ضرتي بقلم اماني السيد 1

المرة الأولى لما ضرتي ولدت، قلت معلش.. إنسانية ومساعدة. المرة التانية، اتكسرت من كلامهم اللي كان زي السم، وبقيت أغير الملايات وأعمل الأكل وأنا بدمع في المطبخ. بس لما حملت للمرة التالتة، افتكروا إن خلاص، ضهري اتكسر وبقيت الخدامة المطيعة اللي بتبوس إيدهم عشان سايبينها على ذمة راجل.

جوزى اتجوز واحده تانيه بحجه إنه يخلف عشان أهله بيزنوا عليه وفعلاً وافقت وهو اتجوز وبعد ٩ شهور خلف وقت حمل مراته الاول كنت تحت رجلها زى الخدامه عشان تولد بالسلامة وجوزى يفرح بالعيل الاول كنت اقف اطبخ بالساعات الاكل اللى نفسها بتروح ليه حتى لو مش بحبه عشان هى تاكل وجوزى كان بيأكلها فى بقها بنفسه وبعد ما خلفت الاولانى معداش ٣ شهور وحملت فى التانى وجوزى وقتها حس إنه امتلك الدنيا فى ايده وبقى يخيلنى اراعى الطفل الاول غير شغل البيت وهى كان ليها الدلع كانوا يخرجوا ويسبونى فى البيت مع ابنهم اللة مكملش الاربع شهور وهما بيتفسحوا عشان

نفسيتها ماتتعبش وانا مش مهم المهم هى عشان هى اللى حامل وخلفت العيل التانى بقيت طول الليل سهرانه بالطفلين وهى نايمه بترتاح وبعد خمس شهور تانيين حملت فى العيل التالت ووقتها جوزى مبقاش شايف حد غيرها لما كلمته وقولتله انا تعبت لقيت ملامحه اتغيرت وقالى انى بغير منها عشان بتخلف وانا لأ وانها هى السبب أنى ارفع عينى فى وسط العيله بعد ما أنا بعدم خلفتى وطتها وخليت الناس تشك إن العيب منه هو وانها هى سبب إن الناس تعرف أنى ماعنديش مشاكل

هى سمعت كلامه واستغلت الكلام ده عشان تبعده عنى اكتر وتخليه خاتم فى صباعها اكتر كانت تنادى عليه وهى قاعده على السرير وتؤمرنى انضفلها اوضتها واغسل هدومها على ايدى مش فى الغساله ولما كنت ارفض كانت تروح تدلع عليه وتغير كل الكلام وهو كان يجيى عليه بسببها لما كنت اتعب من ولادها واقولها امسكيهم شويه عشان أنام وارتاح كانت تزعقلى وتتصل بجوزى وتقوله إن طول ماهو فى الشغل انا برميلها العيال وهى مش عارفه تنام وتعبانه من قله النوم وخايفه البيبى يحصله حاجه كان جوزى يجيى من الشغل زى المجنون ويتخانق معايا ويدخل يراضيها ويبوس اديها عشان ماتزعلش فى يوم

كانت قاعدة على الكنبة ببرود تتفرج على التلفزيون، والعيال بيلعبوا في الأرض وبيرموا اللعب حواليها وهي ولا هي هنا، حاطة رجل على رجل . أول ما سمعت صوت خطوات جوزي وهو داخل الشقة شايل أكياس طلباتها، بصتلي بنظرة كلها لؤم وشماتة، ولقيتها بتنادي عليا بصوت عالي وفي نفس الوقت متصنع التعب: — هناء “هاتيلي طبق ماية دافية بملح وتعالي اغسليلي رجلي هنا.. مش قادرة أقف عليها من التورم، وأنا حامل وما باخدش راحة في البيت ده!”