حماتي مريضة١

أم جوزى ست مريضه بتحتاج لتغيير الحفاضات كل فترة مكنتش بقدر اخرج واسيبها لواحدها طلبت من جوزى إنه يجبها تقعد معانا لانى تعبت كل يوم من المشاوير رايحه وجايه عليها غير إن شقتها كبيره وبتعب فى تنضيفها بعد ما اولادها بيجوا يزوروها ويمشوا بعد فتره من وجودها عندى بقى خدمتى ليها أمر واقع ولو قصرت فى حاجة كانوا بناتها يتخانقوا معايا ويزعقولى كانى بنت صغيره على الرغم إن ولا واحده منهم جربت مره تنضفلها او

تساعدها بيقوموا بدور المشرفين عليه كانى خدامه ليهموالاصعب من كده جوزى بقى يقرف منى ومبياكلش من ايدى عشان بغيرلها الحفاضات وبقى يبعد عنى واوقات يبات بره ولو حد من اخواته اشتكاله يتصل بيه يتخانق معايا مر على الوضع ده شهور وانا متحمله وبقول حسابى عند ربنا وبعمل اللى عليه وصحتى راحت جوزى ذاد معايا فى بخله مصاريف مابتكفيش وبعد كده وقف صرف على البيت قالى خدى بطاقه المعاش بتاعت ماما اصرف منها عليكم وعليها طالما

قاعده تشارك فى مصروف البيت وحماتى وافقت على كلامه وفعلاً بقيت امشى البيت بمعاشها القليل وكل أما أسأل جوزى عن فلوسه يقولى عندى مشاكل فى الشغل فى يوم جوزى قالى انه مسافر شهرين ووصانى على امه والعيال وبعد اسبوع من سفره لقيت اخته جت تزورنا وكانت بتفرح حماتى على حاجه فى الموبايل قربت منهم ووقفت وراهم ومحدش حس بوجودى كانوا مشغولين فى الفديو لقيت جوزى متصور ببدله عريس وبيرقص مع واحده لابسه فستان وعامل فرح كبير فى مكان فخم وقفت مكاني متسمرة،

الأرض كأنها بتتسحب من تحت رجلي والدنيا بتلف بيا.الصوت طالع من تليفون أخته وزغاريد، وشاشته بتنور بملامح جوزي اللي عمري ما شفتها معاه… كان لابس بدلة عريس أنيقة، وشه منور بابتسامة عريضة غريبة مكنتش بشوفها كان ماسك عروسته الجديدة، بنت شابة ولابسة فستان زفاف ملكي فخم، بيرقص معاها وسط قاعة من أرقى وأغلى القاعات، والكل محاوطهم بيسقف ويهتف بفرحة. وفجأة في وسط الأغنية، شالها ولف بيها وهو بيضحك من قلبه بحب وشغف، وهي متعلقه في رقبته وبتضحك بدلال، مشهد كأنه خارج من فيلم رومانسي.

مشهد مستحيل أصدق إنه لنفس الراجل اللي كان بيقرف يلمس إيدي أو ياكل من أكلي، ونفس الراجل اللي كان بيشتكي من الفقر وقلة الفلوس ويحرمني أنا وعياله من أبسط حقوقنا عشان يدوب نمشي البيت بملاليم معاش أمه!وفي آخر الفيديو، ظهر وهو ماسك إيدها بحميمية وبيجري بيها وسط الممر وهم بيضحكوا زي اتنين عشاق في قمة جنونهم وحبهم، كأنه بيهرب بيها لعالم تاني خالص… عالم مفيهوش الهم، ولا المر<ض، ولا الست اللي ضحت بصحتها وشبابها عشان تشيل أمه وتنضف وراه وورا أهله.