حرامية اكتشفو لغز صادم
تخيّل إن في حرامية دخلوا يسرقوا بيت في أمريكا، وبالصدفة كشفوا لغز ق.ضية تانية خالص كانت مقفولة ومحدش كان يعرف عنها حاجة، وبسبب الأحداث الدرامية والصدمات الغير متوقعة في القصة دي، بقت ق.ضية رأي عام!
الحكاية بتدور سنة (٢٠٢١) في أمريكا، وتحديدًا في بلد صغيرة وهادية جدًا اسمها (فريتاون-ولاية أنديانا)
كان بيعيش في البلد الصغيرة دي واحد اسمه (هارولد ألين) وكان مشهور وسط صحابه والجيران بـ (بينت) وعمره كان ٥٢ سنة.
بينت كان راجل ضخم البنية، لكنه في نفس الوقت كان هادي جدًا وفي حاله وعايش لوحده في بيته، وكان معروف وسط الناس كلها إنه شخص طيب ومالوش علاقة بأي مشاكل.
لحد ما يجي في يوم من الأيام وبالصدفة يجمعه لقاء بصديقته القديمة في الثانوية، وكان اسمها (مارشا بوكستون)
لقاء كان حار جدًا، واستعادوا فيه ذكريات الدراسة، وبدأ كل واحد يحكي للتاني عن حياته.
بينت قال لـ مارشا إنه بقاله سنين عايش لوحده بعد ما انفصل عن زوجته وعائلته، وقد إيه هو حاسس بالوحدة.
وتقريبًا، وضع الاتنين كان متشابه؛ لأن مارشا هي كمان كان بقالها سنين منفصلة عن زوجها وعايشة هي وبنتها (أشلي جونز) في بيت ريفي لوحدهم.
وبعد ما كل واحد حكى للتاني عن ظروفه واستعادوا ذكرياتهم القديمة، اتفاجئت مارشا إن بينت بيقولها: إيه رأيك بما إننا ظروفنا متشابهة نتجوز، أنا بصراحة معجب بيكي من وقت ما كنا مع بعض في المدرسة.
ردت عليه مارشا وقالتله: ماشي معنديش مانع.
وبالفعل، بعد فترة صغيرة اتجوزوا، وراح بينت عاش مع مارشا في بيتها، ومعاهم بنتها أشلي وكلهم بقوا عيلة واحدة.
وزي ما يكون هي دي الحياة اللي كانوا بيدور عليها همّا الاتنين، حياتهم كانت سعيدة جدًا ومستقرة وماشية بشكل طبيعي، لكن بعد كام شهر، وفي يوم من الأيام تتفاجئ مارشا إن بينت عمال يتقيأ بشكل مستمر وجسمه كله بيترعش وضربات قلبه سريعة.
بسرعة أخدته وراحت بيه قسم الطوارئ في المستشفى، وهناك الأطباء كانوا محتارين في حالته، لكن بعد الكشوفات والتحاليل، الدكتور قال إنه بس عنده شوية التهابات قوية في المعدة. وقعد كام يوم في المستشفى لحد ما بقى كويس، وبعدين رجع على البيت.
استرد بينت صحته، وحياته رجعت تاني طبيعية.
لكن يعدي فترة صغيرة، وفي يوم كان بينت سهران مع مارشا ومشغلين مزيكا ومبسوطين، فجأة يصرخ بينت ويقول لمارشا إن كليته بتوجعه جدًا، ومش قادر يتنفس!
