حورية البحر حكايات انجي1
خبط على الباب، ولما سيد فتح ولقى وشه أصفر وهدومه متبهدلة وريحتها دخان و يود بحر، اتخض:
إيه ده يا محمد؟! مال شكلك عامل كده ليه يا ابني؟ إنت مش المفروض في ورديتك في الغردقة؟
محمد دخل وقفل الباب وراه بالمفتاح، وسحب كرسي وقعد وهو بيلهث:
اقفل الشبابيك وشغل التكييف يا سيد.. أنا في مصيبة، أو مش عارف.. أنا شفت حاجة هتودينا في داهية إحنا الاتنين لو حد عرفها.
سيد قعد قصاده مستغرب:
مصيبة إيه؟ إنت ق*تلت حد ولا إيه؟
محمد ما اتكلمش، طلع الموبايل، فتح الصورة، وحطها في وش سيد.
سيد مسك الموبايل، وعينيه بدأت تتوسع، وفضل يقلب في الصورة ويعمل زووم على الديل وعلى الوش وهو مبرق:
إيه الفوتوشوب الجاحد ده يا محمد؟ إنت جايب لقطة من فيلم رعب جديد ولا إيه؟ بس الضوء والظل طالعين حقيقيين جدا!
محمد اتنهد وضرب على فخدة:
فوتوشوب إيه يا سيد! دي حقيقية.. الدم الأزرق اللي على الرملة ده أنا لمسته بإيدي، والست دي أنا شلتها وهي بتنازع، واللانش اللي وراها ده كان فيه رجالة معاهم أسلحة ليزر وكانوا هيق*تلوني!
سيد بص لمحمد ولقى إيده بترحف وعينيه فيها رعب حقيقي مش تمثيل. نبرة الهزار اختفت من وش سيد، وبدأ يركز في الصورة أكتر لحد ما عينه جت على اللوجو والمثلث المقلوب.
سيد همس بصوت واطي:
تيتان؟.. نهار إسود.. محمد، إنت عارف اللوجو ده بتاع مين؟
محمد قرب منه:
شركة بترول وأبحاث مائية في البحر الأحمر.. صح؟
سيد قام وفتح اللاب توب بتاعه بسرعة وبدأ يدعك في أزرار الكيبورد وهو بيقول:
دي الواجهة يا فالح.. الشركة دي من ست شهور نزل عنها تسريب على موقع “الويكيليكس” والـ “دارك ويب” إنهم مش بيدوروا على بترول.. دول نزلوا غواصات مجهزة بأجهزة رادار بيولوجي حساسة جداً في الأعماق السحيقة، وكان فيه كلام مشحور إنهم لقوا إشارات حيوية لكائنات ذكية عايشة تحت المايه بقالها آلاف السنين.. الكائنات دي دمها بيحتوي على مركب كيميائي بيعالج ضمور الخلايا وبيطول العمر، والشركة دي بتمولها منظمات سرية عشان يصطادوهم ويعملوا عليهم تجارب!
محمد حس إن دم بردت في عروقه:
يعني الست دي.. الحورية دي.. كانوا عايزين ياخدوها عشان كده؟
سيد بص له وقال وخوف مالي وشه:
مش ياخدوها بس.. دول لو عرفوا إنك صورت، أو إنك ساعدتها تهرب.. مش هيرحموك. الصورة دي لو نزلت على النت، الشركة دي أسهمها هتقع وهتتحول لمحاكمة دولية، يعني إنت معاك قنبلة موقوتة في جيبك.
