حكاوي زين

– فين الجاتوه؟
– العريس برا إتهدي
– هاتي الجاتو يا ماما إلا وربنا ما أنا خارجة
حطته جنبي – خدي يا أخرة صبري، وإنجزي علشان أخوكي هينادي عليكي

فتحت علبة بالامبالاة للواقع، ومسكت الطبق وبدأت أكل وأنا مستمتعة جدًا، مفيش خمس دقايق، اه والله يا مؤمن هما خمس دقايق وكان مصطفي بينادي عليا
– حاضر خارجة

إتسحبت ودخلت الصالون وأنا حاطة إيدي ورا ضهري بالراحة، مصطفي إبتسم وخرج واول ما بعد عن المكان ، هوب قعدت علي كرسي الصالون وطلعت الطبق من ورا ضهري وكملت أكل، ويولع العريس اكتر ماهو والع

– أحم..
وأنا مكملة أكل من غير ما ابصله – نعم؟
– مش هنتكلم يعني؟
رفعت وشي بإستنكار – أنت لية قليل الذوق أوي كدا !
– أنا؟!
– ايوه، مش باكل، يعني مكملش أكل علشان كلمتين هنقولهم وأخرج أرفضك؟ دي ذوقيات عريس !
– ترفضيني؟

كملت اكل وأنا بضحك بخفة – اه طبعا اومال انت فاكر أية؟
سمعت ضحكته – علشان كدا بتاكلي الجاتو؟
– بصراحة ومن غير زعل، أنا مضمنكش، افرض طلعت بخيل وأخدته وأنت نازل، اه هقول عليك نتن وهدعي عليك بس بطني هتوجعني علي الجاتو، يرضيك يا اسمك أية ؟

ضحك بصوت عالي – لا طبعًا ميرضنيش
بصتله بضيق – انت بتضحك لية؟ هو أنا أراجوز قدامك ؟
– لا مش ال..
– برمي نكت يعني ! ولا بتتريق علي كلامي
– مش كدا والله أنا…
ملامحي إتغيرت وإبتسمت – ياراجل بتبرر أية بس، اضحك اضحك يعني خَدنا أية من الزعل
– مثلا
– حد ضامن عمره؟ تضمن تخرج من الأوضة دي سليم؟
– اه والله.. أية!!!

سبت الطبق ومسحت بوئي بالمنديل ببرود..

– يعني ممكن مثلاً أتخنق منك، أرمي عليك ميه نار
– ميه نار! ودي هتجبيها منين؟
– ياراجل عندنا في المطبخ عادي، دي بنعمل بيها غسيل معده لما بناكل إزاز بالغلط
– إزاز بالغلط !!
بصتله بجدية – أيوة طبعًا بالغلط، لية وأنت فاكرنا ذومبي مثلاً؟ إحنا ناس طبيعين
– اه طبعا أكيد حد قال غير كدا
ضيقت عيوني ووطيت صوتي – أو لأ، محدش عارف
– يعني أية؟
وطيت صوتي أكتر – ششش ليسمعونا
– هما منين ؟
همست – أهل تحت الارض
بصلي بصدمة – تقصدي الجن !
إتنفضت وعليت صوتي – بسم الله الحفيظ، سامحوا ميعرفش ميعرفش يا اسيادنا والله غلبان
بصتله وكملت – مش أنت غلبان؟
رجع بضهره بخوف – اه وربنا غلبان
– عاوز تتجوز؟
– لا والله ولا بقيت أنفع للجواز أصلاً
– عارف طريق الباب؟
– مش كان يمين في شمال
– وعلطول وخد الباب في إيدك، بالسلامة يا قمر.