روايه للكاتبه زينب مصطفى

= ولما انتي عارفه شغلك وحافظه اختصاصتك كويس اوي كده ..طالبه تسيبي الشغل من غير ما تنفذي شروط العقد الي انتي مضياه

شحب وجه حبيبه وهي تقول بارتباك
شروط..شروط ايه الي حضرتك بتتكلم عليها

عمر ببرود
= ايه مش عارفه انتي مضيتي على ايه..مش عارفه ا
في شرط في العقد انك لازم تبلغينا انك عاوذه تستقيلي وتسيبي الشغل قبل تنفيذ الاستقاله بشهرين وفي حالة موفقتنا على استقالتك ممكن تمشي بعد شهر واحد

شهقت حبيبه بخوف
= يعني لسه هستنى شهر..

ابتسم عمر ببرود
= قصدك شهرين..

حبيبه بدهشه
= ايه..

عمر ببرود
ايه ودانك تعبانه مش سمعاني كويس ..بقولك لسه قدامك شهرين …وده لأني مش موافق على استقالتك احنا مش بنلعب هنا وتحت أمرك تشتغلي وقت ماتحبي وتسيبي الشغل وقت ماتحبي

نظرت اليه جدته بطرف عينيها وهي تبتسم بمكر

= وانتي عاوزه تسيبينا ليه حد دايقك في حاجه

حبيبه بارتباك
= لا بس أصل..أصل..

دولت هانم بحنان
= اصل ايه يا حبيبتي انا كنت فاكره انك مرتاحه معانا هنا

حبيبه بارتباك وهي تحاول العثور على كذبه مقبوله
= ايوه بس.. أصل.. اصل ..خ…خطيبي ..مش..مش موافق على شغلي هنا..

ضيق عمر عينيه وهو يتأمل يدها الخاليه من اي شئ يشير لارتباطها ليهب فجأه واقفآ و هو يقول بصرامه أخافتها
= وإحنا مالنا ومال خطيبك هو انتي الي بتشتغلي عندنا والا هو ..

ثم اشار بيده بغضب أثار حيرة جدته
= في عقد مابينا وانتي مضيتيه ولازم تحترميه
قدامك شهرين هتشتغلي هنا فيهم وبعدها انتي حره تعملي الي انت عوزاه.. وقبل المده دي ماتخلص مش عاوز اسمع كلام عن استقالتك دي مره تانيه

ثم تركهم وغادر المكان وجدته تقول بدهشه
= استنى يا عمر رايح فين مش هتفطر معايا ….

الا انه كان قد غادر بالفعل دون ان يستمع اليها
نظرت دولت هانم لحبيبه وهي تقول بدهشه

= حبيبه ..انتي تعرفي عمر قبل كده

تراجعت حبيبه للخلف بصدمه وهي تقول بتوتر

=لاء ..دي اول ..اول مره اشوفه..أقصد اول مره اشوفه كان امبارح بليل وحصل مابينا سوء تفاهم ويمكن ده الي مضايقه مني

ابتسمت دولت هانم وهي تقول بمكر
= بقى كده…طيب تعالي اقعدي جنبي يا حبيبتي واحكيلي ايه الي حصل امبارح بالظبط

حبيبه بتوتر
= طيب هجيب لحضرتك الفطار الاول عشان ميعاد الدوا..
ابتسمت دولت هانم برقه
= اقعدي انتي بس ..وانا هطلبهم يجيبوا الفطار بتاعي وفطارك انتي كمان ..ناكل وتحكيلي كل الي حصل بينكم