زين وبنت عمه 2بقلم ملك ابراهيم
“بس باقي أهم حق لازم تاخديه وهو حقك مني أنا، أنا عارف إن كلامي وشكي فيكي وقسوتي عليكي كل ده ما يتغفرش، أنا اتعميت عن الحقيقة وصدقت الكدب وسيبتك تعاني لوحدك.”
ونزل زين على ركبه قدامها ومد إيده ليها بتردد:
“زهرة.. أنا آسف، آسف على كل لحظة وجع سببتها ليكي وعلى كل دمعة نزلت من عينيكي بسبب جهلي وظلمي، أنا مش بطلب منك تنسي ولا بطلب منك ترجعيلي الحب اللي كان بيننا، أنا بس بطلب منك تسامحيني على الأذية اللي عملتها فيكي، سامحيني عشان أقدر أسامح نفسي.”
نظرة زهرة كانت بتتنقل بين عينيه وإيديه اللي ممدودة ليها، الصمت كان مالي الأوضة، صمت محمل بكل الألم اللي مروا بيه وبكل الأمل اللي ممكن يكون لسه موجود.
زهرة بصت لزين وحست إن كل الكلام اللي كانت مجهزة تقوله اختفى، شايفاه قدامها مكسور ودي أول مرة تشوفه كده، الألم اللي في عينيها كان كبير بس كلامه بدأ يكسر حواجز كتير جواها.
بعد لحظة صمت طويلة ردت بصوت خافت:
“زين.. اللي حصل مش سهل، الألم اللي عشته كان أكبر بكتير من إني أنساه أو أعديه بسهولة، أنا.. أنا محتاجة وقت.”
زين هز راسه بتفهم وقام وقف تاني:
“أنا عارف يا زهرة، عارف إن اللي عملته مش هيتنسي بسهولة وإن كلمة آسف صغيرة قدام حجم وجعك، وهستنى أي وقت تحتاجيه وهستنى مهما طال الزمن.”
ومسك إيديها بحنية المرة دي ماكنش فيه تردد:
“بس عايزك تعرفي حاجة وأنا بقولها بكل صدق.. أنا بتمنى من كل قلبي إنك في يوم من الأيام توافقي تكوني مراتي، مراتي لآخر يوم في عمري، أنا بتشرف بيكي قدام الدنيا كلها وقدام نفسي وقدام ربنا، انتي تستاهلي كل خير يا زهرة وأنا مستعد أعمل أي حاجة عشان أثبتلك ده.”
وساب إيديها بهدوء وساب الأوضة، سايب وراه قلب زهرة اللي كان مليان صراع بين ماضي موجوع ومستقبل مجهول، بس لأول مرة من زمان كان فيه بصيص أمل صغير بينور.
وبعد شهور طويلة قضاها زين في محاولات حثيثة إنه يعوض زهرة عن كل لحظة ألم مرت بيها، كان بيقف جنبها في كل خطوة، بيرد اعتبارها وبيثبت براءتها قدام كل اللي شكوا فيها، مرات عمه وعمه جم واعتذروا لزهرة قدام الجميع وظهرت الحقيقة جلية وواضحة للكل.
زين ماكنش بس بيصلح اللي فات، لأ ده كان بيبني مستقبل جديد مع زهرة، كان بيسمعها وبيحتويها وبيخليها تحس بالأمان والحب اللي كانت محرومة منه، ومع الوقت بدأت جروح زهرة تلتئم وبدأ قلبها يسامح، مش بس زين لكن كمان نفسها على كل اللي مرت بيه.
