صبري
مروة حمدي
احمد: وانا الدكتور وبقولك طلع تلات كراسي وطربيزة يا علي.
علي: تمضى إقرار على الكلام ده ية دكتور.
احمد: شايف الندالة يا صبرى! لا، ياسى علي انا همضى على نقلك.
علي: لا وعلى ايه اربط الحمار، فوتكم بعافية.
عقب رحيله، احمد معلقا: عم جابر عنده حق، مخه طخين.
لم يفت على احمد تحفز جسد صبرى وتشجنه عند سماع الاسم ولكنه تابع على ايه حال.
احمد بتمطع: تعرف عندى واحد صحبى اسمه ” التعلب” بس ثوانى ده شهرته عندنا هو اسمه فؤاد، بس عارف جدع جدع وصاحب صاحبه، رغم ال هو فيه بس فرفوش شاف كتير وقلبه اتوجع بس استاذ فى رسم الضحكه على الوشوش، عارف يا صبرى سمناه ليه التعلب؟
-لارد
-ذكى جدا، كل حاجه ليها عنده حل!
رن هاتف أحمد بتلك اللحظه لينظر إلى الشاشة معلقا: ابن الحلال عند ذكره يبان…
أجاب المكالمة وفعل خاصية السماعة الخارجية: الو، دلوقت ال افتكرت ان ليك صاحب.
-اعمل ايه الدنيا تلاهى وظروف يا أحمد ونصيحه منى، اوعى تزعل من صاحبك ماتعرفش ايه ال مانعه عنك، بس قولى ايه الهو ال انت فيه ده؟
-احمد: ابدا خلصت بدرى وطلعت السطح وهو قاعدين انا وصبرى ندردش.
فؤاد بصوت انثوى: حب جديد، اه يا خاين.
احمد بابتسامه: صاحب جديد وجاري وصفى النية هتشبهنا.
فؤاد: اه يا عم انت عندك مروق وانا هنا طالع عينى مع الحالات.
احمد مقربا الهاتف باتجاه السور يمده لاسفل نحو صبرى الجالس على الاريكه يعطيه ظهره متابعا:
-وانت يا بتاع اتفضل هنا على الشازلونج بتتعب فى ايه؟
فؤاد بصدق: التعب هنا تعب عصبى ، انت بتتعامل مع الحالة بتعيش ظروفها بتحط نفسك مكانها علشان تلاقى الحل، طب ياسيدى ونروح بعيد ليه انا انهاردة جاتني حالة عندها فوبيا مز الدم.
احمد: ناس كتير عندها الفوبيا دى!
فؤاد: المشكلة لما يكون ال عنده الفوبيا ده دكتور وجراحه كمان.
احمد: ازاى ده؟ اومال تخصص ليه فى المجال ده طالما عنده الفوبيا دى؟ اصلا ليه دخل طب؟
فؤاد: ما هى الفوبيا دى جاتله قريب بسبب حادثة حصلت معاه هو ومراته وابنه على الطريق، خسر فيها مراته وابنه وهو فضل وقت جوا العربية ماسك ايد ابنه بيبكى وهو شايف النبض بيروح منه وحده وحده وهو متكتف مش عارف يسعفه ولا يسعف نفسه حتى.
احمد بتأثر حقيقى: ياه يا فؤاد صعب قوى ده.
فؤاد: الدنيا فيها كتيير يا صحبى، كل واحد بيقف على مشاكله ويقول اشمعنا انا ال بيحصل معايا كده مع انه لو شاف غيره هيعرف ان ربنا رحيم بينا وبيدى كل ابتلاء كأختبار للثبات ومافيش امتحان الا لو كان واثق انك يا عبد تقدر عليه.
