اللقيط
طبعًا سعد كان طمعان ان كريمة هي فتاة الاحلام اللى هتحققله المراد وتصرف عليه وتخرجوا من مشاكل الديون المتلتلة اللى هو مش عارف يخرج منها اساسا وكلها بسبب تعاطى الحاجات الزفت اللى بتدمر العقل وكل حاجة فى الانسان ، رمى مراته الاولانية نرمين واللى هي من عينته اساسا وجرى ورا كريمة واللى فرشتله الارض ورد وطمعته فيها اكتر واكتر ، لان كل طلباته كانت مُجابة ، يؤمر يلاقى ، يفكر فى الحاجة تجيله لحد عنده
يعنى من الاخر كريمة دلعته لان اساسا الناس اللى كانت شغالة بتخدمهم فى البيت ناس سخية وايديهم فرطة حبتين ، وكانت اول مشكلة بينهم لما واحد من العيلة اللى هي شغالة عندهم اتجرأ عليها وحاول معاها وهي صدته وعملت مشكلة وبدأ الشاب ده يتلككلها وعايز يمشيها.
طبعًا اول واحد جريت عليه علشان تحكيله هو سبع البُرمبة والاسد الجسور سعد جوزها ، واللى يعنى اتصدمت من رد فعله الديوث ، انا حسيت بيها وهي فى قمة الغضب والسخونة ، نزل عليها دُش مياه ساقعة بسبب الكلام اللى قاله ، قالتله وهي غضبانه
= الواد ابن ال.. كان عايز يتحرش بيا فى المطبخ بس انا شبشبتله ومن ساعتها وهو بيعاملنى زى الزفت وعايز يطردنى من البيت
بصلها سعد بكل هدوء وبرود:
.. الشغل كله مشاكل وانتى لازم تستحملى ، ايه يعنى لما تعدى الامور وتمشي امورك
الجملة بتاعته مكنتش متوقعاها ، لكن سرحت ثوانى كده وسألته وهي بتتمنى انها تكون فهمت كلامه غلط وقالتله:
= يعنى انا اسيبه يحسس عليا عادى ؟!!
رد بكل سماجة بعد ماخد نفس من السجارة الملغمة بتاعته وهو فارد جسمه على الكنبة
.. متاخديش الموضوع على قلبك اوى كده ، اهم حاجة فى الدنيا دى الفلوس ، يبقى لازم تمشى امورك علشان يبقى فيه فلوس
سكتت ومعرفتش تتكلم واضطرت انها تسكت وتقبل بتحرش الشاب اللى بتشتغل عندهم علشان تجيب فلوس للبيه جوزها ، وفى وسط كل اللى بتعمله ده ، مسكت تليفونه وبالصدفة سمعت تسجيل بينه وبين مراته الاولى وكان بالنسبالها صادم جدًا خاصة انه مأكدلها ان علاقته بمراته الاولى اتقطعت ، ودار فيه الحوار ده
= عمال تثبتنى وتقولى انك معاها علشان تجبلنا فلوس وانا مستحملاك ومستحملة قرفها ، انا هطلق منك
.. يعنى الفلوس اللى بجيبهالك كل شهر دى ايه ، شغال بيها ؟ ماهى بتاعتها
= بص بقى بتاعتها مش بتاعتها ماليش فيه ، لازم تعرفها انك رجعتلى وتقعد معايا فى البيت زى مابتقعد معاها واكتر ، يااما والله هجرجرك فى المحاكم وهطلق منك زى المرة اللى فاتت وانت مش حمل اى حكاية معايا
