كابوسك في نومك
خرجت من أوضتي روحت المطبخ ومليت صنية أكل وأخدتها وخرجت لقيت إخواتي بيتفرجوا على موفاسا، قعدت أتفرج معاهم لأني بحبه جداً وأنا باكل… أنا أكيد سمعت غلط
_براحة هتزوري
شرقت وقعدت أكح جامد لقيت أخويا بيخبطني على ضهري.. إيده تقيلة الغبي، وشي إحمر وبرفع راسي لقيته واقف جمب بابا وحاطط إديه في جيوبه ومشمر كم القميص شوية، نزلت عيوني بسرعة وحطيت الأكل من إيدي وقعدت بكل أدب…
_تعالي يانور عاوزك
دي كانت كلمة بابا فهزيتله راسي ومشيت وراه هو وجاد.. قصدي الدكتور جاد لأوضة الضيافة، ابتسمت وبعدين بوزت تاني…
_نور
يانهار ملحوس يابا رشدي، أنا اسمي احلو إمتا، بصيت لقلبي بصدمة وأنا بهمسله:
_أه ياخاين، اثبت يلا دا اسمي عادي…
بلعت ريقي بصعوبة وأنا بهز راسي بأسى بالنفي وبذم شفايفي وغمضت عيوني…
_شكلك موافقة، يبقى على بركة الله..
“موافقة جداً، أي حاجة تيجي منك أنا موافقة عليها”
عقلي هو كمان؟…. لا أنا كده في حرب خسرانة، اتحمحمت وبلعت ريقي وقولت بنبرة صوت مهزوزة جداً ورقيقة طلعت كده من كسوفي:
_مم موافقة على إيه؟
إيه ده جعفر راح فين؟ إحنا متفقناش على كده… مين لعب في الإعدادات بتاعتي ياجماعة؟
_طب بصي كده إيه ده؟
عقدت حواجبي وبصيتله باستغراب لقيته ابتسم وقالي:
_لا مفيش حاجة، كنت عاوزك تشوفيني بس
رمشت كذا مرة وقمت جري، القعدة هنا خطر على قلبي… ودكتور مجدي يعقوب مش فاضي…
*************************************
_حضن دا ولا حياة؟
_لا ده نجاة… نجاة والله العظيم..
قالي كده وهو حاضني بعد كتب الكتاب وده كان ردي المتخلف، ليه مبعرفش أرد على الناس؟
_ليتني أظل هكذا حبيس ذراعيكِ مكبلاً بأغلال عشقكِ، أرتوي حنانكِ وأنهل من أنهار عينيكِ بنهم ظمآن عانى في صحراء دنياه القاحلة حتى حطّ ركابه بسلام على أرض قلبكِ
_جاد يا ابن أم جاد أنا قلبي ميستحملش الكلام ده، أنا دوخت والله
ضحك وياويل قلبي لما ضحك، بعدت عنه وأنا قلبي دقاته بتدوي زي الرعد… جاتلي فكرة مجنونة شويتين عشان يبطل لأن قلبي مش هيستحمله
_أقولك على سر؟
_إنا اللي قت*لت موفاسا
ضيقت عيوني عليه لقيته قلب عنيه وابتسملي
_لا أنا بحب الكرتون عادي ومتابع
_طب ممكن خمسة صمت بقا ألم فيهم قلبي اللي اتبعتر ده، طلع خرع وموقفش معايا وقفة جدعنة خالص
