أحببت راعيه غنم ج٢

طوال اليوم كانت شاردة حزينة
نور :ياسمين يلا عشان تلبسى الناس قربت تيجى
ياسمين بتذمر:حاضر هقوم
نور :فين الابتسامة ..هتقابلى الناس كده
ياسمين :اذا كان عاجب ..انا اصلا مش عايزة اخرج
نور :طيب براحتك ..يلا روحى عشان عمتو علا هتزعق
ذهبت ياسمين لتغير ملابسها
بينما ذهبت نورلعمها
سامح :راحت تغير ..ولا لسه قاعدة
نور :عيب عليك يا عمى انا نور برضو
ثم غمزت له بعيناها :بس ايه القمر ده هو مين العريس
ضحك سامح :بس يا بت يا بكاشة ..تسمعك علا تقول ايه
يلا روحى انتى غيرى
نور :ليه يا عمو هو انا هقعد معاكو
سامح :ايوه طبعا يا حبيبتى يلا بسرعة
________
صفوا سياراتهم فى الخارج واستقلوا منها
عمر بتوتر :ادهم كله مظبوط ولا ايه حاسس ان الجرافت مش معدوله
ادهم بجدية :ممكن تبطل توتر بقى ..اطمن كله مظبوط يلا ندخل بقى ولا هنفضل واقفيين
رمزى :يلا بقى يا عمر انت جايبنا عشان توقفنا بره
عمر :طيب يلا ..ادهم هات بوكيه الورد
احضره ادهم من سيارته
*********
استقبلوهم بترحاب وجلسوا فى غرفة الصالون
وكأى اسرة مصرية اصيلة بعد ما رحبوا بهم بدأوا الحديث عن العمل
على : وحضرتك يا استاذ رمزى بتشتغل ايه
رمزى :اولا يا حاج انا زى ابنك فبلاش استاذ دى
انا مهندس بترول فى شركة …
على :اه ..سمعت عنها مش دى اللى فى الامارات
رمزى :ايوه ياحاج منا بشتغل هناك
همس عمر لادهم :وبعدين هو بابا نسى الموضوع اللى جايين فيه …هيفضلوا يتكلموا فى الشغل
ادهم بجدية :متقلقش دى البداية ..اسكت بقى
وبعد ما انتهوا من الحديث عن العمل
عمر لوالده :ايه يا بابا مش هتفاتحهم فى الموضوع
رمزى بجدية :احم ..حاج على انا كنت جاى النهاردة عشان
اطلب ايد الانسة ياسمين لعمر ابنى .
على بأبتسامة :انا والله يابنى معنديش مانع لانى عارف عمر كويس ..وبعتبره زى احفادى
لكن الرأى ده لسامح ابو ياسمين
رمزى :اه طبعا …وانا عايز اعرف ردك يا استاذ سامح
سامح :انا مبدئيا موافق ..لانى عارف اخلاق عمر ..وانا مش هلاقى لبنتى احسن منه ..بس بردو الرأى رأيها
تدخلت سارة والدة عمر :طيب هى العروسة فين
علا بأبتسامة :ثوانى هندهلها
ذهبت علا اليها وجدتها جالسة لا مبالية ونور واقفة بجانبها
علا :يلا يا ياسمين الناس بره المفروض تدخلى
نهضت ياسمين :حاضر
اتت زينب وهى حاملة صينية موضوع عليها اكواب العصير
زينب :خدى يا ياسمين دخليها
ياسمين بحنق :يا عمتو هتقع منى ..دخليها انتى يا نور
نور :وانا مالى هو انا العروسة وبعدين اجمدى كده انتى خايفة من ايه
علا بصرامة :ياسمين انتى مش صغيرة عشان تقع منك يلا شيليها واخرجى
كانت تسير وهى ناظرة فى الارض قامت بإعطائهم و جاءت لتعطى عمر
عمر بأبتسامة :شكرا ..بس ارفعى راسك لتوقعيه علينا
لم تصدق اذنها هل هو حقا عمر ..نظرت اليه لا شعوريا
ثم ابتسمت لكن ارتجفت يدها وكادت ان تسقط الصينية من يدها لكن امسكت بها نور التى كانت خلفها :امشى هتفضحينا
اخذت منها الصينية واكملت هى لتعطى ادهم
وقبل ان يتناوله ادهم :ياريت ميكنش مصيره زى الشاى فاكرة
ثم تناوله منها …ابتسمت نور عندما تذكرت وذهبت لتجلس بجانب والدتها
قالت سارة :تعالى اقعدى جنبى يا حبيبتى
جلست ياسمين بجانبها ..قبلتها سارة :ماشاء الله يا حبيبتى زى القمر
خجلت ياسمين ونظرت ارضا
وبعد ما تحدثوا خرجوا جميعا ليتركوهم
ظلت ياسمين ناظرة فى الارض ولم تتحدث
نهض عمر ليجلس على كرسى بجوارها
عمر :ياسمين هتفضلى باصة فى الارض ولا ايه
نظرت له ياسمين بخجل :نعم
ابتسم عمر لخجلها :انتى مش عايزة تعرفى عنى اى حاجة
ياسمين :مش عارفة قول انت
عمر بجدية :انا عمر رمزى السيوفى 24 سنة خريج ادارة اعمال وبشتغل فى شركة الحسينى ..وانتى بقى
ياسمين بحرج:انت عارف اسمى طبعا عندى 20 سنة ولسه بدرس فى السن والسنة دى ان شاء الله هبقى فى تالته..بس كده
ثم اسطردت قائلة :هو انت بتصلى ولا لأ
عمر بأبتسامة :اه الحمدالله الفرض بفرضه ومش بدخن
ومش بتاع بنات..وابن حلال اه والله وطيب خالص
ابتسمت ياسمين خجلا وكادت ان تنهض
عمر مسرعا :رايحة فين ..احنا لسه مخلصناش
وقفت ياسمين :نعم فى حاجة تانى
وقف امامها :انتى موافقة عليا ولا لآ
تعجبت ياسمين فقالت وهى تنظر فى الارض :هتعرف من بابا
وركضت سريعا