عالمة الكيميا

اللي في الصورة دي هي عالمة الكيمياء الأمريكية (كارين ويترهان) قصتها من أغرب وأكتر القصص المأساوية في تاريخ الأبحاث والمعامل؛ لأن بسبب نقطة صغيرة غير مرئية، هتتغير بروتوكولات الأمان الكيميائي في العالم كله. في شهر يناير سنة (١٩٩٧) دخلت واحدة ست مستشفى في أمريكا اسمها (دارتموث) وكانت بتشتكي من أعراض غريبة عمالة تتفاقم مع الوقت. الأعراض اللي عندها كانت في البداية بسيطة، وبدأت تزيد بشكل حاد، وزنها كان بينزل بشكل ملحوظ، مع صعوبة في المشي لدرجة إنها كانت بتقع وهي ماشية، وتترنح زي اللي فاقد الوعي، مع تُقل في اللسان وتلعثم في الكلام، وكمان تنميل ووخز في أطراف الأصابع. بدأت الدكاترة في فحصها، وكانوا محتارين في التشخيص بتاعها؛ لأن التحاليل المتعارف عليها موضحتش هي عندها إيه؟ والأغرب، إن بعد الأدوية اللي أخدتها في المستشفى، حالتها مكنتش بتتحسن، بل بتسوء أكتر. لدرجة إن الدكتور قال لزوجها: هل زوجتك ليها أي أعداء؛ لأنها ممكن تكون اتعرضت لحالة تسمم مُدبرة! لكن الزوج أكد للدكتور إن ده مستحيل يحصل، وإنها ملهاش أي أعداء، والست نفسها أكدت نفس المعلومة. وتعدي الأيام وتبدأ الحالة تتدهور أكتر وأكتر، وبدأت تفقد بصرها تدريجيًا، وفقدت كمان السمع، وبقى يحصلها نوبات هياج وبكاء بدون سبب. وفي خلال الفترة دي، اكتشف الفريق الطبي اللغز اللي قَلَب أمريكا كلها. سنة (١٩٤٨) وفي ولاية نيويورك الأمريكية، اتولدت طفلة اسمها كارين ويترهان، وفي فترة طفولتها كانت طالبة متفوقة جدًا، كبرت ودخلت الجامعة وخدت البكالوريوس، وبعدها الدكتوراه، وده أهِّلها إنها تنضم لهيئة التدريس في جامعة (دارتموث) كأستاذة كيميائية. وفي الوقت ده كارين كانت تعتبر من أكتر العلماء البارزين في دراسة تأثير المعادن الثقيلة السامة على جسم الإنسان. حياتها العملية كانت ماشية بشكل طبيعي، وشايفة شغلها كويس، لحد ما نوصل ليوم ١٤ أغسطس سنة (١٩٩٦) وفي اليوم ده، اتطلب من كارين تعمل تجربة أو بحث علمي. والتجربة دي كانت بتتطلب استخدام مركب عضوي اسمه (ثنائي ميثيل الزئبق) وبالفعل، عملت التجربة بتاعتها وخلصت شغلها والدنيا كانت تمام، ولحد هنا مفيش أي حاجة غريبة. لكن بعد تقريبًا ١٥ يوم من التجربة دي، بدأ يظهر عليها أعراض غريبة: وجع واضطرابات في المعدة، مع تنميل خفيف في الأطراف، وأحيانًا صعوبة في الحركة، وتشوش في الرؤية. في الأول، الأعراض كانت بسيطة لدرجة إن كارين تجاهلتها ومديتهاش أي أهمية، لكن يعدي خمس شهور تقريبًا، وبعدها الأعراض زادت بطريقة حادة، وده اللي خلاها تروح المستشفى زي ما قولنا في البداية. الدكاترة لمّا شكّوا إن ممكن يكون حصلها عملية تسمم مدبرة، أكدتلهم إن ده محصلش، فبدأوا يسألوها عن طبيعة شغلها لو اتعرضت لأي مركب كيميائي سام أو حاجة من النوع ده. برضو أكدتلهم إنها بتتبع بروتوكولات السلامة أثناء التجارب اللي بتعملها، بس في وسط الكلام قالتلهم حاجة غريبة: إنها من خمس شهور كانت بتعمل تجربة ما، وأثناء نقلها لمركب (ثنائي ميثيل الزئبق) عن طريق الأنبوب المخبري، وقع على إيديها الشمال نقطتين من المركب ده، بس النقطتين دول وقعوا على القفازات اللاتكس اللي هي لبساها، فبسرعة قلعت القفازات دي وعقَّمت إيديها كويس، ورجعت كملت شغلها. وده البرتوكول المتبع في المواقف دي. الأطباء لمّا سمعوا منها الكلام ده، بسرعة أخدوا عينات دم وبول وشعر؛ عشان يتعملها تحليل المعادن الثقيلة، وتحديدًا تحليل الزئبق. وكانت الصدمة المرعبة، لمّا ظهرت نتائج التحاليل المخبرية. التحاليل أظهرت إن نسبة الزئبق في دمها مرعبة وفلكية، وده واحد من أكتر المواد سُميَّة على وجه الأرض، النسبة وصلت لأضعاف الحد الطبيعي والقـ ـاتل بمئات المرات، وكان التشخيص النهائي هو (التسمم الحاد بالزئبق العضوي) في الوقت ده بدأ الأطباء يدوها علاج مكثف؛ عشان يطرد الزئبق من الكلى، لكن بسبب إن الزئبق كان بقاله شهور في جسمها واستقر في الجهاز العصبي، وبسبب إنه تم اكتشافه متأخر، العلاج ماجبش معاها أي نتيجة. حالتها كانت كل يوم بتزداد سوء، بكاء وهياج بدون سبب، لدرجة إن الدكاترة قالوا إنها وصلت لمرحلة فقدت فيها حتي الإحساس بالألم، وتستمر تدهور حالتها لحد ما تدخل في غيبوبة تامة، وفي يوم ٨ يونيو سنة (١٩٩٧) ماتت كارين. بس مع بداية تدهور الحالة، أوصت الأطباء وزملائها، ووجهت ليهم رسالة بمنتهى الحسم، قالتلهم فيها: "افحصوا ما حدث لقفازي، أخبروا العالم بما جرى لي، ولا تدعوا باحثًا آخر يلقى هذا المصير" وبعد وفاة كارين اتعملها تشريح كامل، وبعد فحص المخ لقوا تأثير ثنائي ميثيل الزئبق عليه: عمل ترقق شديد في قشرة المخ، وضمور واضح في المُخيخ، وفقدان واسع للخلايا العصبية. واتضح بعد كده، إن القفازات اللاتكس اللي كان بيلبسها العلماء وقتها، قادر يخترقها ثنائي ميثيل الزئبق خلال ١٥ ثانية، ويدخل الدم. وبسبب القصة دي، اتغيرت معايير جذرية في إجراءات السلامة في المختبرات حول العالم، واتفرض قفازات بلاستيكية سميكة تمنع تسرب المركبات الكيميائية. هسيبلكم في التعليقات مقارنة بين شكل مخ الإنسان الطبيعي، وشكل مخ كارين بعد الواقعة دي. ✍️/ محمد المغربي

مقالات ذات صلة

أحببت شسيطان

كانت راجعة

ملياردير خليجي

ياسين ومريم ج٢

الجرسونة الفقيرة

قلبه لا يبالي ٢٥ للنهاية

اترك تعليقاً إلغاء الرد