اليوم اللي اعواد فيه

النيابة حظرت سارة من السفر، وفي ظرف أسبوعين كانت ميرفت مرتي أبويا وسارة قاعدين في النيابة بيقطعوا في بعض، كل واحدة فيهم ترمي التهمة على التانية. سارة كانت خايفة من السجن ومستعدة تبيع أي حد عشان تنجد بجلدها، وميرفت خايفة على الفلوس اللي هربتها من ورثي بعد وفاة بابا.

وفي نص المعمعة دي، رامي كان بيحاول بكل الطرق إنه يوصلّي. اتصل بأي حد يعرفني، وأخيراً جه بنفسه لبرج “شاهين للوجستيات” في التجمع الخامس.

كنت قاعدة في مكتبي بالدور الأخير، بنهى بعض العقود التجارية، لما السكرتيرة بلغتني إن “رامي بيه السويدي” واقف تحت في الاستقبال ومصمم يطلع، وبيقول إن عنده كلام مهم حياته كلها متوقفة عليه.

قلت للسكرتيرة ببرود:

— خليه يطلع.

بعد دقيقتين، باب المكتب اتفتح. رامي دخل ووشه شاحب، خاسس، وعينه فيها كمية انكسار ورعب عمري ما شفتهم فيه. بصلّي وكأنه شايف شبح، خطواته كانت بطيئة ومرتبكة وهزيلة.

— فريدة… أنتِ بجد عايشة؟ أنتِ واقفة قدامي؟

ما قمتش من على الكرسي. بصيتله من فوق لتحت وقلت بنبرة هادية ومستقيمة:

— أظن الشغل اللي خسرتوه قدام شركتنا كان أثبتلك إني حيّة وبشتغل كمان يا رامي بيه. خير؟ جاي ليه؟

قرب من المكتب وإيده بتترعش، وحط إيده على الخشب كأنه بيحاول يتسند:

— فريدة.. أنا أسف. أنا مكنتش فاهم حاجة.. سارة وميرفت ضحكوا عليا، استغلوا نقط ضعفي وعملوا لعبة قذرة عشان يبعدوكي عني ويسرقوا فلوسك وفلوس عيلتي. أنا عرفت كل حاجة.. عرفت التزوير وعرفت التحويلات البنكية. أنا قطعت علاقتي بسارة ورفعت عليها ق\ضية طرد من الشقة.

ابتسمت ابتسامة خفيفة مليانة سخرية:

— وعايزني أعملك إيه؟ أطبلّك مثلاً؟ ولا أقولك برافو إنك اكتشفت الحقيقة بعد ما طردتني وأنا بنزف في المستشفى؟

رامي دموعه نزلت من غير ما يحس:

— فريدة، أنا سامع صوت ياسين في حياتي بس مش قادر أشوفه.. أنا عايز أردك، عايز نرجع نبني بيت جديد. أنا مستعد أتنازل عن كل حاجة، مستعد أبدأ معاكي من الصفر. أنتِ مراتي وأم ابني!

قمت وقفت، وحطيت إيديا في جيوب البنطلون، وبصيتله في عينه من غير أي انفعال:

— رامي.. أنا عمري ما كنت مراتك. أنا كنت مجرد “صفقة” أنت اضطريت تقبلها، ولما حبيت تفرغ عقدك ونقصك، فرغته فيا. لما كنت بحاول أقرب منك، كنت بترميني.. لما كنت بنزف وبموت وبترجاك تيجي تقف جنبي، طلبت مني أختفي من مصر عشان الست سارة متزعلش. أنت مكنتش مغفل، أنت كنت خاين وقاسي. والسذاجة اللي أنت فيها دلوقتي مش هتعفيك من اللي عملته.