كابوسك في نومك
# اسكريبت
أميرة الأخرس
_صدقيني هكون كابوسك في نومك وفي صحيانك، هطاردك في كل مكان حتى في خيالك…
قالي كده وعنيه عبارة عن جمرة نار وعروقه نافرة جداً وهو بيبصلي بكره وغل… بس يستاهل عشان ميطاولش على بنت تاني… أنا قلبي بيرجف دلوقتي من خوفي… بس أنا اتصرفت كده لما حسيت إنه هو وأصحابه اتكاتروا عليا ومدوا إيدهم… كانوا عاوزين يقلعوني الخمار وكل اللي حصل إن كنت واقفة في الكوريدور فوق وكتابي وقع فنزلت أجيبه لقيت شاب واقف مكتف إيديه على صدره ودايس على الكتاب وبيبصلي وهو بيضحك باستفزاز وحواليه حوالي أربع شباب تانيين، بصيت في الأرض وقولتله وأنا خايفة:
_لو سمحت ممكن الكتاب..
ليه الخوف ده؟ يمكن عشان ماليش صحاب وكل اللي يصاحبني يبعد عني عشان دايماً بحاول أنصح وأقول دا غلط ودي صح.. مش مهم عادي جداً.. إن معيَ ربي..
لقيته ضحك ضحكة منتصرة كده وقالي:
_لو عوزاه انزلي هاتيه..
بصيتله بذهول وإيدي ابتدت تترعش لما بصيت حواليا ولقيت كل اللي في الحرم الجامعي بيبص علينا ومستنيين أنا هعمل إيه أو هو هيعمل إيه.. دموعي ابتدت تلمع في عنيا واتكلمت بصوت مليان دموع:
_لو سمحت حضرتك مينفعش كده، ممكن الكتاب؟
لقيت صوت ضحكته علي وصحابه كمان… قلبي هيقف من كتر دقاته اللي خايفة ومتوترة…
ابتديت أميل براحة عشان أجيب الكتاب ولقيت دموعي نازلة لوحدها… أد إيه ساعتها اتمنيت إن الأرض تنشق وتبلعني ولسة همسكه بإيدي لقيته أخده وقعد يقطع فيه وهو بيضحك باستفزاز… أنا مستحملتش ولقيتني ناولته بالكف وبعدها اتصدمت.. أنا إزاي عملت كده؟
ببصله لقيت وشه أحمر وعيونه عبارة عن كتلتين من نار وعروقه نافرة بطريقة خلت قلبي نبضه يبقا بطيء من البرودة اللي حسيتها رغم حرارة الجو وبعدها اتكلم وهو بيجز على سنانه وعيونه مبرقين:
_صدقيني هكون كابوسك في نومك وفي صحيانك، هطاردك في كل مكان حتى في خيالك…
أنا انكمشت على نفسي بخوف وبصيت حواليا لقيت كله بيبصلي ويضحك..
أنا مستحملتش كمية الضغط دي وانفجرت في العياط ومشيت بسرعة جداً، ولأني لابسة ملحفة اتكعبلت ووقعت.. لقيت صوت الضحك علي وصوت التريقة عليا، قومت بسرعة وأنا حاسة إن الدنيا بتلف بيا من كمية الحاجات اللي حصلتلي النهاردة، يمكن أكتر حاجة بكرهها فيا إني مش بعرف أتكلم أو أخد حقي من حد..
بس صدقاً كان نفسي يكون حد واقف جمبي ويساندني في موقف زي ده.. فتحت باب الشقة ودخلت وجريت على ماما أفتش في حضنها عن الأمان والدفا من برودة العالم الخارجي الشرس اللي بينخر في عضم جسمي، حكيتلها اللي حصل
_نور إحنا مش عاوزين مشاكل، خليكِ في جامعتك ودراستك ومتحتكيش بحد، والكتاب هعطيكي فلوس تجيبي غيره..
