روماني مكرم 3
تكملة أحداث القصة – الجزء الخامس:
وقفت مشلولة في مكاني والصندوق الخشب تحت باطي، والناس في الشارع عمالة تتهامس وتتفرج على أخويا الكبير وهو متكلبش وخارج وسط العساكر. المعلم فرج كان واقف على جنب ساند على عصايته، وعلى وشه ضحكة شماتة وانتصار ترفع الضغط.
لمحتني نيرمين من البلكونة، صرخت بأعلى صوتها وهي بتعيط: “إلحقي أخوكي يا نادية! عملوا له كمين جوه البيت وأنا عاجزة مش قادرة أنزل أمنعهم!”.
في اللحظة دي، عمي الحاج غريب نزل من العربية وبخطوات ثابتة وهيبة كبار السن، شق زحمة الناس ووقف قدام الظابط وقال بنبرة قوية هزت الشارع: “استنى عندك يا حامض السلك! خد عندك الورق ده وشوف مين فينا اللي المفروض يتكلبش ويتجر على التخشيبة!”.
الظابط بص لعمي باستغراب وقال: “أنت مين يا حاج؟ وإيه الورق ده؟ إحنا معانا أمر ضبط وإحضار رسمي بناءً على جنحة شيكات وإيصالات أمانة صادرة ضد المتهم عصام متولي”.
عمي غريب سحب الأوراق القديمة واللفافة من الصندوق الخشب بكل ثقة، ورماهم قدام الظابط وقال: “أنا غريب متولي، عم المتهم.. والورق ده هو عقد ملكية الأرض الأصلي، اللي بيثبت إن أبو المعلم فرج بايع نصيبه لأبويا وأخويا متولي من سنة 1995 وقابض تمنها كامل. المعلم فرج مستغل إيصالات أمانة تجارية عشان يلوي دراع الواد ويجبره يبيع بيت عيلة كامل مبني على أرض ملهاش علاقة بيه! دي مش قض..ية ديون وبس يا باشا، ده لوى دراع وابتزاز وتدليس عيان بيان، والمعلم فرج جابك لحد هنا عشان يعمل نمرة قدام أهل البلد ويجبرنا نمضي على البيع!”.
المعلم فرج وشه قلب ألوان، والضحكة طارت من على شفايفه، وقرب على الظابط وبدأ صوته يرعش: “كلام إيه ده يا باشا؟ ده ورق مزور! أنا ليا 400 ألف جنيه عند الواد ده، ودي إيصالات حقيقية وهو ماضي عليها بنفسه والشرع والقانون معايا!”.
أختي الكبيرة صرخت وسط الناس: “حقك هتاخده يا فرج! الدهب أهو والفلوس جاهزة تفك رقبة أخويا حالا.. بس سيب البيت في حاله!”. فتحت الشنطة ووريت الظابط والناس سبائك الدهب القديمة اللي خرجت من الصندوق.
الظابط، ذكاؤه وخبرته خلوه يفهم اللعبة عل طول؛ بص للمعلم فرج بنظرة شك قاسية وقاله: “المحضر اللي معاك محضر ديون وشيكات، والناس عارضين السداد حالا والدهب موجود.. لكن حكاية إجبارهم على بيع البيت ودخول الأرض في الموضوع دي فيها كلام تاني خالص يا معلم فرج، والورق ده هينزل النيابة بكره مع المتهم عشان يتحقق فيه بتهمة الابتزاز العقاري”.
