انا وبنتي حكايات جيجي

اياد… لا هو انا ما اعرفش حاجه انصحك بيها… بس انا متاكد ان انتى فاهمه الموضوع غلط يعني.. مامتك مش كده.. دى ست محترمه…
ملك بضيق…. يا استاذ بقولك مش فاهمه غلط.. بص لو انا فاهمه غلط مش كان هى قالتلى انى فاهمه غلط.. هى بقى ما قالتليش ان انا فاهمه الموضوع غلط وقالتلي كده بالنص… ما لكيش دعوه انا حره في حياتي.. دى حياتى وانا حره فيها.. انت ليه مكدبنى.. ليه مش بتصدق عليها حاجه..
اياد… لا مصدق يعني انا هكدبك ليه بس… والله انا مش عارف اقولك ايه… طب يعنى هى مامتك كانت بتفتح معاكي موضوع الجواز… ما قلتلكش قبل كده ان هي عايزه تتجوز حد تاني بعد باباكى الله يرحمه..
ملك… ما حدش بيتقدملها ما حدش جيه يتجوزها علشان هم عارفين انها ست مش كويسه…
اياد.. ايه يعني مش بيجولها وهى بترفضهم علشانك.. احم يعني عشان تفضل معاكي…
ملك… مين اللي قالك الكلام ده هي اللى قالتلك كده هو انت اتكلمت مع ماما في الموضوع ده..
اياد.. يعني اه مره كنا بنتكلم عادي وسالتها انه حضرتك ما اتجوزتيش.. كنت فاكر يعني ان هي بعد ما باباكى مات اتجوزت.. من باب التعارف بس.. فقالت انه هي ما كانتش حابه تسيبك فما رضيتش تتجوز..
ملك… لا هي كانت بتكذب عليا بنفس الكذبه دي وبتقول كده… بس الحقيقه انه لا هي ما حدش جالها اصلا عشان هم عارفين سمعتها كويس…
اياد.. طيب يا ستي على العموم انتى روحي دلوقتي وربنا يسهل بقى..
ملك.. ماشي يا مستر معلش صدعتك…
اياد.. لا ولا يهمك فى اى وقت..
ملك طلعت من عندو.. ورجعت على البيت وكانت مامتها محضره الغدا وقالت….
يلا تعالي يا بنوتي علشان هنتغدى سوا..
ملك… انا مش عايزه اكل.. انا اكلت في المدرسه كلى انتى
صباح. .. وبعدين معاكي يا بنتي بتوجعى قلبي معاكى ليه هو ايه اللى مش عايزه اكل. كلت في المدرسه مش عايزه افطر هفطر في المدرسه… مش عايزه اتعشى لو جعت بالليل هبقى اكل.. كلو ما ليش نفس انتى ما بقيتيش تقعدي معايا خالص… هو انا زعلتك في حاجه يعني.. طب لو انا زعلتك في حاجه قوليلي مش انا باجي اقولك انتى قلتى كذا وقلتى كذا وبعاتبك على الحاجه اللي تزعلني.. ليه مش بتعاتبينى على الحاجه اللي تزعلك.. تاجى قوليلي يا ماما انا زعلانه منك عشان كذا… وانا هصلح الحاجه دي والله اكيد اكيد زعلتك من غير قصدي…
ملك.. لا يا ماما مش زعلانه بس ماليش نفس..
ودخلت اوضتها وقفلت الباب.. وصباح قعدت بضيق..
عند اياد كان قاعد مع بواب العماره وهو بيسال وبيقول…
هى كويسه يعنى مش بتتكلم مع حد..
البواب… لا لا خالص والله الست صباح بصراحه كده ست دغري في حالها وما بتتكلمش مع اي حد حتى لو اتكلمت مع راجل بيبقى في سياق الحديث بس مش اكتر.. اللي هو مثلا صباح الخير مساء الخير وبس.. انا بشوفها بكون قاعد هنا لا حد غريب دخل ولا حد طلع.. ولا بنشوفها بتتكلم اصلا مع حد من سكان العماره.. انا بواب هنا بقالي اكتر من 30 سنه يا بيه من ساعه ما سكنت عمرها ما عملت اي تصرف وحش بصراحه.. حتى كمان بنتها متربيه تربيه كويسه لا لا حضرتك ما عندناش الاخلاق دي في عمارتنا الحمد لله..