غش

يابني اقعد بقا دا ايه الفرهدة دي

ابتسمت أمنية وهتفت بحب وهي ترمق الصغير :

لو عايزه تطلعي تنامي شويه لحد ما أسامة وهشام يرجعوا وسبيه معايا

أضافت وجيدة مبتسمة :

روحي يا نور وهو قاعد معانا أهو ولما نجهز الغدا هنرن عليكي

نظرت نور إليهما بامتنان وصعدت دون تفكير، لم تحظى بعدد ساعات نوم تكفيها في الليل … مالت أمنية تحمل الصغير تلاعبه تحت نظرات وجيدة الحزينة، كم تمنت أن ترى أطفال هشام حولها كما كان يقول إليها ” أنا مش هكتفي بعيل ولا اتنين، هجيب ٦ عيال واخليهم يجننوا تيته” ابتسمت على جملته ومسحت دمعه هربت من عينيها، استغفرت الله حمدته على عطاياه، فالحمد لله في السراء والضراء، الحمدلله حتى يبلغ الحمد منتهاه ” رب الخير لا يأتي إلا بالخير ”

: معلش يا امنيه هاتي تلفوني من عند المكتبة

هزت أمنية رأسها واتجهت إلى المكتبة ووجيدة تقول بحيره :

لما أكلم مرات عمك عادل أشوف مصطفي راح يقابل أبوه ولا لسا

جلست أمنية على الأرض ووضعت الصغير بجوارها تقدم إليه بعض الألعاب:

هشام كان عايز يروح المطار خايف أحسن محدش منهم يروح

اتصلت مرتين دون جدوى، وضعت الهاتف بجانبها وقالت بضيق :

ربنا يصلح الحال يا بنتي

مرت ساعة تقريباً إلى أن جاء هشام وبصحبته أسامة، ألقوا التحية وقبل كلا منهما رأس والدته ثم اتجه هشام يعانق أمنية بحنو واحترام :

اتأخرتوا وكمان جايين مع بعض غريبة!!

هتف أسامة بتبرم :

علشان جوزك خلنا نضــ,,ـــــرب مشوار في عز الحر على الفاضي

تطلع هشام إلى أخيه متسائلاً باستنكار :

على الفاضي ؟؟ تروح تستني عمك في المطار الجاي بعد خمس سنين على الفاضي ؟؟!

هز أسامة رأسه بالنفي مردفًا بتوضيح :

مش قصدي بس أهو مصطفي ومحمد و أيمن كانوا هناك ده حتى سهيله كانت معاهم

ضحكت وجيدة مردده بفخر واعتزاز :

ومالو يا حبيبي لما ولاده وأنتم تكونوا مستنينه على الأقل يعرف غلاوته عندكم

نهضت أمنية تساعد نور التي نزلت على صوت السيارة واتجهوا لتجهيز طاولة الطعام، فقال هشام وهو يستند بظهره على الأريكة :

بس زعلوا لما عمي مرداش يرجع معاهم البيت

: غريب عمك برده، شقة ايه وبيته موجود !!

قالتها وجيدة باستغراب ثم نهضت تساعد الفتيات .. التفوا حول المائدة كلا منهما بجوار زوجته والصغير يغفو على الأريكة بعد أن أرهق في اللعب ..