روايه للكاتبه زينب مصطفى

حبيبه بارتباك
= ليه في حاجه

= بقولك العشاء بتاعك جاهز على الصنيه أهوه

ابتسمت حبيبه بارتباك وهي تمتم بالشكر وحملت صنية العشاء وتوجهت بها الى غرفتها بعد انتهاء موعد عملها وخلود دولت هانم الى النوم..

في نفس التوقيت..

مالت عصمت هانم على إذن مي بعد ان اختلت بها جانبا
= عملتي الي قلتلك عليه..

مي وهي تبتسم بتوتر وترد بهمس
= ايوه حطيت لها الدوا في العصير من غي ما حد يحس..ورميت بخاخة الربو تحت السرير من جوه خالص زي ما قلتيلي

ابتسمت عصمت
= كويس وبكده دي هتبقى اخر ليله للعقربه الي اسمها حبيبه..

مي بتوتر
= انا مش فاهمه حاجه..انتي خلتيني اعمل كده
ليه والدوا الي خلتيني احطه لدولت هانم ده لازمته ايه

ابتسمت عصمت بمكر
= ابدا دا دوا قابض للشعب الهوائيه وبما انها عندها ربو فهيعمل لها أزمة ربو..وبما انك رميتي البخاخه تحت السرير فالازمه هتكبر وممكن يعني دولت تروح فيها
وساعتها مين هيكون المسئول والمهمل قدام عمر الي ضيع بخاخة الربو ورماها باهمال تحت السرير

ابتسمت مي بتفهم
= حبيبه المرافقه بتاعتها

ثم مطت شفتيها باحتقار
= بس برضه مش فاهمه انتي تاعبه نفسك ومهتمه كده ليه دي طلعت او نزلت حتة مرافقه

عقدت عصمت حاجبيها وهي تقول بتوعد
= اسكتي انتي ..انا عارفه انا بعمل ايه

ثم ابتسمت برقه وهي تنضم الى طاولة الطعام
بأناقه شديده

في نفس التوقيت..

أغلقت حبيبه باب غرفتها عليها ودموعها تسيل بالرغم عنها وهي تقول بغضب من نفسها
= طيب انا بعيط ليه دلوقتي..عمر ايه الي بفكر فيه انا اكيد اتجننت

ثم إنسابت دموعها بالرغم عنها وهي تعنف نفسها
= عمر ايه يا حبيبه الي بتفكري فيه إنتي فين وهو فين..
وألا عشان بيعاملك كويس خلاص هتتجنني وتفكري فيه لا فوقي وبلاش تعيشي في الوهم دا حتى لو مكنتيش متورطه في المصيبه الي حصلتله برضه كان هيبقى مستحيل يبصلك اويفكر فيكي

ثم وقفت تتأمل نفسها بانتقاد في المرآه وقد شعرت بطعم الغيره المر يتملكها وهي تقول بحزن
= يعني هيسيب مي الي مال وجمال ونسب وكل الستات الي زي القمر الي يعرفهم دول وهيبصلك انتي

ثم شعرت بالغضب وتملكتها غيره غير مبرره وهي تسحب العقده التي تجمع شعرها فينساب خلف ظهرها في تموجات رائعه وهي تقول بتحدي

= جرى ايه يا حبيبه ما انتي كمان حلوه وزي القمر بس تحطي شوية مكياج و تلبسي زيهم وهتبقي زي القمر واجمل منهم كمان
ثم اتبعت كلامها بسحب حقيبتها وإخراج فستان أسود قصير ضيق ذو حملات عريضه يصل لقبل ركبتيها بقليل كانت ترتديه وترتدي معه بنطال وجاكيت قصير
ثم ابتسمت بعد ان ارتدته وهي تمسح دموعها ووقفت تتأمل الفستان الذي يبرز بسخاء جمال وتناسق جسدها..
= هو حلو بس بقى ضيق عليا اوي ..الظاهر معدتش هعرف ألبسه تاني