها. لكنه لم يعرف كيف يسيطر على ذلك الشعور المجنون الذي اشتعل داخله منذ أن رآها تركب مع رجل آخر... لم يحتمل الفكرة، ولم يحتمل أن يرى غيرته ضعيفة أمام عينيها، فخرجت منه القسوة بدلًا من الاعتراف بالخوف.. وصل إلى شاطئ البحر. أوقف الدراجة، وترجل عنها سريعًا، ثم ابتعد بضع خطوات، تاركًا لها مساحة. لكنها ظلت مكانها.. لم تتحرك. كانت تحدق في البحر بعينين جامدتين، و أخرج هاتفه، وزفر زفرة طويلة قبل أن يجري اتصالًا. وما إن أتاه صوت فاتن حتى قال: _إزي حضرتك يا ست الكل؟ _أهلا يا ابني، عامل إيه؟ _الحمد لله... ماما كلمتني، وقالت لي على اللي دار بينكم. وأنا موافق على كل شروطك يا أمي. ارتجف قلب فاتن فرحًا، وكأن كلماته أكدت لها ما كانت تتمناه منذ البداية. _بجد يا عبد الرحمن؟ ابتسم رغم توتره: _هاخد خديجة ونجيب الدبل، ويوم الجمعة بإذن الله هنلبسها ونكتب الكتاب. ضحكت فاتن بحنان، ثم قالت: _والكلام ده ينفع يا عبد الرحمن في التليفون يا ابني؟ _آسف يا أمي، بس عايز أنجز... وهي معايا دلوقتي. قولت نعدي على الصايغ ونجيب الدبل. صمت لحظات فاستمع الى صوت فاتن: _معلش يا ابني، ليها أخ كبير. لازم تقعد معاه وتتفقوا، مينفعش كده. ده أنت ابن أصول، وإحنا مش هنمشي حاجة من ورا أخوها. مرر عبد الرحمن كفه في شعره بعصبية، وأغمض عينيه لحظة. كان يعرف أنها محقة... يعرف أن اندفاعه لم يكن له ما يبرره. لكن ما حدث منذ قليل أخرج أسوأ ما فيه. _آسف... معرفش إيه اللي حصل لي. ابتسمت فاتن بحنان، وقد فهمت أكثر مما قال: _معلش يا حبيبي، عذراك. يلا ركب خديجة وخليها ترجع على البيت قبل ما أخوها يرجع. التفت إليها من بعيد، فوجدها جالسة أمام البحر. _خديجة معايا يا خالتي. _ما أنا عارفة، علشان كده بقولك ركبها وخليها ترجع. صمت لحظة، ثم قال برجاء: _أنا هرجعها، متقلقيش عليها. هتتأخر كمان نص ساعة... بعد إذنك. شدينا مع بعض وعايز أراضيها. جاءه صوت فاتن محذرًا: _عبد الرحمــــــــن يا ابني... _بعد إذن حضرتك، لازم أقفل. هنتكلم لما أرجع. أغلق الهاتف قبل أن يمنحهل فرصة للرفض ظل واقفًا للحظات، ثم اتجه إليها. اقترب ببطء، وجلس على الرمال إلى جوارها، تاركًا بينهما مسافة صغيرة. لم تنظر إليه. كانت عيناها معلقتين بالبحر، لكن دموعها كانت تفضح أن قلبها لم يكن يرى شيئًا سوى ما حدث بينهما. حمحم ثم قال بصوت خافت: _ممكن أكون كنت عنيف في ردي... لم تجبه.. ابتلع غصته وأكمل: _بس أنا راجل دغري يا خديجة، واللي يقرب من... التفتت إليه فجأة، كأن كلماته أشعلت بداخلها ما كانت تحاول إخماده. _أنا مش ملك حد... سمعتني؟ تجمد جسده، فتابعت بصوت مرتجف، لكنه حاسم: _ومش من حقك تتعامل معايا كأني حاجة بتاعتك علشان بتحبني! نهضت، ونفضت الرمال عن ثيابها بيد مرتعشة. نهض خلفها فورًا: _خديجة قاطعت حديثه، تشير إليه بغضب حارق _النهاردة أثبت لي إن الرجالة كلها واحدة. _خديجة... قالها من بين اسنانه ارتفع صوتها، وصاحت غاضبة _خالد خيرني بين شغلي وإني أركب العربية... وإنت خيرتني بين قلبي وأخلاقي! تقدمت نحوه خطوة، وعيناها ممتلئتين بالدموع، ووجهها يحمل خيبة رجل لم تتوقع يومًا أن يؤلمها. _النهاردة أثبت لي إني بلا أخلاق يا بشمهندس! أطبق على ذراعيها : _اسكتي متغلطيش مسحت دموعها سريعًا، وكأنها غاضبة من نفسها لأنها سمحت له برؤيتها ضعيفة. _لآخر لحظة كنت بقول إنك مستحيل تعمل كده... .. بس طلعت غلطانة اقتربت حتى أصبحت أمامه مباشرة، ثم رفعت عينيها إليه. _إنت مش أمين يا عبد الرحمن. توقفت أنفاسه. وكأن الجملة لم تصل إلى أذنيه وحدهما، بل اخترقت صدره واستقرت في قلبه. _معرفتش تأمن على قلبي... ولا على ثقتي فيك. اهتز صوتها أكثر: _وأنا كنت مؤمنة بيك أكتر من نفسي. صمت.. لم يجد كلمة واحدة يرد بها. تابعت وهي تبكي: _كنت فاكرة إنك لما تحبني هتكون أمان ليا... مش خوف منك.، مش تحطني في اختيار بينك وبين مبادئي. اقترب منها غريزيًا: _كلامك دا هنتحاسب عليه بعدين رفعت يدها تمنعه. _خلاص... لا بعدين ولا قابلين خرجت الكلمات ضعيفة، لكنها كانت أشد عليه من الصراخ. _خلصنا. حدق بها غير مستوعب. _إيه؟ _الراجل اللي يخيرني بين قلبي وأخلاقي... ميلزمنيش. انهمرت دموعها بغزارة، وانخفض صوتها حتى أصبح أشبه بهمسة مكسورة: _أنا حبيتك يا عبد الرحمن... بس مش لدرجة أخسر نفسي علشانك. انحنت تحمل حقيبتها، ثم استدارت. خطت خطوة واحدة. فصاح خلفها دون وعي: _خديجة! توقفت... ورغم انكسارها منه، الا أنها تمنت أن يطمئنها ويعتذر لكنه لم يستطع أن يقول شيئًا. كل الكلمات التي كان يريد أن يقولها اختفت.. كل تبرير.. كل اعتذار. لم يبقَ في رأسه سوى جملة واحدة تتردد كأنها حكم نهائي: أنت مش أمين. رحلت بخطوات مترنحة، ودموعها تنهمر دون توقف، بينما ظل واقفًا في مكانه، يراقب ابتعادها، غير مصدق لما استمع اليه بعد فترة وصلت الى منزلها، قابلتها والدتها باابتسامة بشوشة، اومأت برأسها ورسمت ابتسامة _مبروك حبيبتي خرجت جيهان وبيدها طبقا من الحلويات _حمد الله على السلامة، ايه قبلتي في الشغل لم ترد عليها، نظرت لوالدتها _ماما... أنا مصدعة، ممكن أنام شوية ربتت على كتفها _ادخلي حبيبتي اعتدلت جيهان واقفة _الله ومين هيعمل الغدا استدارت الى جيهان _هجيب اكل لامي، انت اطبخي لجوزك قالتها واتجهت الى غرفتها واغلقت الباب خلفها تكتم شهقاتها، اليوم انهارت احلامها مع الرجل الذي سكن قلبها منذ سنوات استمعت الى طرقات على باب الغرفة، ازالت دموعها سريعا، واتجهت تنزع ثيابها وهي تقول _بغير هدومي ياماما دفعت جيهان الباب ودلفت للداخل، تجمدت خديجة تلملم كنزتها تداري جسدها المكشوف _هو انت مش هتتعلمي الاحترام امتى، اطلعي برة عايزة اغير اتجهت جيهان بنظرها لجسدها الذي كشف امامها، وشعرت بالغيرة تحرقها _بتبصي على ايه، اطلعي برة خرجت سريعا، واتجهت لغرفتها تدور حول نفسها _والله ياست خديجة، ماشي والله لاندمك على جمالك دا، اصبري علي بعد عدة ساعات، ارتفع رنين هاتفها كانت غارقة في نومٍ عميق، كأنها تهرب فيه من كل ما أثقل قلبها، حتى بدا الرنين بعيدًا عنها، إلى أن تكرر فأجبرها على فتح عينيها بصعوبة. مدّت يدها تتحسس الهاتف، ثم أجابت دون أن تنظر إلى هوية المتصل. — ألو... خرج صوتها ناعسًا، مثقلًا بآثار النوم. في الطرف الآخر، توقفت أنفاس عبدالرحمن للحظات. أغمض عينيه، وكأن صوتها وحده أشعل داخله شوقًا لم يكن مستعدًا لمواجهته، وتمنى للحظة لو كانت أمامه، لا يفصل بينهما هاتف ولا مسافة. سبّ نفسه في سرّه على ما شعر به، ثم استغفر ربه ومسح وجهه بكفه، قبل أن يخرج صوته الرجولي خافتًا، يحمل اعتذارًا صادقًا: — آسف... مكنش قصدي أزعلك. اعتدلت بنصف جسدها، وما إن التقطت صوته حتى اتسعت عيناها. — عبدالرحمن؟! — نعم... سكتت لحظة، وكأنها لا تزال تحاول استيعاب الأمر. ثم قالت بنبرة يغلب عليها النعاس والدهشة: — هو أنا بحلم ولا إنت بتتصل بيا؟ ارتسمت ابتسامة رغماً عنه، لكنه أخفى ضحكته وقال بنبرة مشاكسة: — ليه الأستاذة بترد ومتعرفش بتكلم مين؟ إزاي بتردي على حد من غير ما تشوفي مين بيتصل؟ اعتدلت جالسة، وسحبت الغطاء حولها بضيق، وقد عادت إليها عصبيتها من جديد. — خلصت كلامك؟ يعني متصل علشان تتعصب عليا ؟ لم يجبها، فاشتدت نبرتها: — لو مش عايز حاجة، هقفل علشان أكمل نوم... وامسح رقمي من عندك، زي ما أنا... بترت كلماتها حين وصل إليها صوت أنفاسه الثقيلة عبر الهاتف. صمتت، ثم قالت بقلق خافت: — سكّت ليه؟ جاءها صوته بعد لحظات، أهدأ هذه المرة: — خديجة... — نعم ؟ — أنا متصل علشان أقولك إني بعتذر لك على اللي حصل. تنفست ببطء، ثم أجابته دون تردد: — وأنا مش قابلة اعتذارك. ابتسم رغمًا عنه، وقال بثقة تحمل شيئًا من العشق: — لا... هتقبلي يا خديجتي. هتقبلي اعتذار فارس قلبك، لأني مش ههون عليكِ. تسارعت دقات قلبها بعنف، حتى شعرت أن قلبها نفسه قد فضحها. ابتلعت ريقها، وحاولت أن تخفي ارتباكها: — عبدالرحمن... — أنا بحبك يا خديجة. سكنت أنفاسها. وتابع بصوت أكثر صدقًا، وكأنه يخرج الكلمات من أعمق موضع في قلبه: — وبغير عليكي... يمكن رد فعلي يضايقك، ويمكن ساعات مبعرفش أتحكم في عصبيتي، بس ده من حبي ليكي. من خوفي عليكي... ومن خوفي أخسرك. أطرقت برأسها، رغم أنه لا يراها، ثم قالت بهدوء: — مهما كان حبك ليا يا عبدالرحمن، ده ميديكش الحق إنك تخيرني بينك وبين أي حاجة... أنا مش عايزة أحبك وأنا حاسة إني محاصرة. وصلت كلمتها إليه، فصمت لحظة قبل أن يقول بنبرة مختلفة تمامًا، حاول بها أن يبدد ثقل الحديث: — تمام يا ديجة... أنا دلوقتي زعلان، ولازم تصالحيني. خرجت منها ابتسامة رغماً عنها، رغم محاولتها إخفاءها. — هفكر... وأشوف هقدر أسامحك ولا لأ. شهق باعتراض مصطنع: — نعم يا أختي؟! بقولك أنا اللي زعلان! ضحكت بخفوت، وقد قلب الأدوار عليها بمهارة: — معلش... تعيش وتاخد غيرها. انطلقت ضحكته من الطرف الآخر، فضحكت هي أيضًا، للحظات بدت فيها مشاكلهما الصغيرة أبعد ما تكون عن قلبيهما. ثم هدأ صوته وسألها: — احكيلي عملتي إيه في المقابلة؟ بدأت تقص عليه ما حدث، تحكي له تفاصيل المقابلة وما دار فيها، وهو يستمع إليها باهتمام، يسألها من وقت لآخر، حتى شعرت لأول مرة منذ ساعات أن صدرها قد خفّ من ثقل الغضب اتجاه لكن فجأة...انفتح باب الغرفة. التفتت خديجة، فتجمدت ابتسامتها في مكانها. حين وجدت والدتها تقف عند الباب بوجه شاحب، وملامحها مضطربة، وكأن شيئًا انتزع الدم من وجهها دفعة واحدة. نهضت خديجة بفزع: — ماما... مالك؟ اقتربت والدتها منها وجلست على حافة الفراش، تتنفس بصعوبة. — هاتيلي دوايا بسرعة يا خديجة... تغير وجه خديجة في لحظة. — حاضر يا ماما، حاضر. وجاءها صوت عبدالرحمن من الهاتف: — خديجة؟ في إيه؟ لم تجبه. ألقت الهاتف جانبًا، ثم أسرعت نحو غرفة والدتها، لتجد جيهان هناك، واقفة في حالة ارتباك لم تهتم خديجة بوجودها. اندفعت نحو الأدوية، وأخذت ما طلبته والدتها، ثم عادت إليها مسرعة. — ماما... حبيبتي، اهو الدوا. أشارت والدتها إلى الدواء، لكن الكلمات خانتها. وضعت خديجة الحبة تحت لسانها، ثم رفعت الهاتف بسرعة واتصلت بأخيها. ولكن لا رد. ارتجفت أصابعها وهي تعاود الاتصال، ثم ألقت الهاتف على الفراش واقتربت من والدتها أكثر، تحتضن وجهها بين كفيها. — ماما... اقتربت منها أكثر، وقد بدأ الخوف يلتهم ملامحها: — ماما، افتحي عيونك... ارتفع صوتها مرتجفًا: — مامااا! ثم التفتت إلى جيهان تصرخ: — يا جيهان! يا جيهان! في الخارج، كانت جيهان تدور في المكان بقلق، وجسدها يرتجف، تحاول أن تبدو متماسكة بينما قلبها يضرب صدرها بعنف. جلست متأففة، وهمست في ضيق: — يا ترى الست الكركوبة دي سمعتني... لكنها توقفت حين وصل إلى مسامعها صوت خديجة. نهضت دفعة واحدة، وانتفض جسدها كله، وقد اتسعت عيناها بذعر، تخشى أن تكون فاتن قد أخبرت خديجة بكل شيء. خطت للخارج بحذر، وجدت خديجة تحتضن رأس والدتها وتبكي، ثم اتجهت الى هاتفها، سحبته سريعا، ورفعته — عبدالرحمن... الحقني، ماما قاطعة النفس! لم تمر سوى دقائق معدودة حتى كان عبدالرحمن بمنزلها، بصحبته الطبيب. انحنى الطبيب يفحص والدتها بعناية، ثم كتب لها بعض الأدوية، قبل أن يرفع عينيه إلى خديجة التي كانت تقف أمامه بوجهٍ شاحب، تنتظر منه كلمة تطمئن قلبها. — لحد الصبح، لو فضلت على نفس الحال، لازم تتحجز في المستشفى. كانت الجملة كفيلة بأن تهدم ما تبقى من تماسكها. نظرت خديجة إلى والدتها، تحاول أن تستوعب كيف تحولت حالتها في ساعات قليلة من امرأة تتحدث معها إلى جسد ساكن لا يجيبها. جلست إلى جوارها، أمسكت كفها البارد بين يديها، وأغرقتها بالقبلات، بينما انهمرت دموعها بلا توقف. — حبيبتي يا ماما... ردي عليا. ارتجف صوتها، وانحنت تقبّل يدها مرة أخرى. — أنا هموت من الخوف عليكي... وضعت رأسها بجوار رأس والدتها، ثم أحاطتها بذراعيها، تبكي بحرقة كطفلة فقدت آخر ما يؤمنها في هذا العالم. — ماما... ردي عليا، لو سمحتي... قوليلي إنك سامعاني. توقف عبد الرحمــــــــن عند العتبة. لم يستطع أن يخطو خطوة واحدة. كان المشهد أمامه قاسي لما تشعر به حبيبته؛ خديجة التي لطالما حاولت أن تبدو قوية، جالسة بجوار والدتها بهذا الانهيار، ودموعها تغرق وجهها، ويداها تتشبثان بها ابتلع غصته واقترب منها. — خديجة... رفعت رأسها نحوه، ومسحت دموعها سريعًا، ثم عادت بعينيها إلى والدتها. — معرفش إيه اللي حصل... كانت كويسة. جلس قريبًا منها، وقال محاولًا أن يثبت صوته: — متعيطيش... إن شاء الله هتبقى كويسة. هزت رأسها، وارتفعت شهقاتها — معنديش غيرها يا عبدالرحمن... توقفت أنفاسه. اقترب منها خطوة، وقد غاب عنه كل شيء سوى دموعها. — بطلي عياط... بتوجعي قلبي. أغمضت عينيها، وانسابت دموعها على وجنتيها، وهمست بانكسار: — دي أمي يا عبدالرحمن... دي كل حياتي. هموت لو حصلها حاجة. ارتجف قلبه من عبارتها، فمال نحوها سريعًا: — اشش... أوعي تقولي كده. أنا موجود، وإن شاء الله هتقوم بالسلامة. مد يده ومسح دموعها بطرف أصابعه رفعت عينيها الباكيتين إليه. — قولي إنها هتقوم بالسلامة... طمّن قلبي. نظر إلى عينيها طويلًا، ثم قال: — خديجة، إنتِ مش طفلة... اجمدي كده. شهقت وهي تنظر إلى والدتها الغائبة عن الوعي فلم يجد أمامه سوى أن يضم رأسها إلى صدره. — بس بقى... أنا هنا. مش هسيبك. ومتأكد إن مامتك هتقوم بالسلامة. وما إن شعرت بذراعيه حولها حتى انهارت أكثر. رفعت ذراعيها تتشبث بسترته، تقبض عليها بأصابع مرتجفة، تبحث عن الأمان ومن يراها من بعيد، لظن أنها تحتضنه... لكنها في الحقيقة كانت تحتضن آخر خيطٍ يمنعها من السقوط. — آآآه... خرجت منها شهقة موجوعة. _خديجة وبعدين معاكي فجأة...انفجرت في الخارج صرخات جيهان. — كده يا خديجة؟! مكنش العشم يا بنت حسن! تجمدت خديجة مكانها.. حين استمعت الى حديث جيهان رفع عبدالرحمن رأسه.. مبتعدا للخارج فصاحت جيهان بصوت أعلى، مشبعًا بالاتهام والفضيحة: — كده بقى يحصل منك كده؟! إنتِ وعبدالرحمن؟! اتجه عبدالرحمن نحو الباب، وعقد حاجبيه، قبل أن يخرج مسرعًا. وما إن ظهر أمام المنزل حتى وجد جيهان تصرخ وسط تجمعٍ من أهل البيت والجيران، تشير إلى الداخل بجنون. — تعالوا شوفوا الست خديجة! موتت أمها بعد ما شفتها في وضع مخل مع الباشمهندس! تعالت الهمهمات.. وهم ينظرون الى عبدالرحمن الذي خرج من المنزل للتو شهقت جيهان واضعة يدها على صدرها: — يا عيني عليكي يا حماتي! ثم صرخت بأعلى صوتها: — الحقني يا خالد! الحق أمك يا خالد! خرجت خديجة من الغرفة على إثر الضجة، وما إن وقعت عيناها على التجمع، الواقفون يرمقونها بنظرات مشمئزة، حتى تجمد الدم في عروقها. لم تفهم.لم تستوعب.. كلمات زوجة اخيها _ياترى جاي لك ليه في نص الليالي وعارف اخوكي مش هنا نظرت خديجة بفزع إلى الوجوه المحيطة بها، ثم إلى جيهان، قبل أن تعود بعينيها إلى عبدالرحمن. الذي نزل درجة من درجات السلم واتجه ناحية جيهان وووو نكمل بكرة

مقالات ذات صلة

روايه لملك ابراهيم

موظف نظافة

وانا بحضر شنطتي

قول ل ماما اسف

الظابط والكوافيرة

عنذما يحب القلب الاخير

اترك تعليقاً إلغاء الرد