بسبب المقالب منقول

تخيل إن بسبب فيديو من فيديوهات المقالب اللي بنقابلهم على السوشيال ميديا، اتفتحت ق\ضية قلبت العالم كله. يوم ١٣ فبراير سنة (٢٠١٧) في مطار كوالالمبور الدولي في ماليزيا، الساعة كانت ٩ الصبح والأجواء كانت طبيعية في المطار، والركاب كانوا بيخلصوا الإجراءت؛ عشان يطلعوا رحلتهم المتجهة لمدينة (ماكاو) التابعة للصين. ضمن الركاب دول كان فيه شخص اسمه (كيم تشول) شايل شنطة على كتفه وبيخلص الإجراءات بتاعته زي باقي الركاب، ومستني طيارته اللي هتتحرك الساعة ١٠:٣٠ كيم كان واقف عادي بهدوء في صالة المطار، لكن فجأة تحصل حاجة غريبة: بنت جات من ورا ضهره وغمت عينيه لمدة ثواني؛ كأنها بتهزر معاه وفضلت تضحك وبعدين سابته وجريت. الشخص ده قبل ما يستوعب اللي حصل، لقى فيه بنت مختلفة جات عملت نفس الموضوع، جات من ضهره غمت عينيه، وفضلت تضحك وبعدين جريت، واختفت من المكان! اختفوا البنتين، وكل واحدة فيهم جريت في اتجاه مختلف، لكن كيم تشول بسرعة جري على أمن المطار، وقالهم اللي حصل، قالهم: إن فيه بنتين غموا عينيه وكل واحدة كان في إيديها مادة زيتية. وأثناء ماهو بيحكي، فجأة حس بدوخة وصعوبة في التنفس، وبدأ يفقد اتزانه، بسرعة أمن المطار طلب الإسعاف؛ عشان تنقله للمستشفى ويفهموا إيه اللي حصله؟ لكن في خلال ربع ساعة من تحرك عربية الإسعاف، كان الشخص ده مات في الطريق، ويتضح إن كيم تشول هو مجرد اسم مستعار، لأن الشخص ده لما اتكشفت هويته الحقيقية، اتفتحت ق\ضيّة قلبت العالم كله، وكانت سبب في مشاكل دبلوماسية كبيرة بين بلدين! حكايتنا بتدور في ماليزيا سنة (٢٠١٦) مع بنت اسمها (سيتي عائشة) من إندونيسيا، وكانت من أسرة فقيرة وهي اللي يتصرف عليهم، وبسبب ظروف الحياة الصعبة؛ قررت إنها تسافر ماليزيا؛ تشوف فرصة عمل هناك. سافرت واشتغلت في ماليزيا في بعض الخدمات الترفيهية، والدنيا كانت ماشية معاها وبتبعت فلوس لأهلها، لحد ما جات في يوم واتعرفت على شخص اسمه (چون) وشغال سواق تاكسي. چون قرّب منها وقالها: إيه رأيك تشتغلي ممثلة في برنامج فيديوهات ومقالب على اليوتيوب، وإنه يعرف منتُج محتاج ممثلين وهيديها أجر كويس. سيتي استغربت؛ لأنها مكنتش عارفة أي حاجة في المجال ده، بس چون قالها: إن الموضوع بسيط وبكرة يقعدها مع المنتِج ده وهو هيشرحلها كل حاجة. وبالفعل، تاني يوم رتبلها لقاء مع شخص اسمه (چيمس) عرفها بنفسه على إنه منتِج ومخرج ياباني، وبدأ يوريها فيديوهات المقالب اللي الناس بتعملها على السوشيال ميديا، وقالها إنهم هيعملوا مقالب زي دي في الأماكن العامة، وهتاخد على كل فيديو ١٠٠ دولار. العرض كان مُغري بالنسبة لسيتي، وحست إن دي فرصة كويسة، وهتشتغل شغلانة شريفة، ده غير إن المبلغ كان ضخم بالنسبة لأجرها في شغلها العادي. وافقت سيتي، وبدأت في تصوير فيديوهات المقالب دي في الشوارع والأماكن العامة، والمقالب كانت عادية جدًا زي اللي بنشوفها في كل حتة. بس أكتر مقلب كان چيمس بيطلب منها إنها تعمله، هو إنها تحط على إيديها زيت وتغمي عين شخص في الشارع، وتطلب منه يخمن من اللي مغمي عينيه وبعدين تجري. كانت بتعمل المقلب ده في الناس في المطار والفنادق وفي مدن مختلفة، وفضلت الأمور ماشية بالشكل ده على مدار شهر بدون أي مشاكل، لحد ما بقى الموضوع بسيط بالنسبالها، واتعودت تعمله بكل سهولة واحترافية. على الجانب الآخر، كان بيتم نفس الموضوع بالظبط مع بنت فيتنامية فقيرة إسمها (دوان) شخص قابلها واتعرف عليها، وعَرَض عليها نفس الشغل بالظبط، لكنه كان شخص مختلف غير اللي اتعرف على سيتي ومفيش واحدة فيهم كانت تعرف التانية. لحد هنا الأمور طبيعية ومفهاش أي شيء مريب، المقالب والفيديوهات فضلت مستمرة، وكانوا بيعملوها سيتي ودوان في الشارع، والأماكن العامة، لكن كل واحدة فيهم مع شخص مختلف، بس التفاصيل كانت واحدة. وفضلت الأمور ماشية بالشكل ده لحد ما وصلنا ليوم ١٣ فبراير (٢٠١٧) وتحديدًا في مطار كوالالمبور الدولي، في ماليزيا الساعة ٩ الصبح. في اليوم ده، المخرج اللي قولنا اسمه چيمس كان سلم سيتي عائشة لشخص تاني اسمه (مستر تشانج) عشان يكمل معاها تصوير فيديوهات المقالب. مستر تشانج ده قالها إن المقلب المرة دي هيبقى في المطار وهيكون عليه مكافأة كبيرة جدًا. والشخص اللي هيتعمل فيه المقلب مكنش حد عشوائي زي كل مرة، ده شخص معين شاور عليه مستر تشانج، وطلب منها إنها تروح تغمي وشه بالزيت اللي هيدهن بيه إيديها. على الجانب الآخر وفي نفس المطار، البنت الفيتنامية اللي اسمها دوان كانت مع الشخص المسؤول عنها وبتاخد منه نفس التعليمات بالظبط وكانت طريقة المقلب كالتالي، سيتي هتحط الزيت على إيديها وتغمي عين الشخص ده زي ما بتعمل في كل المقالب. وبالفعل، سيتي اتحركت ناحية الشخص ده، وحطت إيديها على عينيه وبعدين سابته وجريت. وقبل ما يستوعب الشخص المستهدف اللي بيحصل، كانت دوان عملت نفس الموضوع بعد ما خدت التعليمات من الشخص المسؤول عنها، وغمت وشه بالزيت هي كمان وبعدها جريت. بعدها كل بنت زي ما خدت التعليمات جريت على الحمام غسلت إيديها بسرعة. نرجع تاني لـ كيم اتشول اللي مات في عربية الإسعاف بعد ربع ساعة أثناء نقله للمستشفى، واللي اتضح إن اسمه الحقيقي هو (كيم جونغ نام) وده يبقي ابن الرئيس الكوري السابق والأخ الأكبر لرئيس كوريا الشمالية الحالي (كيم جونع اون) أخ غير شقيق من أم مختلفة. وتبدأ من اللحظة دي تتضح الصورة، بس الأول خلينا نعرف مين هو كيم جونغ نام ونفهم إيه اللي حصل. من وهو طفل صغير كان ضد حكم أبوه لكوريا، ولما بدأ يكبر شوبة وتبان أفكاره أكتر وإن المفروض هو اللي هيبقى رئيس كوريا، فأبوه كان رافض طريقته تمامًا. أبوه كان بيحاول يغير من تفكيره، وكان عايزه يمشي على نفس النمط بتاعه في الحكم، لكن كيم كان دايمًا بيعترض على الطريقة بتاعته، وكان ليه أفكار مختلفة ومتأثر بالفكر الغربي. لحد ما تيجي سنة (٢٠٠٧) وتقبض السُلطات اليابانية على كيم جونغ بجواز سفر مزور، وهو بيحاول يزور ديزني لاند في طوكيو هو وعائلته. وده لأنه مكنش يقدر يستخدم صفته الرسمية كـ ابن زعيم كوريا وهو بيزور دولة حليفة لأمريكا. طبعًا الموضع لما اتكشف اتحول لفضـ..،،يحة عالمية وظهرت على شاشات التلفزيون العالمي، وأبوه في الوقت ده اعتبر إن اللي ابنه عمله هي إهانة لا تُغتفر للنظام الكوري، وبعدها أخد قرار استبعاد ابنه الكبير من دائرة الحكم. وبعد ما الأب مات، اللي مسك الحكم هو الابن الصغير وزعيم كوريا الشمالية الحالي (كيم جونغ اون) لحد ما نيجي سنة (٢٠١١) وفي الفترة دي الابن الكبير اللي تم استبعاده من الحكم اتنفى للصين هو وأسرته لكنه مكنش ساكت. كان بيصرّح في لقاءات ومراسلات صحفية، بينتقد فيها طريقة حكم أخوه لكوريا، وكان بينتقد كمان طريقة توريث الحكم، وده اللي خلى المخابرات الكورية تشوفه إنه ممكن يكون ورقة تهديد تستخدمها أمريكا في قلب نظام الحكم، وفضل الموضوع في مناوشات بين زعيم كوريا وأخوه الكبير. بس خلينا نرجع للتحقيقات، ونعرف إيه اللي حصل بعد ما كاميرات المراقبة في المطار قدرت تتعرف على هوية البنات وتم القبض عليهم. الأول لما تم فحص المادة اللي جات على وش كيم نام، اتضحت الكارثة: البنت الأولي -سيتي- كان في إيديها مادة كيميائية معينة. والبنت التانية -دوان- كان في إيديها مادة تانية مختلفة. المادتين دول لمّا اتحطوا على بعض، كوّنوا مادة سُمية اسمها (VX) والمادة دي تبقى غاز أو سم عصبي مصنف كسلا_ح دما_ر شامل، وأصلًا كان مُحرم استخدامه دوليًا. متخيل! كيم نام لمّا استنشق السم ده، قضى عليه في دقايق. ويتضح إن البنات دي مكانتش بتعمل برنامج مقالب زي ما كانوا فاهمين، وطلع مضحوك عليهم. دول كانوا بيتدربوا كل يوم بطريقة غير مباشرة على خطة مخابراتية مرسومة كويس وبدقة عالية، وده اللي اتقال في التحليلات. والتحقيقات قالت: إن المخرجين اللي اتعرفوا عليهم البنات، همّا في الأرجح عملاء لكوريا الشمالية وإن الأسماء اللي قالوها للبنات مكانتش أسماءهم الحقيقية. العملية دي شارك فيها أربع أشخاص من كوريا وكلهم هربوا في نفس يوم التنفيذ بطريقة معقدة، عن طريق أربع دول مختلفة؛ عشان الأنتربول ميقبضش عليهم. مخابرات كوريا الجنوبية قدمت معلومات لماليزيا بتأكد فيها إن الأربعة دول همّا عملاء لمخابرات كوريا الشمالية، وقالولهم كمان إن العملية هي ترتيب منظم من زعيم كوريا الشمالية؛ عشان يزيح أخوه من طريقه. ( حسب اتهامات كوريا الجنوبية) في الوقت ده أمريكا و كوريا الجنوبية، وجهوا اتهام مباشر لزعيم كوريا الشمالية إن هو اللي اغتـ...،،ـال أخوه، لكن طبعًا كوريا الشمالية قالتلهم إيه يا حبيبي إنت وهو الكلام الفاضي ده، لأ مفيش منه. في الوقت ده حصلت توترات دبلوماسية كبيرة بين كوريا الشمالية وماليزيا؛ لأن كوريا الشمالية طلبت من ماليزيا تسلم الج\ثة ومحدش يشرحها، لكن ماليزيا رفضت وأصرت على التشريح وإكمال التحقيق، مش بس كده، دول كمان طردوا السفير الكوري، وقبضوا كمان على مواطنين كوريين ودبلوماسيين كان مشتبه فيهم، ومنعوهم من السفر. فكوريا الشمالية ردت عليهم وقالت ده تآمر منكم علينا مع كوريا الجنوبية و أمريكا، وقبضوا هما كمان على شوية دبلوماسيين ماليزيين ومنعوهم من السفر . لكن بعد ضغط ومفاوضات من الجانبين، تم الإفراج عن الناس دي كلها واتسلمت الج\ثة لكوريا الشمالية. المهم في النهاية أصبح البنتين هما المتهمين الرئيسيين رغم إن هما أكدوا في اعترافاتهم إنهم ميعرفوش أي حاجة، وإن هما كانوا فاكرين إنهم بيعملوا مقلب! وفضل التحقيق شغال في الق\ضيّة كذا سنة، وتم توجيه ليهم تهمة الق\تل العمد وكانوا هياخدوا اعدا..م، لحد ما نيجي سنة (٢٠١٩) وتُسقط النيابة التهمة عن سيتي عائشة، وفي نفس اليوم تخرج من السجن وترجع إندونيسيا. أما دوان الفيتنامية اتحكم عليهم بـ ٣ سنين سجن، نفذتهم وخرجت هي كمان. وبكده تكون اتقفلت واحد من القضايا اللي قلبت العالم، القصة معمول منها فيلم وثائقي قوي جدًا ظهرت فيه سيتي عائشة بنفسها هي ودوان، وبعض الشهود والمحامين وحكوا تفاصيل أكتر بكتير من اللي اتذكرت في البوست. هسيبلكم بعض المصادر اول تعليق. ✍️/محمد المغربي

مقالات ذات صلة

اني حكايات زهرة الحلقه الاخيره

رواية ل دعاء احمد الاخير

عنذما يحب القلب الاخير

اختي خدت خطيبي مني

مهرة

حكاية٢

اترك تعليقاً إلغاء الرد