سندريلا
أصبح وجهها كألوان الطيف من شدة الصدمة التي كانت لاتلقي لها بال ولا تحسب لها حسبان ،
ثم أكملت سندريلا طرقها علي الحديد وهو ساخن مردفة :
_ من غيرك بيدخل أوضتي وبيقعد معايا بالساعات وأنا قاعدة معاكي براحتي ؟
مين غيرك كان بيمسك موبايلي بحجة إن موبايلك فاصل شحن وتاخديه علي إنك تبحثي عن حاجة وإنتي بتاخديه علشان تهكري لي الموبايل وتعملي مابدالك ؟
إنتي الوحيدة إللي عملتي كدة مفيش غيرك ياخاينة .
رفعت الأخري رأسها بغل ورددت بحقد دفين :
_ أيوة أنا إللي عملت فيكي كدة بقالي اكتر من عشر شهور بخطط وبرتب علشان لما أنفذ الضربة تهدك علطول وماتقوميش منها .
ليه ليه ياصاحبتي عملت فيكي إيه ؟
سألتها سندريلا بدموع غزيرة هبطت علي وجهها .
لم يرمش لها جفن ولم يرق لها قلب علي دموع صديقتها ورددت بغل وعيون تنطق شر :
_ ليه ! الأسباب كتير متعديش ياساسو ،
أولهم أحمد إللي حبيته لما كنا في ثانوي حب شديد وفي الآخر جه اعترف لك إنتي بحبه وكسر قلبي، وطبعاً إنتي الحاجة لما تجي لحد عندك بتتمنعي عليها ماخلاص طولتيها ،
وأول ما دخلنا الجامعة لفتي الأنظار بطلتك وكأن مفيش غيرك والعيون دايما عليكي وكأنك الأميرة إللي بتخطف العيون أول مالكل يشوفها ،
ولا تقديرك إللي بتجبيه كل سنة بالرغم من إني بذاكر أكتر منك وبرده في الأخر بتطلعي الأولي وأنا التانية،
وإللي قطع طرف الخيط وخلاني ملضمهوش تاني عامر إللي حبيته من أول ماشفته بس هو حبك إنتي ،
كل حاجة متدمرة في حياتي سببها إنتي ، إنتي ياسندريلا هانم ،
وأكملت بفحيح:
_ وعلشان كده انتقمت منك بدم بارد وخليت سمعتك في الأرض وعامر طلقك في لمح البصر، ودمرت نفسيتك من إللي عملته فيكي مش هتكملي الجامعة هتنفصلي منها بسبب سمعتك المشبوهة ،
وحليني بقي عقبال ماتثبتي إن أنا إللي عملت فيكي كدة ، أو تقدري تثبتي إن أنا إللي ورا فيديوهاتك العالمية إللي معمولة بإيميلك إللي أنا هكرته وأخدته ،
من الاخر أنا نهيت عليكي .
كل ذلك علي مرأي ومسمع من جميع طلاب الجامعة ، وبدورهم انصدموا للتو ونظروا إلي تلك الجنة باشمئزاز ويلقون عليها وابلاً من الشتائم القذرة التي تليق بخبثها ،
فإذا بها تخرج من بهو الجامعة بسرعة بسبب فضيحتها القذرة إلا أن عامر أمر الأمن باحتجازها ،
ثم نظرت سندريلا لعامر بابتسامة منتصر وقالت :
_ أما إنت بقي ياحب العمر وزوج المستقبل ، أنا بشكر المحنة إللي أثبتت لي معدنك ونجدتني منك رغم إنها شديدة وأثرت عليا إلا إن ربنا بيخلق لنا من وسط المحن منح والمنحة إللي ربنا رزقني بيها هي إني ربنا نجاني من ربطتك ،
