همس السوار

همس السوار بقلم شروق مصطفى عاصم دخل المكتب، رمى الملف قدامها ببرود يرعب: قدامك ٥ دقايق، تلمي هدومك وتيجي معايا.. القضية اللي حشرتي مناخيرك فيها خلت رقبتك مطلوبة. سيلا قامت وقفت، عينيها بتطلع شرار: ومين إنت عشان تأمرني؟ أنا صحفية، مش عيلة تايهة محتاجة حارس! عاصم قرب منها لحد ما أنفاسه لفتت وشها، وهمس بصوت زي فحيح الأفعى: أنا اللي هخليكي تتمني الموت ومطولهوش لو مسمعتيش الكلام. عاصم خدها في طيارة خاصة لمكان مقطوع في ثلوج ألمانيا. سيلا كانت بتغلي، وفي ليلة استغلت نومه، وخرجت تجري في التلج بهدوم خفيفة. عاصم صحي، وجابها من قفاها قبل ما توصل للطريق. حدفها جوه البيت وقلع الحزام من بنطلونه: أنا قولت مفيش خروج! سيلا صرخت في وشه: اقتلني وريحني منك! الحزام نزل على الأرض جنب رجليها يعمل صوت يخوف، وقرب منها، مسك فكها بقوة لحد ما وشها ازرق: أنا هعرف أربيكي ازاي حبسها في أوضة ضلمة، وربط حوالين معصمها سوار حديد تتبع ، وحط سماعة في ودنه: السوار ده بينقل لي دقات قلبك.. لو فكرتي بس تخافي، هعرف. وهو قاعد بيسمع أنفاسها، سمع صوت كحة مكتومة، وبعدها صوت حاجة بتقع. دخل لقاها غرقانة في دمها اللي نازل من مناخيرها، وشها لونه أصفر شاحب. بقلم شروق مصطفى عاصم بخوف داراه ورا بروده: إيه ده؟ عاصم حاول يجيب لها دكاترة، بس هي كانت بترمي الأكل والدوا في الأرض: مش هتعالج.. مش عايزة أعيش يوم زيادة وإنت قدامي. القضية خلصت ورجعت مصر، عاصم كان بيراقبها من بعيد بجهاز التتبع. في فرح أختها، الدنيا كانت هايصة، وفجأة الإشارة بدأت تتحرك بسرعة غريبة بعيد عن القاعة. عاصم عرف إن في كارثة. في عربية ميكروباص، سيلا كانت مرمية، غايبة عن الوعي بفعل بنج تقيل، والشر يلمع في عين الخاطفين: دي أعضائها تجيب ملايين. سيلا وهي بين الوعي والموت، فتحت عينيها نص فتحة، شافت خياله، وهمست بآخر ذرة قوة: عاصم.. الحقني. عاصم دخل عليهم زي الإعصار، كسر عضمهم حرفياً، مكنش ظابط بيأدي مهمة، كان وحش بيسترد حاجة ملكه. شالها بين إيديه، وأول ما جسمها لمس صدره، كهربا سكنت في جسمهم هما الاتنين، رعشة خلت قلب عاصم يدق لأول مرة. بدأت رحلة الكيماوي. عاصم كان بيشيلها وهي ضعيفة يوديها المستشفى، وهي تضربه بضعف: سيبني مش عايزة مساعدة ولاشفقة عاصم كان بيسكت، بيمسح دمعتها ويقولها: هتخفي غصب عنك.. عشان أنا لسه مخلصتش حسابي معاكي. ملحقتش تاخد جلساتها، الدنيا اسودت أكتر.. حادثة بشعة، وأهلها ماتوا. سيلا فقدت النطق، فقدت الرغبة قالت له ببرود أصعب من بروده هو: مبقاش عندي حد أخاف عليه.. أبعد عني هربت.. راحت لبيت مهجور على شط بعيد، مكان ميعرفهوش غير الجن الأزرق. سيلا كانت قاعدة على الرمل، الهوا بيطير خصلات شعرها الضعيفة اللي بدأت تقع من أثر الكيماوي. كانت بتبص للبحر بضياع، وإيدها اليمين مكانها علامة زرقا وجرح لسه ملمش.. مكان ما قطعت السوار بحديدة حامية وسابته وراها في البيت عشان تضلله، فضلت تنزف وهي بتهرب بس مفرقش معاها الوجع، المهم تهرب من سجنه ومن شفقته . فجأة، حست بظل طويل غطى نور الشمس اللي كان جاي على وشها. قلبت وشها الناحية التانية وهي بتقول بمرارة: حتى هنا وصلتلي؟ لكن الرد مكنش من خيالها، الرد كان صوت جزمة عسكرية بتغرس في الرمل بخطوات ثابتة. قلبها اتنفض، الرعشة اللي بتحصل لما بيقرب منها رجعت تاني زي الكهربا. عاصم وقف وراها، قميصه الأسود مفتوح أول زرارين منه، وعينيه فيها غل مخلوط بلهفة تخوف. نزل لمستواها، ومسك إيدها المجروحة بعنف، ضغط على مكان السوار اللي اتقطع وقال بصوت واطي ومرعب: كنتي فاكرة إنك لما تخلعي السوار وتنزفي عشان تخلصي مني، أنا هضيع؟ أنا اللي زرعت الجهاز ده تحت جلدك يا سيلا مش بس فوقيه.. أنا بسمع دقات قلبك وهي بتقولي إنك ميتة من غيري. سيلا سحبت إيدها بقوة وهي بتصرخ فيه: أنا ميتة بيك ومن غيرك! أنت إيه؟ معندكش دم؟ أهلي ماتوا.. جسمي بيتاكل.. شعري بيقع في إيدي كل يوم، سيبني أموت بعيد عن وشك البارد ده! عاصم ملامحه اتهزت لأول مرة، قرب منها وشدها من وسطها عليه، لدرجة إنها سمعت دقات قلبه اللي كانت أسرع من دقات قلبها. همس قدام شفايفها: البرود اللي مش عاجبك ده هو اللي مخبيني عنك عشان مأكلكيش.. أنتي عايزة تموتي؟ تمام.. بس هتموتي وانتي في حضني، مش هسمح لملك الموت ياخدك طول ما أنا فيّ نَفَس. سيلا زقته بضعف وهي بتنهج، ووشها قلب لونه أصفر شاحب، وبدأت تدوخ. عاصم ملقاش حل غير إنه يشيلها بين إيديه وهي بتضرب في صدره بضعف وبتبكي ليه بتعمل فيّ كده؟ أنا بكرهك.. وهو بيحطها في العربية، بص في عينيها وقال بكلمة واحدة لخصت كل اللي فات: عشان مبعرفش أحب غيرك يا سيلا.. وعنادك ده هو اللي مخليني متمسك بالحياة زيك بالظبط. عاصم خدها ورجع بيها على البيت، بس المرة دي مكنش سجن، كان مستشفى خاصة هو جهزها في بيته عشان ميسيبهاش لحظة. سيلا كانت مستسلمة تماماً، باصة للسقف ورافضة تاكل أو تتكلم، الوجع النفسي بعد موت أهلها كان أقوى من وجع السرطان في دمها. في يوم، سيلا قامت من النوم لقت المخدة غرقانة شعر. مسكت خصلة من شعرها بإيد ترعش، الخصلة وقعت في إيدها بمجرد ما لمستها. بدأت تصرخ بهستيريا، صريخ مكتوم طالع من قلب محروق. عاصم دخل عليها، لقاها ماسكة المقص وبتحاول تقص شعرها بعشوائية وهي بتعيط وتجرح نفسها. عاصم شد منها المقص وكتف إيديها: اهدي! سيلا اهدي! سيلا بانهيار: شكلي وحش.. أنا بقيت بخوف يا عاصم! سيبني أموت، أنا بقرف من نفسي لما ببص في المراية! عاصم ببروده المعتاد اللي بيخبي وراه بركان، سحب كرسي وقعدها عليه. جاب ماكينة الحلاقة ووقف وراها. سيلا اتجمدت وهي شايفاه في المراية بيقرب بالماكينة من شعرها. سيلا بصوت مكسور: هتكسرني يا عاصم؟ هتاخد مني آخر حاجة كانت مخلياني أحس إني ست؟ عاصم مردش، وبدأ يحلق لها شعرها بهدوء شديد. دموعه كانت محبوسة، بس إيده كانت ثابتة. بعد ما خلص، باس راسها وهي قرعة ومسح دموعها وقال لها: دلوقتي بس ملامحك بانت.. دلوقتي بقيتي سيلا اللي مفيش حاجة مدارية قوتها. شعرك هيطلع تاني لما تخفي، بس عنادك ده هو اللي مش عايزه يروح. سيلا بدأت تستعيد قوتها تدريجياً، وعاصم كان شغال في مهمة خاصة . عرف إن الحادثة اللي مات فيها أهلها مكنتش قضاء وقدر، دي كانت رسالة من العصابة اللي كانت عايزة تخطفها في الفرح. عاصم جاب الراس الكبيرة اللي دبر الحادثة، وحبسه في مخزن تحت الأرض. خد سيلا وهي لسه بتمشي بالعافية، ودخلها المخزن. الراجل كان متكتف ومتبهدل. عاصم رمى سكين قدام سيلا وقال لها ببرود: ده اللي حرق قلبك على أبوكي وأمك.. اخلصي منه يا سيلا، طلعي الغل اللي جواكي عشان نعرف نبدأ العلاج بقلب نضيف. سيلا مسكت السك.ين، عينيها كانت بتطلع نار، قربت من الراجل اللي كان بيترجاه، وفجأة رمت السكين تحت رجل عاصم وقالت: أنا مش زيك يا عاصم.. أنا مش قات.لة. أنا هسيبه يعيش عشان يشوفك وأنت بتموته كل يوم بالبطيء في سجنك.. ده الوجع اللي يستحقه. وهما خارجين من المخزن، الدنيا كانت بتمطر. سيلا تعبت وسندت عليه. عاصم لف دراعه حوالين وسطها، وقربها منه. المطر كان بينزل على راسها، وعاصم قلع جاكيته وغطاها بيه. سيلا بصت له وقالت: ليه بتعمل كل ده؟ أنا عذبتك بعنادي، وأنت عذبتني ببرودك. عاصم قرب من ودنها، وهمس بالكلمة اللي كانت مستنياها من أول يوم: عشان إنتي الصحفية الوحيدة اللي عرفت تقتحم حصون المخابرات وتسرق الملفات اللي جوه قلبي.. بحبك يا سيلا، وموتك يعني موتي. الكهربا اللي بينهم رجعت تاني، بس المرة دي مكنتش خوف، كانت نار شوق وحياة. سيلا حضنته بقوة، لأول مرة تسلم نفسها ليه بجد، وقررت إنها هتحارب المرض عشان خاطر الوحش اللي لقت فيه أمانها. الهدوء اللي عاشوه كان زي الهدوء اللي بيسبق العاصفة. سيلا كانت فاكرة إن بانتصارها على المرض وبوجود عاصم جنبها، الدنيا خلاص ضحكت لها. بس عاصم كان عارف إن في عالم المخابرات، الطار مبيتمحيش، والغل اللي زرعه في قلوب أعدائه لسه بيغلي. سيلا كانت في أصعب مراحل الكيماوي، جسمها هزيل، وروحها بتتسحب منها. عاصم كان قاعد جنبها في المستشفى في ألمانيا، ماسك إيدها اللي الخراطيم مغطيها. بصت له بدموع محبوسة وقالت بصوت يدوب مسموع: عاصم.. روح.. عيش حياتك مع واحدة تقدر تديك عيلة، أنا خلاص، أيامي معدودة. عاصم ملامحه اتصلبت، قام وقف وبص لها ببرود القوة: أنا مباخدش أوامر من حد، ولا حتى منك. وانتي مش هتموتي، لإنك بقيتي ملكي خرج ورجع بعد ساعة، ومعاه مأذون أو موثق قانوني واتنين شهود من زمايله في الجهاز. سيلا بصت له بذهول: أنت بتعمل إيه؟ عاصم ببرود وهو بيمضي على الورق: بكتبك على اسمي.. دلوقت إنتي حرم عاصم الغول ، يعني حتى المرض لازم ياخد إذني قبل ما يلمسك. في اللحظة دي، سيلا حست إن الوجع خف، مش بسبب الدوا، بس عشان حست إن فيه وتد سانده عليه. اتجوزوا وهي في قمة ضعفها، ومن يومها مكنش بيسيبها لحظة، كان هو اللي بيأكلها بيده، ويشيلها للحمام، ويحكي لها قصص عن شغله عشان ينسيها وجع الحقن. بعد ما المعجزة حصلت وسيلا خفت، عاصم حجز مطعم كامل على النيل في مصر، المطعم كان فاضي، مفيش فيه غيرهم وصوت الست بتغني إنت عمري . سيلا كانت لابسة فستان أسود شيك، وشعرها اللي طلع وبقى كيرلي قصير كان مديها جمال متمرد. عاصم كان باصص لها ومش مصدق إن العنيدة اللي كانت بتموت بين إيديه، واقفة قدامه بكامل قوتها. سيلا رفعت كاس العصير وبصت له: لسه فاكر أول يوم شفتني فيه؟ لما قولتلي هكسرك؟ عاصم ضحك ضحكة مكتومة، وخد إيدها باسها: أنا اللي اتكسرت يا سيلا.. اتكسرت قدام دموعك، وقدام قوتك وأنتي بتحاربي الموت. أنا ظابط مخابرات، بعرف أكشف أي جاسوس، بس انتي الوحيدة اللي دخلتي قلبي من غير ما أحس. وفجأة، وهما في قمة الرومانسية، لمح عاصم نقطة حمراء ليزر بتتحرك على صدر سيلا. في ثانية، وبسرعة الظابط المحترف، رمى نفسه عليها وخدها ونزلوا تحت التربيزة.. الرصاصة اخترقت الإزاز وكسرت الفازة اللي كانت جنبهم. عاصم سحب مسدسه من ضهره، وعينيه رجعت الغول اللي ميرحمش: كنت عارف إنهم مش هيسكتوا.. ليكي عندي حق ليلة بوظوها عليكي، وهاخده منهم بزيادة. سيلا، رغم الخوف، عينيها لمعت بالتحدي القديم، سحبت السكينة من على التربيزة وقالت له: وأنا مش هسيبك تحارب لوحدك يا عاصم.. المرة دي إحنا اتنين في واحد عاصم ضغط على إيد سيلا بقوة وهو ساند ضهرها للتربيزة، صوته كان هامس بس يقطع القلب من جبروته: لو رفعتي راسك يا سيلا، المرة دي مش هحبسك.. المرة دي هقتلك أنا بإيدي عشان أرتاح من الرعب اللي عايش فيه بسببك! سيلا كانت بتنهج، بس عينيها كانت بتلمع بجنون الصحفية اللي مبيخافش: مش هفضل استخبى يا عاصم، أنا مرتك.. يعني نارك هي ناري. عاصم مدهمش فرصة، طلع من ورا التربيزة زي الصقر، ضرب نار احترافي شل حركة القناص اللي كان فوق العمارة اللي قدامهم. سحب سيلا وراه وجريوا للممر الخلفي للمطعم، وهناك كانت المفاجأة.. عربيتين سدوا عليهم الطريق، ونزل منهم رجالة البرنس ، أكبر تاجر س. لاح سيلا كانت بتكتب عنه قبل ما تتعب. البرنس وقف ببرود وبص لسيلا: وحشتينا يا سيلا. قولت أسلم عليكي وأنا باخد بضاعة عاصم بيه اللي حابسها في المخابرات. عاصم وقف قدام سيلا زي السد العالي، ملامحه كانت ميتة، مبيظهرش عليها أي خوف. حط إيده في جيبه وطلع جهاز صغير وضغط على زرار فيه. في ثانية، المكان كله اتحاصر بقوات خاصة كانت مستنية إشارته. عاصم مكنش جاي يتعشى بس، عاصم كان عامل كمين وهو عارف إنهم هيحاولوا يصطادوه في الليلة دي. عاصم قرب من البرنس، وبكل برود ضربه بـ دماغ خلت مناخيره تجيب دم، وهمس في ودنه: أنا الموت اللي كنت بتستناه يا روح أمك.. سيلا دي خط أحمر، اللي يقرب منه بيتحرق. بعد ما الدنيا هديت والقبض تم، سيلا كانت واقفة بتبص لعاصم بلوم. هي عرفت إنه استخدمها كطعم في الليلة دي عشان يخلص من القضية. سيلا بدموع: يعني العشا ده مكنش عشاني؟ كنت بتصطادهم بيا يا عاصم؟ عاصم قرب منها، مسح دمعتها بإبهامه بقسوة مخلوطة بحنان: كنت بخلصك منهم للأبد يا سيلا.. عشان نعيش يوم واحد من غير ما أبص ورايا وأنا ماشي جنبك. السوار اللي في إيدك ده.. كان هو اللي مخليني عارف نبضك زاد قد إيه وأنا بضرب النار.. كنت هموت من الخوف عليكي بس كان لازم اللعبة تنتهي. سيلا سكتت، العناد اللي جواها انكسر قدام تضحياته. حضنته وسط الشارع، وسط أنوار عربيات الشرطة، والكهربا اللي بينهم كانت أقوى من أي وقت فات. بعد سنتين.. في بيتهم الهادي بعيد عن دوشة المخابرات والصحافة، سيلا كانت قاعدة بتقرأ آخر سطر في قصة همس السوار اللي كان ملخص فقط من رواية كبيرة قرأتها لكاتبتها المفضلة شروق مصطفى أسمه جمر الجليد الجزء الأول وأنصهر الجليد الجزء الثاني بيحكي تفاصيل كاملة عن حياة عاصم وسيلا. عاصم دخل عليها، شال عمر ابنه اللي بقى عنده سنة، وحطه في حضنها. عاصم: لسه بتقري يا سيلا؟ مش ناوية تبطلي عناد وتتفرغي لي شوية؟ سيلا بضحكة سحرت قلبه: العناد ده هو اللي جابك يا سيادة الغول.. وبعدين أنا بقرأ قصة قصيرة عن حبنا وأبين للناس إزاي الظابط اللي قلبه حجر بقى بيعرف يغير الحفاضات. عاصم ضحك من قلبه، وشدها لحضنه، وبص في عينيها وقال: أنا قلبي محجرش غير عشان يحميكي.. ودلوقتي قلبي بقى ملكك أنتي وعمر. سيلا غمضت عينيها وهي حاسة بأمان مكنتش تحلم بيه، وعرفت إن الوجع والكسر والمرض كانوا مجرد نار صهرت حبهم عشان يطلع صلب ميتكسرش أبدًا. تمت بقلم شروق مصطفى