أحببت راعيه غنم ج٢

البارت ال 18

وصلت نور وياسمين ووقفوا فى الحديقة
نور :يلا انتى خبطى
ياسمين :لا والله ماحد هيخبط غيرك
نور :انتى اللى جاية معايا يلا انتى
جاء ادهم من خلفهم :هتفضلوا تتعازموا على بعض كتير مين اللى هيخبط

انتفضوا هما الاثنين ليلتفتوا اليه بذعر
ياسمين :خضتنا يا استاذ ادهم
ابتسم هو قائلا :مش قصدى ..بس انتوا بتتعازموا على اللى يخبط
ثم قام بفتح الباب لهم
ادهم :اتفضلوا ادخلوا ..
ياسمين متسائلة :هى ايسل والين جوه
ادهم :اه. .ادخلوا ولا انتوا هتفضلوا واقفين على الباب
قالت نور لياسمين بصوت خافت:ادخلى انتى وانا هاجى وراكى
ياسمين :رايحة فين وسيبانى
نور :هقولك بعدين يلا ادخلى
انصاعت ياسمين لها ودخلت بينما نور التفتت لأدهم
ادهم :نور انتى مش هتدخلى
نور :ممكن اتكلم معاك شوية
ادهم :اه طبعا ..تحبى نتكلم جوه ولا فى الجنينة
نور :اى حته
ادهم :طيب تعالى ..واتجه نحو الحديقة وهى خلفه
جلسوا سويا على احد المقاعد الموضوعة فى الحديقة
ادهم :كنتى عايزانى فى ايه
نور : ادهم ..اقصد استاذ ادهم ..حضرتك فهمت غلط لما شوفت ياسين كان مع ايسل ..هو بس عشان عارف انها متعرفش حاجة هنا ..فمشى معاها يوصلها لحسن تتوه …
بس هى دى الحكاية
ظلت صامتة لبضع ثوان ..ثم رفعت رأسها لتنظر اليه وجدته معلق نظره بها
نور بحرج :حضرتك ساكت ليه
ادهم :وانتى بقى جاية مخصوص عشان تقولى كده
نور :بصراحة اه ..انا خوفت لتزعقلها او تحصل مشكلة
ادهم :لا اتطمنى
نور :طيب الحمدالله انا كده اطمنت ..ثم قالت بأبتسامة وهى تنهض :بعد اذنك هطلع انا لأيسل
وبعد ما سارت عدة خطوات ..اوقفها هو مناديا
ادهم :استنى يا نور ..
التفتت اليه :نعم ..
ادهم : اه بالنسبة لأستاذ دى ..انا اسمى ادهم مش استاذ اوكيه
نور :لا طبعا انت اكبر منى ولازم الاحترام بردو
ادهم :وهو انتى لما تنادينى بأسمى يبقى مش بتحترمينى
وبعدين كلمة استاذ دى عامله زى الطربوش ..والفرق ما بينى وما بينك مش كبير اوى يعنى
ابتسمت نور :خلاص هحاول يا استاذ ادهم …يوووه هحاول يلا انا طالعة وتركته وركضت
بينما هو ابتسم وجلس ليفتح اللابتوب الخاص به
_______
دخلت ياسمين وكانت تجول بعيناها فى المكان فلم تجد احد
ياسمين :منك لله يانور عشان تسبينى لوحدى ..وبعدين هو التانى يسبنى ادخل كده مش يدخلنى ..اعمل انا ايه دلوقتى اخرج تانى يعنى
استدارت لترحل
لكن سمعت صوت حركة خلفها فألتفتت لم ترى احد
فركضت فى اتجاه الباب
لكن كان عمر اسرع منها ووصل قبلها :رايحة فين
صرخت ياسمين ثم وضعت يدها على فمها
بينما هو انفجر من الضحك
ياسمين بصوت عال نسبيا :انت مجنون مبتفهمش ..فى حد يعمل كده..وبعدين انت بتضحك على ايه
انقلب وجه عمر وقال بجدية بصوت اجش :طولة لسان مش عايز فاهمة ..انا كنت بهزر معاكى
تراجعت للخلف بخوف من نبرة صوته لكن حاولت ان تدارى خوفها
قائلة :مهو مفيش حد بيهزر بالطريقة دى ..وبعدين انت مين عشان تهزر معايا
خرجت ايسل من غرفتها :فى ايه ..ثم قالت بتعجب عندما نظرت لياسمين : ياسمين انتى اللى صرختى كده
ياسمين : اه انا اسفة بس ابن خالتك خضنى
ضحكت ايسل :طب تعالى ادخلى ..اصل هو دايما كده
اتت نيفين :فى ايه يا ولاد مين اللى صوت كده ..
ايسل :انا يا ماما اللى صوتت اصلى شوفت صرصار
نظرت نيفين لياسمين بأستغراب :مش انتى
قاطعتها ايسل :دى ياسمين بنت استاذ سامح المنشاوى
نيفين مبتسمة :اه اهلا يا حبيبتى ..دخليها يا ايسل اوضتك اقعدوا جوه
ايسل وهى تشد ياسمين من يدها :يلا يا ياسمين
اخذتها وذهبت بها لغرفة الين..وبعد ما جلسوا
الين متسائلة :اومال فين نور
ياسمين :مش عارفة هى كانت معايا بس قالتلى هتعمل حاجة وتيجى
ايسل :بس بجد منورانا
ياسمين :الله يخليكى يا ايسل ..
************_
طرقت نور الباب
ففتح لها عمر ..عمر :ازيك يا نور
نور :تمام الحمدالله ..
عمر :ادخلى ياسمين قاعدة جوه مع البنات
قبل ان تدخل الغرفة سلمت على نيفين
وطرقت الباب ودخلت
نور بأبتسامة :ممكن ادخل
الين :اكيد تعالى ..
نور وهى تجلس بجانب الين :عاملين ايه
الين \ايسل :الحمدالله كويسيين
ايسل :كنتى فين يا نور
نور :هقولكوا ..وقامت بسرد ما قالته لأدهم
وظلوا يتحدثوا سويا
قاطعهم دخول نيفين
دخلت نيفين وهى مبتسمة وحاملة صينية عليها اكواب العصير
نيفين :يلا بقى دوقوا وقولولى رأيكم ده مش عصير عادى
ياسمين :طلاما حضرتك اللى عملاه هيبقى حلو
نيفين :طب يلا اشربوا
وتركتهم وذهبت
ما ان ارتشفوا منه القليل حتى سعلوا
وبعد مدة من الوقت
ياسمين :الساعة كام يا الين
الين :4
ياسمين :احنا اتأخرنا يلا يانور
ايسل :لسه بدرى يا ياسمين خليكوا شوية
نور :ان شاء الله المرة اللى جاية يلا مع السلامة
ايسل :احنا اسفين يا جدعان على العصير
فضحكوا جميعا
فقالت ياسمين :هو فعلا مش عادى
_________
كانت نور متأبطة ياسمين وهما يسيرون
نور :ياسمين انتى كنتى بتبصى على ايه واحنا ماشيين
اوعى تنكرى انا كنت واخدة بالى
ياسمين :مكنتش ببص على حاجة
نور:كده هتكدبى عليا
ياسمين :مش بكدب عليكى ..كل الحكاية انى زعقت لعمر قبل ما انتى تيجى
نور بدهشة:ايه اللى حصل
قصت لها ياسمين ما فعله ..فضحكت نور
ياسمين :بصى عشان كده مكنتش عايزة اقولك
نور :مش قصدى بس فكرنى بياسين واللى بيعملوا فينا
ياسمين :طب هو انا كده غلطت
نور :بصراحة اه مكنش المفروض تغلطى فيه ..اصلك انتى متعودة تشتمى اخوكى وعمر مش اخوكى
واى راجل مبيستحملش واحدة تغلط فيه ..
ياسمين :ليه ما ياسين مهرى مننا
نور :لا ياسين عارف ان ده هزار مننا ..واكيد طبعا احنا مش هنغلط فيه بجد ..واقولك على حاجة ياسين يستاهل بصراحة
على اللى بيعمله فينا
–
-___________
فى المساء
كانت ايسل جالسة امام النافذة وتحتسى فنجان من القهوة
دخل ادهم بعد ان طرق الباب
نظرت اليه ايسل بعتاب ثم نظرت امامها مره اخرى
ادهم :مش قولت قبل كده متشربيش قهوة
واخذ منها الفنجان ووضعه على الطاولة
وجلس على مقعد بجانبها
ادهم :مين اللى المفروض يزعل
انا ولا انتى دلوقتى
ايسل :يسلام وانت تزعل ليه هو انا كنت زعقتلك
ادهم :طب انتى اللى عملتيه ده صح
ايسل :منا قولت انى غلطت ومعترفة بغلطى ..لكن انت فضلت تزعق
ضمها ادهم اليه :انا كنت متضايق يا ايسل..وبعدين لما شوفت ياسين ماشى جنبك اتنرفزت
ايسل بعفوية :على فكرة ياسين محترم جدا ..
ادهم :يسلام وايه كمان
ايسل :والله يا ادهم انا بعتبره زيك
ادهم :طيب خلاص متزعليش ..منا بقولك كنت متضايق
وانتى اللى كنتى اودامى فطلعت كل حاجة فيكى انتى
وبعدين ان ما كنتش ازعقلك اومال ازعق لمين
ابتسمت ايسل :لايسل طبعا
_________
تسللت اشعة الشمس لتعلن عن قدوم يوم جديد
بعد ما تناولوا الفطار ذهب على الى المزرعة هو واولاده
زينب :نور انتى رايحة فين باللبس ده
نور :ابدا هتمشى شوية
زينب :يسلام ..بصى الكدب طالع من عينك ..انتى رايحة مع عم جابر ..انتى مش قولتيلى انك مش هتروحى تانى
نور :انا قولت لبابا وهو وافق
زينب :وانا ماليش كلمة يعنى
نور :والله لا يا ماما وانتى عارفة كده ..بس انتى عارفانى من صغرى وانا بحب العب مع الخرفان
تدخلت سعاد التى كانت تستمع لهم وهى جالسة :سيبيها يا زينب تخرج شوية ..وبعدين دى اجازة خليها تعمل اللى عايزاه
نور وهى تنظر لوالدتها :ها موافقة
زينب بنفاذ صبر : يعنى هقول ايه ..خلاص روحى بس عارفة لو اتأخرتى
نور :مش هتأخر والله
اتت ياسمين قائلة :مش يلا يا نور
زينب :ده انتوا متفقين بقى
_______
فى المزرعة
كان احمد جالس مع الحاج على يحتسون الشاى
احمد :كده ان شاء الله على اخر الشهر هتكون كل حاجة خلصت
على :اه ان شاء الله
فلمح عم حسين اتى ناحيتهم
الحاج على :اهلا يا حاج حسين اتفضل
حسين :الله يخليك يا حاج على ازيك يا استاذ احمد ..انا روحتلكم الفيلا سألت عليكم قالولى انكم هنا
على :خير كان فى حاجة
حسين بفرحة :جاى اعزمكم على سبوع ابن بنتى بعد بكرة ان شاء الله فياريت تيجوا
احمد وعلى :ان شاء الله
حسين :طب استأذن انا
___________
جالس بجانبه فى السيارة ينظر من النافذة بضيق
ادهم :مالك يا عمر انت من امبارح وانت كده
عمر بضيق :مفيش حاجة يا ادهم
ادهم بأصرار :على فكرة باين انك فيك حاجة عشان انا مش متعود عليك وانت كده
عمر :ابدا مفيش ..يعنى اهزر مش عاجب اسكت مش عاجب
اعمل ايه يعنى
ادهم :انا هسيبك دلوقتى بس لكن لما نروح مش هسيبك غير لما تقولى
ابتسم عندما نظر امامه فوجد نور واقفة فى وسط الغنم والابتسامة على وجهها كأن المشهد يتكرر للمرة الثانية
فهى مرتدية نفس الملابس وتلعب مع الغنم فى وسط الطريق
اخرجه عمر من شروده :مش دى نور وياسمين
ادهم :اه هما …فتح نافذة السيارة واخرج رأسه مناديا
ادهم بأبتسامة :لو سمحتى يا راعية تفتحيلنا الطريق
التفتت نور وابتسمت عندما رأته :ثوانى طيب …
قال عمر :ايه يانور غيرتى نشاطك ولا ايه
ضحكت نور :حاجة زى كده
وقامت بأبعاد الغنم عن الطريق
كانت ياسمين تختلس النظر لعمر..فتجده ناظرا بعيدا ..
اقترب ادهم بالسيارة نحو نور :مش قولتلك لايق عليكى الدور
نور :طيب امشى بقى بدل ما اقلب عليك
ادهم بأبتسامة:يلا سلام
بعد ما رحل ..ابتسمت هى ثم التفتت حولها لتبحث عن ياسمين
وجدتها جالسة بعيدا بعض الشئ
فأتجهت نحوها وجلست امامها
نور :مالك مكشرة ليه
ياسمين :مفيش حاجة
نور بخبث :والله ..طيب هعمل انى مصدقة ان مفيش حاجة
-_________
فى المساء
جلسوا جميعا فى الحديقة
فأردف على :حضروا نفسكم بعد بكرة هنروح سبوع حفيد الحاج حسين
بدت الفرحة على وجوههم
لكن كان هناك من يحاول ان يرسم الابتسامة على وجهه
وقلبه يبكى