العقد ج الاخير
الفصل الرابع عشر: المواجهة في المطر
تاني يوم بالليل، ندى تأخرت في المحل أكتر من العادي. المطر بدأ ينزل خفيف وبارد، الشوارع بدأت تفضى والجو بقى ساكت تماماً. ندى كانت ماشية في الزقاق الجانبي الضيق اللي جمب المحل عشان تطلع على الشارع الرئيسي، ولما وصلت لنص الزقاق، فجأة خرج راجل من ورا عربية نقل كانت واقفة بتنزل بضاعة.
الراجل وقف قدامها وسد السكة: “أنتِ ندى عبد الرحمن؟”
ندى وقفت مكانها، وقلبها دق بسرعة بس حاولت تبان قوية: “مين اللي بيسأل؟”
الراجل كان لابس جاكيت بني، وعلى وشه ابتسامة باردة ومستفزة مفيهاش أي نوع من الأمان: “واحد مهتم بالدكان بتاعك والمكان ده.”
“المحل مش للبيع.”
الراجل قرب خطوة وقال بنبرة لئيمة: “في مذهبنا.. كل حاجة وليها تمن والكل بيبيع.”
ندى بدأت تاخد خطوات لورا وبهروب ناحية باب دكانها تاني: “بس المحل ده مش ليك ولا هيتباع لأشكالك.”
الراجل لمح الخوف في عينها وبدأ يتقدم ناحيتها بسرعة..
بس قبل ما يلمسها أو يوصلها، دخلت عربية دفع رباعي (جيب) سوداء ضخمة بسرعة جوه الزقاق، وفرملت بقوة عملت صوت صرخة إطارات مرعبة. البابين اتفتحوا ونزل منها اتنين رجالة بجسم رياضي وبدل سودة. الراجل الغريب بصلهم، قاس المسافة بينه وبينهم بعينه، وعرف إن اللعبة خسرانة، فلف وشه ومشي بسرعة من غير ولا كلمة واختفى في الشارع الرئيسي.
ندى كانت واقفة متمسمرة في مكانها وهي بتبص للرجالة اللي رجعوا للعربية وركبوها تاني عشان يتحركوا. بس في اللحظة دي.. ندى لقطت وش واحد منهم بوضوح تحت نور كشاف العربية قبل ما تلف وتمشي.
الوش ده مش غريب عليها.. ده نفس الراجل البودي جارد اللي شافته واقف برة مكتب ياسين الغرباوي في الدور الأخير!
راجل ياسين!
عشر دقائق بالتمام والكمال.. وكانت ندى جوة تاكسي طاير بيها في شوارع القاهرة متجهة مباشرة لبرج “الغرباوي جروب”.
دخلت بهو البرج وهي مبلولة من المطر، غرقانة، وعلى آخرها من الغضب، وفي إيدها شمسية مكسورة ومتبهدلة. رجال الأمن بتوع البوابة وقفوا في طريقها عشان يمنعوها تدخل بالمنظر ده، بس في اللحظة دي ظهرت نرمين السكرتيرة وهي نازلة من الأسانسيرات الخاصة.
“ندى؟ في إيه؟” نرمين سألتها بذهول.
ندى قالت وهي بتنهج من الغضب وعينها بتطلع شرار: “أنا لازم أشوف ياسين الغرباوي.. دلوقتي حالا!”
