كابوسك في نومك

أنا سمعت صوت كسرة قلبي يمكن مش أول مرة دا يحصل بس كان عندي أمل، ولو لمرة واحدة بس ياماما انصفيني…
_طب وكرامتي ياماما؟
_نور حلي عن دماغي أنا مش فايقالك…

ابتسمت بسمة قهرة وعيوني ابتدا الدمع يتجمع فيها وقومت احتميت بأوضتي.. بحس فيها إني في حصن قوي هيحميني من العالم، عارف لما تكون متعشم في حد أوي وفجأة الحد ده يصحيك من عشمك دا على أوجع خذلان ممكن تشوفه عيونك أو يحسه قلبك؟
دا وقتها قلبك بياخد قلم الصدمة بيفوقه… بس متأخر.. بعد ماتكون روحك اتعلمت بعلامات سودة مستحيل يمحيها الزمن.. ابتدت عيوني تنزف وجع روحي وإيدي بتترعش ولقيت نفسي بمسك مصحفي وبفتحه وتلقائي جت على أيات طبطبت على قلبي..
“ولقد نعلم أنك يضيق صدرك بما يقولون، فسبح بحمد ربكَ وكن من الساجدين، واعبد ربكَ حتى يأتيَك اليقين”
أد إيه يارب أنت قريب لينا وحنين علينا… أحن حتى من أمنا اللي ولدتنا
عملت بالروشتة السحرية دي وبدأت أسبح بحمد الله وأصلي وبعدها محستش بنفسي ونمت وأنا ساجدة… صحيت بعدها على أذان العشا وأنا حاسة إني مرتاحة.. مرتاحة جداً
_ياه أنا نمت كل ده؟
قومت اتوضيت وصليت العشا ومسكت كتاب مدينة الأقوياء لعمر آل عوضة ورغم إني منزلاه Pdf إلا إن قراءة الكتب في عالم تاني… وأد إيه الكتاب ده طبطب على قلبي جامد يعني…
نمت في اليوم ده وقررت إني مش هنزل الكلية الأسبوع ده..
عدا الأسبوع وأنا بين مذاكرتي وشغل البيت والقراءة ونزلت الجامعة مع بداية أسبوع جديد.. نازلة وأنا قلبي هيقف بس عندي يقين بالله إنه هيقف جمبي…
يقين يشبه يقين سيدنا زكريا لما وقف بين إيدين ربنا وقاله “هب لي من لدنك ذريةً طيبةً إنكَ سميع الدعاء” ورغم إنه كان مستحيل لأن مراته كانت عاقر وهو أصابه الكبر إلا إنه قال يارب وميأسش وبعدها ربنا بشره بسيدنا يحيي وأنا متأكدة إن ربنا هيبشرني قريب… أنا عندي نفس اليقين إن رغم استحالة الأسباب ربنا قادر… أصل لما بتقول يارب كلمة يارب اللي أنت قلتها دي بتطلع تدق أبواب السما… وصلت الجامعة وماشية زي عادتي بسبح على خاتم التسبيح بتاعي بس لاحظت حاجة غريبة… في حد ماشي ورايا.. بتلفت حواليا ملقتش حد.. اتنهدت براحة وبتلفت عشان أمشي لقيت اللي واقف قدامي… أنا ابتديت أرجع لورا تلقائي وهو بيتقدم مني بنفس ضحكته الكريهة وفجأة لقيته شدني من راسي من ورا.. أنا صرخت جامد لما لقتني تقريباً بقيت في حضنه.. سمعت أصوات ضحكات ورايا ببص بطرف عيني لقيت صحابه محاوطني بدايرة وفجأة سمعت صوت حاجة بتتقطع.. يارب ميكون اللي في بالي قطعلي الخمار الله يسامحه.. ومن رحمة ربنا بيا إني كنت لابسة خمار تاني صغير قطن تحته، غمضت عيوني من حسرة قلبي واللي هيحصلي دلوقتي، أعصابي مش قادرة اتلم عليها وركبي بتترعش
_في إيه بيحصل هنا؟