رواية كاملة

“إنت.. إنت شادي بتاع سكشن 3؟” قلتها وأنا بترعش.

هز راسه ببطء ودمعة نزلت من ورا النضارة.

“أنتي نسيتيني خالص، صح؟” قالها بصوت متحاش ومبحوح. “أنا عارف. أنا عارف إني مكنتش حد يتشاف. طول عمري الشخص اللي بيقعد ورا. حتى لما سكنتي تحتي، قعدت شهرين مقتنع إنك هتفتكريني لوحدك. بس مفتكرتيش. كنتي بتطلعي وتضحكي مع إسلام ومع البواب ومع أي حد.. وتيجي عندي وتبصي الناحية التانية.”

الكلام نزل عليا زي القلم.

“الرسايل..” قلتله.

قال: “كنت تعبان بجد. مش كدب. عملت عملية الزايدة والدكتور قالي اقعد في السرير 10 أيام. 10 أيام من غير ما أشوفك بتعدي من تحت البلكونة، من غير ما أسمع صوت ضحكتك. كنت هتجنن. فقولت لو مجتش هتعرفي قيمتي. طلعتي بتدوري عليا.”

سكت شوية وبعدين شال الكتاب اللي في إيده، نفس رواية “الحب في زمن الكوليرا” اللي كنت أنا سايباها على سلم العمارة من 4 شهور ونسيتها. كنت كاتبة اسمي عليها من جوه.

“فاكرة الكتاب ده؟ سيبتيه على السلم. خدته قلت هديهولك تاني يوم. فضل عندي 4 شهور مش عارف أديهولك إزاي. فبدأت أكتبلك.”

كل حاجة بقت منطقية فجأة بطريقة ترعب.

القهوة سكر زيادة.. كان بيشمها لما بطلع معاه في الأسانسير.

البلوزة الزرقا.. شافني وأنا نازلة من البلكونة بتاعته.

الشيكولاتة.. شاف البواب وهو طالعها لي.

صوتي وأنا بتخانق مع خدمة العملاء.. شباك أوضته فوق بلكونتي بالظبط.

حتى الكابوس الساعة 3 الفجر.. كنت بعيط بصوت عالي وهو سامعني عشان الشبابيك خشب قديم.

مكنش سحر ولا جن. كان واحد حبني من بعيد لدرجة حفظني.

كنت مستنية أشوف مجرم ولا مريض نفسي يخطفني. لقيت قدامي أكتر بني آدم حبني في حياتي، وواقف مرعوب مني أنا.

“إنت كنت بتراقبني؟” سألته وأنا لسه ماسكة دموعي.

قال بسرعة: “لا والله.. يعني آه.. بس مش زي ما إنتي فاكرة. أنا عمري ما بصيت من خرم باب ولا صورتك. أنا بس.. كنت بشوفك. زي ما أي حد بيشوف حد بيحبه. وكنت بخاف أقرب فتخافي مني زي ما خوفتي دلوقتي.”

وبعدين بصلي بكسرة عمري ما هنساها وقال الجملة اللي خلتني أعيط بجد:

“أنا آسف إني حبيتك من غير إذنك.”

في اللحظة دي، العربية النص نقل اللي كانت عاملة الخناقة رجعت تاني، والسواق لسه بيزعق. النور قطع في الجنينة كلها لحظة ورجع. شادي اتخض ووقع الكتاب من إيده.