صبري
مروة حمدي
يقف أمام البوابة الحديدية وهو يرفع إحدى قدميه يثنيها ثم يعيدها لموضعها مرة أخرى يتحدث بتذمر لمن يرافقه: اخيرا وصلنا ده انا رجليا تعبت من المشى.
الغفير: معلش ياضاكتور ما هو الوجت ده وبالذات فى الشتاء ما تلاجيش مواصلة وخصوصى أن المحطة مشوارها طويل وبتعدى على خوص ياما.
احمد: طب كنت اتصرفت فى حما*ر نركبه حتى.
الغفيربابتسامة سمجه وهو يخرج المفتاح من جيبه لفتح البوابة: والله لو عندى واحد ماكنت عزيته عنك ابدا هىهىهىهى.
الطبيب وهو ينظر حوله بفضول: الحمدلله البيوت قليله اوى ال حوالينا، انت لما قولتى واحنا جايين أنها فى شارع وحواليها بيوت قولت هتبقى صداع وقلة راحة ليل نهار كده انت توريني اوضتى واريح كم ساعة فى هدوء لحسن عظمى رصرص من البرد وقعدة القطر.
الغفير وهو يحرك شفتيه فى الاتجاهين هامسا: هدوء شكلك مش عتطول ياضاكتور.
احمد: بتقول ايه؟ على صوتك.
الغفير: بجول اتفضل لأجل البرد و…
قطع حديثه وهو يبصر الرجال يهرولون بسرعة من أمامه يرتسم التذمر والوجوم على ملامحهم ، يوفقهم بصوته: هو فى ايه يا ويلد منك ليه، رايحين فين بربطه المعلم الساعة أدى؟!
احدهم:رايحين للحج حسين يشوفلنا صرفة.
ضيق عينه وقد أنتبه إلى ذاك الواقف إلى جواره متابعا.
“الاا مين ال وياك ده يا عمجابر، شكله غريب عن نواحينا؟”
الغفيرجابر: ده ضاكتور الوحده الجديد.
يهم بالرد مرحبا ليأخذه أحدهم يسحبه من يده: يالا يا اخويا نخلص من الهم ال احنا فيه وبعدين ابجا رحب براحتك يالا يالا.
احمد بدون فهم ينظر للغفير إلى جواره بعد رحيلهم: هو فى ايه؟ مالهم دول؟
قبل أن يتلقى الرد وصل إلى مسامعه صوت صرخات عاليه نفضته فى وقفته ليمسك بالباب الحديدى بفزع ينظر حوله لعله يجد مصدرها يهم بالسؤال عنها لتتسع عينيه وقد تحولت الصرخات لضحكات.
احمد: ايه ده؟
الغفيروهو يحمل الحقيبة ويدلف من الباب: ده صبرى.
احمد : صبرى مين؟
لم يجبه وتحرك للداخل واحمد مهرولا خلفه ليقف أمام المبنى .
احمد وهو يتطلع حوله برأسه بريبه وهو يستمع إلى نفس الصوت ولكن تلك المرة يبكى بمرارة.
يبتلع ريقه : ايه صبرى ده يعنى ؟ عفريت يعنى ولا بنى ادم زينا؟
الغفيربتجاهل لسؤاله ونبره الخوف به : زى ما انت شايف ياضاكتور الوحده دور واحد على الناحيه اليمين اوضة استقبال لاصقة فيها اوضة الكشف وف ريحها اوضته التطعيمات بتاعه العيال الصغيرة وعلى الناحيه الشمال اوضتك وفى وشها دورة المياة ودى السلم ال مابين اوضتك والحمام بتوديك السطح.
