روايه للكاتبه زينب مصطفى

ثم اغلق الباب من خلفه وتركها تتخبط في مشاعرها الغير مفهومه
جلست عصمت هانم ومي الى طاولة الطعام..
في انتظار قدوم عمر الذي ذهب لإحضار جدته حتى تتناول طعام الافطار معهم

همست مي بغضب وهي تميل على إذن والدتها

= أهو محصلش حاجه ودولت زي القطط بسبع ترواح والست حبيبه الي عاوزه تطرديها لسه موجوده ولا كأن حاجه حصلت

عصمت بغضب
= اسكتي متفكرنيش..عموما انا محضرالها مصيبه اكبر من الي قبلها بس استني

مي بغضب
= استنى ايه انا خلاص مبقتش متحمله انا بقالي شهر محبوسه في البيت دا غير انه واخد مني العربيه والكريدت كارد ..ايه.. السجن ده مش هيخلص

عصمت بغضب
= احمدي ربنا انه اكتفى بحبسك في البيت وانه لسه مراعي انك متربيه بره ومش واخده على عاداتنا هنا ..

ثم تابعت بغضب شديد
= انتي بغبائك هتضيعي دا كله من ايدينا..كل الي همك الشرب والسهر وصرف الفلوس وبس خليتيني اتحوج للكلب الي اسمه شريف

مي بتبرم غاضب
= يعني عوزاني اعمل ايه يا مامي أدفن نفسي بين اربع حيطان زي ماهو عاوز وبعدين متخافيش هو هيلاقي فين حد كلاس و في جمالي وشياكتي

عصمت وهي تضغط على أسنانها بغضب شديد

= انتي مش بس غبيه لا دا إنتي عاميه كمان ..ايه مش واخده بالك هو بيعامل الحربايه الي اسمها حبيبه برقه واهتمام إزاي ..البت دي مش سهله وشكله وقع في حبها

مي بسخريه
= ايه الكلام الفارغ ده يامامي عمر الرشيدي بيحب وكمان هيبص لواحده زي حبيبه لوكل ومش من مستواه .. مستحيل اصدق حاجه زي دي طبعا

عصمت بغضب
= ما انتي الي بتصرفاتك الطايشه وبغبائك وصلتينا لكده بس عمومآ انا خلاص اتصرفت وكلها يوم والتاني بالكتير وهنتخلص منها

مي بعدم اهتمام
= وليه ده كله ..ما تطرديها وخلاص..دي حتة مرافقه لا راحت ولاجت والا انتي مصدقه فعلا ان عمر بيحبها

عصمت بهمس غاضب من استخفاف ابنتها وهي تشير بعينيها لعمر الذي حضر برفقة جدته تتبعهم حبيبه تحمل الادويه الخاصه بجدة عمر

= ششش خلاص اسكتي عمر جه والعقربه جايه وراه
ثم وقفت وهي ترسم ابتسامه مصطنعه على شفتيها
ياه يا دولت هانم اخيرا هتنورينا وتفطري معانا انا لازم اشكر عمر عشان قدر يقنعك انك تخرجي من الجناح بتاعك

ابتسمت دولت هانم ببرود
= إذيك يا عصمت عامله ايه وانتي يا مي لسه حاسه بملل وسطنا

وقفت مي بتبرم وهي تتقدم من جدة عمر تقبلها ببرود
= لا ملل ايه دا انا في بيتي