اسكريبت ل ايه شاكر

- أنا عايز أتجوز يا ندى. - وماله يا حبيبي، روح اتجوز... بس طلقني الأول، وأديني كل حقوقي، ودهبي اللي بيعته ترجعهولي، ومتنساش نفقة ابنك توصلني كل شهر، وروح بقا اتجوز.. - ما أنا مش هطلقك، أنا أقدر أفتح بيتين عادي. - ما شاء الله عليك... مبتعرفش تعدي ليلة من غير ما تنكد عليا! أووووف، طيب إحنا راجعين من فرح ومبسوطين، خلي الليلة تعدي بقا وإحنا مبسوطين ونشوف الموضوع الرخم ده وقت تاني. ضحكت بصوت عالي، مش عارف ليه الستات بيتضايقوا من موضوع الجوازه التانيه دي! لما بحب أنكش زوجتي ندى بجيب سيرته على طول... بصيت لندى اللي قاعدة جنبي في العربية وابتسمت، ورجعت أتابع الطريق.. كنا راجعين من فرح واحد صاحبي، سيبنا ابننا عند حماتي وكان واحشني الخروج مع ندى لوحدنا.. أنا أصلًا مستحيل أفكر أتجوز عليها لأني بحبها.. بصيت للطريق قدامي، وحسيت إنه غريب عليا... كأني أول مرة أعدي منه.. - هو احنا توهنا ولا ايه؟! ومجرد ما نطقت الجمله دي العربية وقفت... حاولت أشغل المحرك مره تانيه لكن معرفتش.. - يا نهار أبيض! العربيه شكلها عطلت يا ندى. قلتها بصدمة، بصتلي ندى وقالت بابتسامة انتصار: - أهو ده بقا ذنبي عشان نكدت عليا. - ده على أساس إن العربية عطلت بيا لوحدي؟ ما إنتي معايا يا روح قلبي.. قلتها بسخرية، وبصيت حواليا.. كنا في نص أراضي زراعية، والدنيا ضلمة، ومفيش حوالينا غير أعواد الذره من كل ناحية.. نزلت من العربية وحاولت أشوف فيها إيه... بس دي كانت أول مرة تعطل مني، ومكنتش عارف أعمل إيه! ومع ذلك حاولت لكن مفيش فايدة.. كنت لسه شاري العربية من كام يوم، وفرحان بيها جدًا.. العربية كانت سعرها قليل بشكل غريب مقارنة بأسعار السوق، ولما دخلتها فحص لقيتها مفيهاش غلطة واحدة... فقلت إنها لقطة... بصيت في الساعة وكانت ١٢ ودقيقة... طلعت موبايلي عشان أرن على أي حد، لكن مفيش شبكة... ندى في موبايلها هي كمان، وقالت: - برده مفيش شبكة. وشوفت بيت واحد منور من بعيد.. بصيت ناحيتة ورجعت أبص لـ ندى وقلت: - خلاص، هروح للبيت ده، يمكن نلاقي حد يقدر يساعدنا... خليكي في العربية على ما أرجع. - لا طبعًا مش قاعده في العربيه لوحدي، رجلي على رجلك. وأصرت ندى ترافقني فمشينا مع بعض ناحية البيت.. وفي نص الطريق قالت وهي بتبص حواليها: - رومانسي أوي اللي بيحصل ده. قلت باستغراب: - رومانسي إيه بس؟! - تخيل بقا نلاقي فندق مفيهوش غير أوضة واحدة ونقضي الليلة مع بعض. قالتها وهي بتصرخ بحمـ.ـاس، بصيتلها: - ندى يا حبيبتي فوقي، إنتي مراتي ومعانا أنس دلوقتي. - يا أخي سيبني أتخيل... كم أنت غتت! - غتت؟ مش بقولك عايز أتجوز! أنا مفتقد كلمات الحب والرومانسية. - لكل فعل رد فعل يا قلبي... وإنت مش مغرقني رومانسية يعني عشان أفيض عليك بيها... ده أنا بقالي سنة قلبي عايش في قحت.. زفرت بقـ.ـوة وقلت: - طيب اسكتي بقا، مش وقته الكلام ده، لينا بيت نتفاهم فيه، تعالي نشوف حد صاحي في البيت ده يمكن يساعدنا. وصلنا للبوابة، كانت بوابة حديد ضخمة، ولما قربت منها لاحظت إن البيت كان أكبر بكتير مما كنت شايفه من بعيد.. فتحت البوابة ودخلنا، وقتها وقفت مكاني بتأمل شكل البيت: - إيه ده؟! البيت ده شكله غريب أوي. ندى بصت للبيت وهي مبهورة: - هو إحنا فين بالظبط؟ - والله ما أنا عارف! البيت كان ليه سور عالي، وحديقة واسعة، وأعمدة ضخمة، وبلكونات كتير، وشبابيك طويلة، وكل حاجة فيه شكلها قديم بس فخم في نفس الوقت. والغريب... إنه كان وسط أراضي زراعيه ومفيش بيوت حواليه... ومفيش ناس... قلت: - أهو أنا طول عمري نفسي في بيت زي ده يكون بعيد عن الناس وهادي. مشيت في المدخل لحد ما وصلت للباب خبطت أكتر من مره وفجأة... الباب اتفتح.. رجعت لورا وتبادلت النظرات مع ندى، قالت: - هو... حد فتح؟ هزيت راسي بجهل: - مش عارف. زقيت الباب براحه وسقفت وأنا بقول: - حد هنا؟ يا جماعه؟ يا أهل البيت. مسكت ندى في دراعي، فاتقدمنا خطوات كان منور من جوه، صاله واسعه وسلم في نصها يؤدي للطوابق اللي فوق... وأغنية أم كلثوم بتتردد فيه: «يا حبيبي... الليل وسماه ونجومه وقمره...» ابتسمت ندى وهي بتبص حواليها وقالت: - الجو رومانسي أوي، تفكتر حد عاملنا مفاجأة؟ - اسكتي يا ندى، وياريت مسمعش صوتك خالص. قلتها بنرفزة، وبدأت ألف في البيت وأنادي لو فيه حد هنا... بس صوت الأغنيه كان عالي فتوقعت إنهم مش سامعيني... شميت ريحة ذره مشوى، فبصتلي ندى قالت: - تقريبًا أهل البيت صاحين لأني شامه ريحة ذره بيتشوي.. بجد نفسي أكل دره. مسكتها من ايديها وأنا بقول: - دره اي دلوقتي؟ تعالي كده نشوفهم في الدور التاني. قالت بابتسامة واسعة: - الله! وإنت بتمسك ايدي كده حسيت إن هرمون الأوكسيتوسن صل السماء. - أنا بقا الأدرينالين عندي اللي وصل للسماء.. وفي اللحظه دي سمعنا صوت ضحك جاي من فوق، قلت: - تعالي يا ستي نشوف مين فوق؟ - أنا مش هتحرك من مكاني يا محمود. - بس تعالي متخافيش.. أنا معاكي أهوه.. - أنا مش خايفه بس قلة ذوق إننا ندخل بيوت الناس كده! - معندناش حل تاني. قربنا من الأوضه اللي صوت الضحك جاي منها، وقلبي بيدق بسرعه، كنت ماسك إيد ندى وكأني بطمنها لكن الحقيقه إني بحاول أطمن نفسي... خبطت على الباب: - يا... جماعه ياللي ساكنين البيت ده... حد سامعني؟ واتفتح الباب.. كنت هجري لأني في اللحظة دي تخيلت كل المشاهد المرعبه لكن اللي حصل إن فيه راجل خرج، من الباب، قال باستغراب: - انتوا مين؟ ودخلتوا هنا ازاي؟ بصيت له من فوق لتحت كان لابس جلابيه فلاحي، وفي ايده كوز درة، ارتعشت كلماتي: - احنا عربيتنا عطلت بره، ودخلنا هنا لما لقينا باب البيت مفتوح وكنا عاوزين مساعده. بدل نظراته بينا و أخد قضمه من كوز الدره اللي في ايده، وقال بابتسامة: - امممم، البواب ساب الباب مفتوح كالعاده! انفصلوا.. حالًا هنادي محمد ابن البواب يشوفهالكم... هو اسطى ميكانيكي وبيفهم في العربيات.. اتفضلوا كلوا معانا دره على ما الموضوع يتحل. - لا شكرًا احنا هنروح معاه. - والله ما تخرج إلا لما ناكل دره سوا.. يلا قبل ما يبرد.. اتفضل يا بيه... اتفضلي يا مدام. ومع إصراره الشديد دخلنا معاه، كانوا قاعدين في بلكونه واسعه... ووقف الراجل ينادي على محمد وقاله يشوف العربية... عيلة كبيره بياكلوا دره مشوي رحبوا بينا وقعدنا ناكل معاهم دره.. راجل قاعد جنب زوجته، وبنتهم جنبهم باصه في الكتاب بتذاكر وهي بتاكل من الدره... والراجل التاني اللي استقبلنا قعده جنب زوجته وشايله ابنها الصغير في حجرها.. وفيه شاب قاعد بعيد عنهم بيبصلهم وهما بياكلوا ومش بينطق... بص الراجل الأول للتاني وقال بوش خالي من التعابير: - اي يا حسين ضيوفك مش بياكلوا ليه؟ - كل يا أفندي دا الدره مسكر وزي العسل. قالها حسين وهو ده الراجل اللي استقبلنا، فابتسمت واضطريت أكل دره، فسحبت ندى ايدي: - قلبي مش مطمن... - ليه؟ مش كان نفسك تأكلي دره مشوي! كلي يا حبيبتي.. وبدأو يلعبوا كوتشينه وهما بياكلوا دره، وكل راجل بيبص لـ زوجته بحب، فابتسمت ندى، وهمستلي: - الناس دول طيبين اوي... ويا دوب خلصت جملتها، الكراسي اتقلبت، والأصوات علت، وكل واحد بقى بيزعق في التاني. حاولت أفهم في إيه، لكن محدش كان بيرد عليا... وفي ثواني، الخناقة خرجت عن السيطرة.. واحد ضـ.ـرب التاني، والتاني رد عليه، ولقيت اتنين وقعوا على الأرض، والستات بتصرخ... وفي لحظة جريوا كلهم بره الأوضه... سحبت ندى وجرينا على بره احنا كمان، ولقينا هدوء وسكون وكأن البيت مفيهوش حد... حاولت انادي عليهم: - يا جماعه.. يا أستاذ حسين؟ يا... محمد! - هو في اي؟! محدش بيرد علينا ليه يا محمود؟ - معرفش يا ندى. ولما خرجت من الاوضه لفت نظري ساعة كبيرة متعلقة على الحيطة، والساعة كانت واقفة على ١٢:٠٧ بصيت في موبايلي، وكانت١٢:٠٧ بالظبط.. واللي خلاني أحس إن فيه حاجه غلط، الساعه فجأة بقت ترجع لورا يعني ١٢:٠٦ وبعدين ١٢:٠٥ لحد ما وصلت ١٢:٠٠ ودقت بصوت عالي.. حسيت إن الجو مريب رجعت أبص لندى، وقبل ما أقول كلمة... سمعنا صوت صرخة عالية وبعدها صوت خبط شديد على باب البيت... شهقت ندى ومسكت فيا وهي بتقول: - هو إيه اللي بيحصل ده؟! - مش عارف.. بس أنا رجلي مش شايلاني يا ندى.. - طيب يلا بينا، نجري ونخرج من البيت ده لان شكله كده مسكون. قالتها ندى بحروف بتترعش... ونزلنا السلم نجري لكن مش عارف الصاله كان فيها حاجه غريبة كل ما نمشي ناحية الباب نلاقينا رجعنا نقف مكاننا والباب لسه بعيد... بصيت لـ ندى كانت ملامحها مرتبكه، وبدأت تعيط وهي بتقول: - أنا أكيد في كابوس يا محمود... حاول تقرصني كدا عشان أصحى.. قلت بارتباك: - طيب اقرصيني إنتي ما يمكن أنا اللي في كابوس.. ولما قرصتني ندى، سمعت نفس صوت حسين: - اسم الكريم ايه؟ اتنفضت وبصيناله بصدمة ورعب، كان مبتسم وقال: - يلا بينا العشاء جاهز. - لا عشا اي يا أستاذ حسين، حضرتك بس وصلنا لحد الباب لأننا مش عارفين نوصله. انفعل حسين: - قسمًا بالله ما تخرجوا من البيت إلا لما تتعشوا معانا... واضطرينا نروح معاه على مضض، العيله كانوا قاعدين على السفره وكأنهم مكنوش بيتخانقوا من دقايق... - مش هتاكل معانا يا هشام؟ كان صوت حسين بيسأل الشاب اللي قاعد بعيد عنهم، فقال الشاب: - لأ أنا مش بتعشى.. أنا عايز أنام. - واحنا كمان زي هشام مش بنتعشا... حد بس يوصلنا للباب. قولتها وقمت وقفت لكنهم اتشغلوا في الأكل وتجاهلوا وجودنا.. وبعدين اتجه حسين لهشام وضربه.. وقال: - إنت عارف إنت عملت اي يا حيوان؟ شوهت سمعتنا بالمرض النفسي اللي عندك يا مريض الذُهان.. لازم تدخل مصحه تتعالج. زفه هشام وقعه على الأرض، وقاموا تاني يتخانقوا وصوت صريخهم بقا عالي... وطلعوا كلهم على فوق وهما بيجروا ورا بعض.. - اي العيله الغريبه دي يا محمود؟ خرجني من البيت ده أبوس إيدك... مسكتها من ايديها ووصلنا الباب لكن المره دي كان مقفول... مسكت موبايلي أرن على حد يجي ينقذنا لكن برده ملقتش فيه شبكه والساعه في الصالة برده بترجع من ١٢:٠٧ لـ ١٢ وترن بصوت عالي... بصيت لندى، وقالتلي: - الساعه دي مالها كده؟! إيه الرعب ده؟ وفجأة... سمعنا صوت عربية بتمر جنب البيت... جرينا ناحية الشباك، وبصيت من ورا الستارة... يمكن ألحق أنادي حد ينقذني من هنا... لكن ملحقناش... في اللحظة دي سمعنا صوت طـ.ـلقة رصاص... فطلعنا بسرعه للأوضة وسمعت صوت هشام بيبكي: - قتلته ليه؟! ق\تلت خالي توفيق ليه يا خالي حسين؟! وشوفت حسين لما ضـ.ـرب هشام على دماغه فوقع هشام على الأرض فاقد الوعي.. بص حسين حواليه يتأكد إن محدش شايفه وخلاه يمسك الم\\سدس.. وصرخ بأعلى صوته: - المجنـ.ـون قت\ل توفيق... آه يا اخويااا... الحقونا يا ناس أخويا اتق\تل... آه يا أخويااااا.. واتجمعوا العيله واختلطت اصوات الصراخ، ووقف حسين في جنب بيبتسم وهو بيمسح دموعه المزيفة.. نزلنا نجري ناحية الباب، والمرة دي الباب اتفتح بسهولة... خرجنا بأقصى سرعة، وأنا ماسك إيد ندى، لحد ما وصلنا للعربية... فتحت الباب وقعدت في كرسي السواق، وندى قعدت جنبي وهي بتتنفس بسرعة وبتقول: - الراجل قـ..ـتل أخوه ولبسها لـ هشام! مردتش عليها، سميت الله ودورت العربية، والغريبه إنها اشتغلت من أول محاولة... حطيت إيدي على الدركسيون، وكنت لسه هتحرك، لكن ندى قالت: - استنى يا محمود... بص وراك. بصيت في المراية... لقينا البيت اختفى.. ومكانه كان فيه أرض فاضيه... فضلت ساكت ثواني، مستغرب اللي بيحصل، ندى بصتلي وهي بتعيط: - محمود... رجعنا البيت بسرعه بالله عليك. بصيت قدامي للطريق اللي مازال غريب... وشغلت العربية وأنا مش قادر أتكلم، افتكرت لما صاحب العربية قال وهو بيضحك: "العربية دي فيها كل المميزات لكن خلي بالك متمشيش بيها بعد الساعه ١٢." وقتها تجاهلته وضحكت وأنا بقول: "ليه هي سندريلا ولا ايه؟!" فوقت من شرودي على صوت ندى كانت بتردد أيات من القرآن.. وبدأت أقلدها... وقفت عند أول محطة بنزين ونزلت أسأل عن الطريق، لأني مازلت تايه... وأنا داخل، سمعت صوت راديو: "الساعة الآن الثانية عشرة بعد منتصف الليل... نبدأ معكم يومًا جديدًا، الخميس الأول من أغسطس لـ عام٢٠٠٢. وننتقل إلى سهرتنا الليلية..." رجعت خطوة لورا، واختل اتزاني للحظة، واتقدمت تاني، سألت العامل: - معلش... هو النهارده كام؟ رفع عينه من الجورنال اللي في إيده وقال باستغراب: - (١/٨/٢٠٠٢) - إنت متأكد؟ ضحك وقال: - أيوه يا أستاذ، هو إحنا هنختلف على التاريخ كمان؟ وأهو... السنين بتجري. فضلت باصصله من غير ما أرد... ألفين واتنين؟! إزاي؟ إحنا في ٢٠٢٦... مديت إيدي للجريدة اللي في إيده وقلت: - ممكن أشوفها؟ ناولني الجريدة وهو مستغرب، وبدأت أقلب في صفحاتها بسرعة، أدور على أي حاجة تثبت إن اللي سمعته غلط. لحد ما عيني وقعت على صفحة الحوادث... كان فيه عنوان كبير: "مقتل توفيق على يد ابن شقيقه هشام بعد خلاف عائلي." وتحت العنوان صورة حسين وتوفيق وهشام. بدأت أقرأ الخبر وأنا حابس أنفاسي: "شهدت إحدى القرى صباح أمس جري\مة ق\تل مأساوية، راح ضحيتها المدعو توفيق نبهان، بعد أن أطلق عليه ابن شقيقه هشام عدة طلقات نارية إثر خلاف نشب بينهما داخل منزل العائلة. وأكد شهود من أهالي المنطقة أن هشام كان يعاني من اضطرابات نفسية خلال الفترة الأخيرة، وأكدت الأدلة أنه يعاني من مرض الذهان.. وقد ألقت قوات الأمن القبض على هشام، بينما رفض حسين الإدلاء بأي تصريحات، واكتفى بالقول إن الأسرة تعرضت لمأساة لا يمكن وصفها." نزلت الجريدة من إيدي ببطء... بصيت للصورة مرة تانية... قلبي وقع في رجلي.. رجعت أجري للعربية، فتحت الباب بعـ.ـنف وركبت، قلت بأنفاس بتتسارع: - ندى! بصتلي بخوف: - في إيه يا محمود؟ رفعت الجريدة قدامها، لكن صوتي خـ.ــانني ومقدرتش أتكلم... خدتها من إيدي وبدأت تقرأ... وبعد ثواني، رفعت عينيها ليا، ووشها شحب: - محمود... إيه ده؟ وفجأة سمعنا صوت حسين من الكرسي اللي ورا: - عامل اي يا محمود؟ صرخت أنا وندى في نفس اللحظة، التفتنا، كان حسين قاعد ورا، مبتسم بخبث، قال وهو موجه س\لاحه ناحيتنا: - متخيل إني هسيبك تمشي بعد ما عرفت الحقيقه يا محمود... بصيت لندى اللي وشها شحب من الرعب.. هددنا حسين بالس\لاح: - سوق يا محمود لحد ما اقولك تقف. فطلعنا بالعربية لحد أرض مليانه ذرة، ونزلنا وهو ورانا بيهددنا: - قدامي... ادخلوا الدره ده... وتمشوا ومتبصوش لورا خالص... ومشينا قدامه وندى بتعيط، وهو بيحكي إنه مكنش بيحب أخوه وإنه كان حارمه من ورثه، وكان لازم يعمل كده عشان ياخد حقه... وفجأة صوته سكت لكن مكنش عندي الجرأة أبص لورا، لحد ما بقينا في نص أرض الدره قولت أكيد هيخلص علينا لكن لما التفت ملقتش حد ورانا.. - اي الجنان ده يا محمود! أنا مرعوبه.. قالتها ندى هي بتعيط فحاوطت كتفها بايدي وأنا بقول: - معلش يا حبيبتي... والله أنا مرعوب أكتر منك.. بس عايزك تهدي.. - طيب هنعمل اي دلوقتي؟ - أنا من رأيي منعملش حاجه نقعد مكاننا للصبح... على ضوء الموبايلات... وقعدنا في نص أعواد الدره جنب بعض وأنا محاوط كتف ندى، سندات على كتفي وقالت: - أنا خايفه أوي. - لا متخافيش... تخيلي كده أنا وانتي لوحدنا زي ما إنتي كنتي عايزه، لحظه رومانسيه اوي. وضحكت وأنا بحاول أخفف عنها، فقالت ندى: - ليك نفس تضحك! أنا نفسي أفهم ايه اللي بيحصلنا؟ يعني احنا رجعنا بالزمن لورا؟! ولا اي اللي حصل؟ أنا مبصدقش في الحاجات دي يا محمود. - ولا أنا بصدق في الحاجات دي... بس برده مش عارف أفسر اللي حصل! ومرضتش أقولها إني شاكك في العربية.. مش عارف نمنا إمتى، لكن فتحت عيني على صوت راجل بيقول: - اصحى يا خويا... إنت وهي نايمين هنا ليه؟ صرخت ندى ومسكت في إيدي، وأنا قعدت أبص حواليا ومش مستوعب إحنا فين... العصافير كانت بتزقزق، والشمس بدأت تطلع، وأعواد الدرة حوالينا بقت واضحة... بصيت للراجل وسألته بسرعة: - إحنا في سنة كام؟ فتح بوقه وهو مش مستوعب سؤالي، فكررت بإلحاح: - من فضلك جاوبني تاريخ النهارده إيه، وسنة كام؟ بصلي باستغراب وقال: - النهارده واحد أغسطس ٢٠٢٦. فضلت ساكت ثواني، وبعدين حضنته من الفرحة وأنا بتنفس بعمق، وبقول بضحك: - رجعنا! رجعنا أخيرًا! ملامحه كان مليانه بالإستغراب، بعدها سألته: - طيب... نقدر نخرج من هنا إزاي؟ قال وهو بيشاور بإيده: - ورايا يا سيدي. مشينا وراه، وهو طول الطريق بيسألنا دخلنا الأرض إزاي وإيه اللي جابنا هنا.. فاضطريت أحكيله قصة وهمية: - كان فيه حرامية بيجروا ورانا، فدخلنا الأرض ومكناش عارفين نخرج. هز راسه وقال: - الحمد لله إن ربنا نجاكم منهم يا باشا. وأول ما خرجنا من الأرض، لقينا عربيتنا واقفة على الطريق.. وقفت مع الفلاح شوية، وسألته عن عيلة نبهان، وبدأ يحكيلي نفس القصة اللي قريتها في الجرنال، وكمل: - بيقولوا بقا إن حسين مات فجأة بعد أخوه بأسبوع تقريبًا... من حزنه عليه.. وهشام خرج من السجن بعد ما ثبت إنه مريض نفسي، وكان دائما يقول إن عمه حسين هو اللي قـ.ـتل بس محدش صدقه... ومرت السنين واتجوز وعاش حياته، وبقى غني أوي.. يلا ربنا يرحمهم جميعًا.. بصلي باستغراب وقال: - بس إنت بتسأل عن العيلة دي ليه؟ ابتسمت بتوتر وقلت: - لا أبدًا... أصلهم قرايبنا من بعيد. ركبت العربية أنا وندى، ومشينا.. بصيت لـ ندى بنظرة سريعة، ورجعت أتابع الطريق، وقلت: - ويمكرون ويمكر الله والله خير الماكرين، حسين قتل أخوه عشان ياخد فلوسه، ومات بعده على طول... تنهدت بعمق، وقلت: - مشكلتنا إننا عارفين إن مصيرنا نموت، ومع ذلك بنعاند ونعيش كأننا هنعيش للأبد.. ندى سكتت لحظة، وبعدين قالت: - ربنا يهدي الناس والله... الشرير بيقعد يخطط ويدبر، وينسى إن ربنا مطلع على كل حاجه. ﴿وَيَمْكُرُونَ وَيَمْكُرُ اللَّهُ ۖ وَاللَّهُ خَيْرُ الْمَاكِرِينَ﴾. ابتسمت على كلام ندى، ومديت ايدي ومسكت ايديها وضغطت عليها.. وكملت سواقه بالأيدي التانيه... وابتسمنا لبعض، ندى زوجتي دائمًا تشاركني كل لحظاتي.. حزني قبل فرحي وفشلي قبل نجاحي... ورعبي قبل اطمئناني. بقلم آيه شاكر ــــــــــــــــــــــــــــــــــــــ فضلت أدور على صاحب العربية كتير عشان أسأله عن كل اللي حصل، لحد ما وصلته وكان سافر بره مصر، كلمته على ماسنجر، قال: "ما أنا قولتلك العربية دي مينفعش تمشي بيها بعد ١٢ بالليل، لأنها غريبة... بترجعك بالزمن لورا، بس في كل مرة بتوريك حاجات حصلت ومحدش كان يعرف حقيقتها.." اتحٰانقت معاه لأنه مكنش صريح معايا... ومن يومها، وأنا بقيت بخاف من العربية.. كل ما أبص لها، أفتكر البيت... وحسين... وهشام... والساعة اللي كانت بترجع لورا.. وفي الآخر، قررت أبيعها.. عرضتها بنفس السعر اللي اشتريتها بيه، وجالها مُشتري.. كان اسمه أدهم.. جالي وهو طاير من الفرحة، وفضل يسألني عن إمكانياتها وحالتها، وأنا كل اللي كان في دماغي إني أتخلص منها بأي شكل... وقبل ما يمشي، بصيتله وقلت: - بس خد بالك من حاجة. - حاجة إيه؟ - العربية دي... بلاش تمشي بيها بعد الساعة ١٢ بالليل. ضحك أدهم، وقال: - يعني إيه؟ عربية سندريلا ولا إيه؟ ابتسمت، رد فعله كان نفس اللي عملته يوم ما صاحبها الأول قال لي الجملة دي، وقررت أصارحه وشرحتله حكايه العربية لكن كان واضح إنه مش مقتنع وفاكر إني بفكر أرجع في البيعه أو يمكن افتكرني مجنـ.ـون وأخدني على أد عقلي.. سلمته المفتاح... وأخدت رقمه عشان ابقى أطمن عليه... ومشيت وأنا ببص للعربية للمرة الأخيرة.. كنت عارف إني كده خلصت حكايتي معاها... بس يا ترى أدهم حكايته بدأت معاها؟! تمت بفضل الله وانتظروا جزء ثاني. سلسلة: #عربية_سندريلا اول مره اكتب اللون ده شجعوني 🤺👀 #كتابات_آيه_شاكر