ايات

حمادة لما عرف ان الدكتور زعلها قالها انا هروح اكسر دماغه، قالت له انت هتخربها اكتر ما هي خربانة اقعد ساكت، وسناء اختها الكبيرة اللي كانت متجوزة ومخلفة قالت لها يا بت بطلي عند، الدكتور ده واصل وممكن يسقطك بجد، قالت لها لو سقطني هسقطه معايا. آيات بدأت تذاكر المادة دي كأنها حرب، كانت بتسهر للصبح، بتقرا مراجع انجليزي وعربي، بتعمل ابحاث زيادة، حتى محمود ابوها اللي كان راجل بسيط بيبيع خضار في السوق بقى يقولها يا بنتي حرام عليكي نفسك نامي شوية، تقوله يا بابا ده مستقبلي.

جه يوم الامتحان الميدتيرم، احمد كان حاطط امتحان يخلي الدفعة كلها تعيط، وفعلا الكل خرج يعيط الا آيات خرجت وهي مبتسمة، لما النتيجة طلعت كانت هي الوحيدة اللي جايبة الدرجة النهائية، احمد اتصدم لما شاف ورقتها، قعد يقراها تلات مرات، البنت دي مش عادية، دماغها الماظ، بس عنده لسه بيكابر. بعدها بدأ يركز معاها غصب عنه، بقي يشوفها وهي بتضحك مع منى في الكافيتيريا، وهي بتتخانق مع حمادة عشان بيغير عليها، وهي بتساعد العمال في الجامعة، بدأ يحس بحاجة غريبة، لاول مرة بنت متعملوش حساب، كل البنات بتجري وراه وهي بتبصله كأنه هوا.

في محاضرة من المحاضرات سأل سؤال محدش عرف يجاوبه، آيات رفعت ايدها وجاوبت بمنتهى الثقة، قالها برافو، اول مرة يقولها برافو، المدرج كله بص لبعضه، منى همست لها شكله هيحبك ولا ايه، قالت لها يحب مين ده مغرور وانا بكرهه. احمد بقى يعمل حاجات غريبة، يغير مواعيد المحاضرات عشان هي كانت بتشتكي انها بدري، يلغي الغياب عشان هي مرة غابت عشان ابوها كان تعبان، يجيب مراجع جديدة للمكتبة عشان هي طلبتها مرة ورفض ساعتها، منى لاحظت وقالت لها الدكتور بيتغير عشانك يا آيات، قالت لها بطلي هبل.

في يوم كانت آيات قاعدة في المكتبة بتعيط عشان ابوها محمود تعب ودخل المستشفى ومحتاج عملية ومفيش فلوس، احمد شافها بالصدفة، اول مرة يشوفها ضعيفة كده، قرب منها بهدوء وقالها مالك، قالت له مفيش، قالها شكلك مش كويس، حكت له غصب عنها، تاني يوم لقت المستشفى بتقولها ان فيه حد دفع تكاليف العملية كلها، سألت مين قالولها فاعل خير، هي شكت انه هو بس مقدرتش تواجهه. بعد العملية ابوها بقى كويس، آيات راحت مكتبه تشكره، قالها انا معملتش حاجة، قالت له كداب، انت اللي عملت كده، ليه، قالها عشان انتي بنت جدعة وتستاهلي كل خير، ولاول مرة يتكلم معاها بدون غرور، قعدوا يتكلموا ساعتين، حكت له عن احلامها انها تبقى مذيعة مشهورة وتغير فكرة الناس عن الحب، وهو حكى لها انه اتربى يتيم وان الغرور ده كان قناع بيخبي بيه وحدته، وان عمره ما حب طالبة عنده وانه حاطط قانون لنفسه ان الحب في الجامعة ضعف.